FLAŞ
» » Balakən Rayon Polis Şöbəsinin yeni yaradılmış Qabaqçöl polis bölməsinin inzibati binasının açılışı olub

Balakən Rayon Polis Şöbəsinin yeni yaradılmış Qabaqçöl polis bölməsinin inzibati binasının açılışı olub


Daxili İşlər Nazirliyinin (DİN) mətbuat xidmətindən Balaken.info-ya bildiriblər ki, açılış mərasimində rayon icra hakimiyyətinin və hüquq-mühafizə orqanlarının rəhbərləri, şəhid ailələri, ictimaiyyət nümayəndələri, eləcə də yerli sakinlər iştirak ediblər.

Məlumat verilib ki, daxili işlər naziri, general-polkovnik Vilayət Eyvazovun müvafiq əmri ilə yaradılan Qabaqçöl Polis Bölməsinin inşasına bu ilin fevralında başlanılıb, ikimərtəbəli inzibati bina DİN-in Maddi-Texniki Təminat Baş İdarəsi tərəfindən müasir standartlara uyğun tikilərək bütün xidməti otaqları zəruri avadanlıq, inventar və kommunikasiyalarla təchiz olunub. Yeni tikilidə lazımi mühəndis təminatı-ventilyasiya, mərkəzi istilik sistemi və qazanxana, rabitə kommunikasiya və elektrik xətləri quraşdırılıb. Ərazi daş və metal hasarla hasarlanıb, abadlaşdırma və xarici işıqlandırma işləri yerinə yetirilib.

Tədbir iştirakçıları xidməti otaqlara baxıb, ulu öndər Heydər Əliyevin zəngin dövlətçilik fəaliyyətini, Prezident İlham Əliyevin daxili və xarici siyasət sahəsində qazandığı uğurlarını əks etdirən guşə ilə tanış olublar.

Mərasimdə çıxış edən rayon polis şöbəsinin rəisi Çingiz Aslanov ən müasir tələblərə cavab verən inzibati binanın 8 Noyabr - Zəfər Günü ərəfəsində istifadəyə verilməsindən məmnunluğunu bildirib.

Polis polkovniki Daxili İşlər Nazirliyinin rəhbərliyini əmin edib ki, şəxsi heyət bu diqqət və qayğıya layiqli xidməti ilə cavab verəcək, sabitliyin qorunmasında gücünü səfərbər edəcək. Rayon icra hakimiyyətinin başçısı İslam Rzayev mərasimdə çıxış edərək yeni inzibati binanın istifadəyə verilməsi münasibətilə bütün şəxsi heyəti təbrik edib, rayon ərazisində ictimai asayişin qorunmasında və cinayətkarlıqla mübarizədə polis əməkdaşlarına uğurlar arzulayıb. Yüksək zövq və dizaynla inşa edilmiş bölmənin qəsəbəyə də xüsusi gözəllik qatdığını diqqətə çatdırıb.

Azərbaycanda daha bir zəlzələ