FLAŞ
» » Nə qədər ki, gec deyil, Ermənistan sülh çağırışına cavab verməlidir - Deputat

Nə qədər ki, gec deyil, Ermənistan sülh çağırışına cavab verməlidir - Deputat


"Prezident İlham Əliyev ispaniyalı jurnalistə və daha əvvəl “France-24” kanalına verdiyi müsahibələrdə Ermənistan-Azərbaycan münasibətlərində yaranmış mövcud vəziyyətə, o cümlədən, geosiyasi və regional məsələlərə bağlı açıq və konkret şəkildə aydınlıq gətirdi. Növbəti dəfə Qarabağla bağlı hər hansı bir status məsələsinin gündəmdə olmadığı fikrini bildirdi. Azərbaycanın Qarabağ ərazisində yaşayan təxminən 25-30 min civarında olan ermənilərə heç bir statusun verilməyəcəyi fikrini açıq şəkildə dilə gətirdi”.

Bunu Publika.az-a açıqlamasında Milli Məclisin deputatı Nəsib Məhəməliyev deyib.

Millət vəkili bildirib ki, ölkə başçısı müsahibəsində təkcə Ermənistana yox, eləcə də Minsk qrupunun həmsədri olan ölkələrə, Qafqaz bölgəsində geosiyasi maraqlarını saxlamaq və burada möhkəmlənmək istəyən qüvvələrə, ümumiyyətlə, beynəlxalq birliyə tam şəkildə ismarışlarını çatdırdı: “Birincisi, masada statusla bağlı məsələ qaldırmamalıdır. İkincisi, BMT-nin Baş Assambleyasının 76-cı sessiyasında cənab prezident beynəlxalq birliyə müraciət edərək Dağlıq Qarabağ inzibati ərazisinin olmadığı barədə fikirlər səsləndirdi və Azərbaycanın Qarabağ bölgəsi terminini işlətməyi məsləhət gördü. Bu o deməkdir ki, Azərbaycan ərazisində “Dağlıq Qarabağ” adlı inzibati vahid yoxdur. Gələcəkdə də heç bir halda diplomatik masada müzakirə predmeti ola bilməz. Bu, olduqca vacib bir məsələdir. Çünki prezident əvvəllər də bunu söyləmişdi. Müharibəyə qədər, yəni son 30 il ərzində ölkəmiz Azərbaycan dövləti ərazisində yaşayan ermənilərə dünyada mövcud olan ən yüksək status verməyə hazır idi. Təəssüflər olsun ki, erməni tərəfi bunu qəbul etmədi”.

Deputatın fikrincə, status məsələsinin müzakirəsi üçün artıq gecdir: “Məhz onların günahı ucbatından müharibə baş verdi. Minlərlə insan həyatını itirdi. İqtisadiyyat ziyan gördü. Yəni, bundan sonra əvvəlki status-kvoya qayıtmaq, hansısa statusu müzakirə etmək qeyri-mümkündür. Ermənistan uduzan tərəfdir. Dünya praktikasında belə bir hal olmayıb ki, müharibədə uduzan tərəf öz iddialarını ortaya qoysun. Əksinə, uduzan tərəf qalib tərəfin bütün şərtlərini qəbul etməlidir. Bu beynəlxalq norma və prinsiplərdir. Ermənilər və onlara havadarlıq edən lobbi, diaspora təşkilatlarının təhriki ilə yenidən müharibə çağırışlarına baxmayaraq, Azərbaycan dövləti gündən-günə həmin ərazilərdə möhkəmlənir. Prezidentin elan etdiyi siyasi terminlər real formada öz təsdiqini tapmaqdadır. Bu, real sahədə daha da möhkəmləndirilir. Başqa bir tərəfdən, Azərbaycan Prezidenti bütün müsahibələrində beynəlxalq təşkilatlar və digər xarici dövlətlərlə aparılan danışıqlarda böyük sülh sazişinin imzalanması ilə bağlı bir jest edib".

Millət vəkili bildirib ki, Ermənistan tərəfi bunu da qiymətləndirməyi bacarmalıdır: "Biz görürük ki, Ermənistanın daxilində böyük təbəqələşmələr, parçalanmalar baş verib. Ermənistan ordusu faktiki və praktiki olaraq yoxdur. Dağıdılmış ordudur. Nə qədər yeni silahlar da alınsa, nə qədər başqa ölkələrin yardımından istifadə etsə, yenidən əvvəlki ordunu həm keyfiyyət, həm də kəmiyyət baxımından bərpa edə bilməyəcək. Eyni zamanda, məğlubiyyət sindromunu sındıra bilməyəcək. Çünki Ermənistan ordusu psixoloji cəhətdən sınıb. Həmin ordu Azərbaycan əsgərinin nəyə qadir olduğunu görüb. Çoxsaylı erməni politoloqları, hərbi ekspertləri, müharibədə iştirak edən veteranları öz müsahibələrində qeyd edirlər ki, Azərbaycan Ordusu dünyanın ən güclü ordularından biridir. Azərbaycan xüsusi təyinatlıları da dünyanın ən güclü xüsusi təyinatlılarından sayılır. Bu baxımdan da Ermənistan tərəfi nə qədər gec deyil İlham Əliyevin sülh təşəbbüslərinə dəstək verməlidirlər. Sonra gec ola bilər”.

Tural Turan

DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı [email protected] e-mail adresinə göndərin

Hərbi qulluqçumuz şəhid oldu


Şərh yaz

Şərh yaz

yenilə, əgər kod görünmürsə