» » Mehriban Əliyevanın ictimai missiyası-deputat Nəsib Məhəməliyev

Mehriban Əliyevanın ictimai missiyası-deputat Nəsib Məhəməliyev



Qədim yunan müdriklərindən Sokrat deyirdi ki, "İnsanı həyata bağlayan onun gözəl cəhətləridir”. Əslində, dünyaya gələn hər kəs bu cəhətlərlə birgə doğulur. Təbiətin verdiyi gözəllikləri necə ifadə edə bilməsi isə onun düşdüyü mühitdən, boya-başa çatdıqdan sonra özünə seçdiyi yoldan, qarşıya qoyduğu həyat məqsədlərindən asılı olur.

İnsanın bu həyat məqsədlərini tapmasından, kamilliyə aparan yola doğru ilk addımlarını ata bilməsindən ötrü mütləq nümunələrə ehtiyacı var. Bəşəriyyət üçün örnək yaradan nümunələr olmayanda yanlış işlər insanın taleyini yanlış istiqamətlərə yönəldəcək. Beləcə, mənalı işlərə sərf etmək, dünyanı gözəlləşdirmək, yaddaşlarda yaxşı biri kimi daim xatırlanmaq üçün əta olunmuş ömür boşuna xərclənəcək. İnsanın gözləri önündə parlaq örnəklər olanda isə o, həyatın dəyərini anlayacaq, mənasını dərk edəcək, ömrü bir-birini izləyən yeknəsək günlərə deyil, bəşəriyyətin bu günü və gələcəyi naminə böyük bir missiyaya çevirəcək.

Azərbaycan Respublikasının Birinci vitse-prezidenti, Heydər Əliyev Fondunun rəhbəri, UNESKO və ICESCO-nun xoşməramlı səfiri Mehriban xanım Əliyevanın müasir tariximizdə çox yüksək xidmətləri var. Onun təşəbbüsü, rəhbərliyi ilə görülmüş, indi də görülməkdə olan işlərin hər biri böyük tarixi salnamədir. Bununla belə əgər əhəmiyyətinə görə sıralasaq, zənnimizcə, bütün bu işlərin ön sırasında Mehriban xanım Əliyevanın öz şəxsiyyəti ilə müasir dünyanın insanları üçün yaratdığı əsl insanlıq nümunəsi gələcək. Belə bir şəxsiyyət nümunəsi cəmiyyəti formalaşdırmaq, onu ali dəyərlər işığında bir araya gətirmək üçün çox önəmlidir.

Mehriban Əliyeva öz varlığı ilə hər bir vətəndaşımız, ümumilikdə bütün dünya azərbaycanlıları üçün bu örnəyi yaradır. Həm ayrı-ayrı fərdlər, həm də ümumilikdə xalq olaraq tarixdə hər zaman yüksəlmək, davamlı nailiyyətlər qazanmaq üçün düzgün yolu, əsl dəyərləri göstərir. Bu mənada Mehriban xanımın irəli sürdüyü, həyata keçirdiyi təşəbbüslərin hər biri təkcə müxtəlif sahələrdə inkişaf nailiyyətləri yaradan, minlərlə insanın həyatını yaxşılaşdıran, sosial rifahına xidmət edən layihələr deyil. Bunlar həm də ayrılıqda fərdlərə, ümumən isə cəmiyyətə ötürülən mesajlardır. Bu amallara tapınmağın əhəmiyyətini hər birimizə anlatmaqdır.

Mehriban xanım Əliyeva öz ictimai missiyasını yerinə yetirməyə hələ 90-cı illərin ortalarında Azərbaycan Mədəniyyətinin Dostları Fondunu yaratmaqla başladı, milli mədəniyyətimizə üz tutdu. Mədəniyyət dünyanın başlanğıcıdır, xalqın ruhudur, keçmişlə bu gün, bu günlə gələcək arasında maddi-mənəvi bağdır. Nəsillərdən-nəsillərə ötürülən əmanətdir. Mədəniyyət xalqların tarix boyu əldə etdikləri nailiyyətlərin qorunduğu xəzinədir. Dövlətlərin əldə etdiyi ən böyük nailiyyətlər də zaman keçdikcə mədəniyyət faktına çevrilir. Başqa yeni uğurlara transformasiya olunub, öz mövcudluğunu bu dəfə də xalqın mədəniyyət xəzinəsində qoruyub saxlayır. Mehriban xanım Əliyevanın himayəsinə götürdüyü, inkişafına dəstək olduğu, bütün dünyada təbliğ etdiyi Azərbaycan mədəniyyəti nümunələri bizim ən qiymətli sərvətimizdir.

Mehriban xanımın aktuallaşdırdığı dəyərlər isə bizi yenidən özümüzə, kimliyimizə, insan olaraq daşıdığımız mənəvi keyfiyyətlərə qaytarır. Göstərir ki, insan biganəlik hissini özünə yaxın buraxmamalıdır. Dünyada özgə dərdi deyilən bir anlayış yoxdur. Əgər Yer üzünün hansısa məkanında əzab çəkən, köməyə ehtiyacı olan biri varsa, bu əzabdan dünyadakı bütün insanlara pay düşür. Əsrlərdir bizimlə yol gələn, xeyirxahlığın, şəfqətin, qarşılıqlı köməyin, paylaşmaq, yardımlaşmaq hissinin köməyi ilə dünyada əzab çəkən, öz dərdləri ilə təkbaşına qalan, özünü tənha, çarəsiz və ümidsiz hiss edən insanlara həyan ola bilərik. Onda dünyamız yaşamaq üçün daha gözəl olar.

Ulu Öndər Heydər Əliyevin ideyaları işığında yaradılmış Heydər Əliyev Fondunun fəaliyyəti də bu prinsip üzərində bərqərardır. 2004-cü ildə yaradılmış bu fond illərdir ki, insanların ümid qapısına, pənah ünvanına çevrilib. Mehriban xanım Əliyevanın rəhbərlik etdiyi fond əli hər yerdən üzülmüş insanlara bacardığı köməyi göstərir. Onların problemlərinin həlli, müşküllərinə çarə tapılması üçün mümkün olanları edir. Bu fondun insanlara verdiyi ən böyük dəstək isə onların qəlbində yandırdığı ümid çırağıdır. İnsan ümidini itirməyəndə isə geridə buraxa bilməyəcəyi heç bir çətinlik qalmır.

Ölkəmizin Birinci vitse-prezidenti kimi Mehriban Əliyeva köməyə ehtiyacı olan insanların yanındadır. Onların ümididir, köməyidir, müşkülləri aradan qalxmış vətəndaşların məmnuniyyətidir, dövlətimizə getdikcə artan inam və dəstəyidir.

Mehriban xanım Əliyevanın fəaliyyətində təhsil məsələləri xüsusi yer tutur. Azərbaycan Prezidenti İlham Əliyevin həyata keçirdiyi təhsil islahatlarına, təhsilimizin inkişafı yönündə həyata keçirilən tədbirlərə Mehriban xanım Əliyeva fəal dəstək verir. Bu da təsadüfi deyil. Çin müdriklərindən Konfutsi deyirdi ki, insanlara balıq verməkdənsə, balıqçı toru bağışlayın və onlara balıq tutmağı öyrədin. Müasir dünyamızda da insanın inkişafının əsas vasitəsi məhz təhsildir. İnsan yalnız təhsil sahəsində öz dəyərini artıra, zəruri bilik və bacarıqlara yiyələnməklə əmək bazarı üçün faydalı ola, firavan həyatını təmin edə bilər. Bunun başqa bir alternativi yoxdur.

Bu təhsil layihələri isə, ilk növbədə, təhsilə münasibəti dəyişir. Hər bir vətəndaşımıza anladır ki, müasir dünyada yüksək təhsilli olmaq həyati zərurətdir. Dövlət bununla bağlı üzərinə düşən hər bir addımı atır. Bu addımları dəyərləndirmək isə artıq həm də vətəndaş məsuliyyəti məsələsidir. Sevindiricidir ki, Mehriban xanımın təşəbbüsü ilə inşa edilmiş yüzlərlə məktəbin xoş bəhrələrini gənc nəslin təhsil nailiyyətlərində, dövrün yeni bilik və bacarıqlarına getdikcə artan marağında görüb müşahidə edə bilirik.

Mehriban xanım idmana, ətraf mühitə göstərdiyi diqqətlə insanlarımızın sağlamlığı qayğısına qalır. Eyni zamanda bütün dünyada bərqərar olmasına fədakar əmək sərf etdiyi sülh, tolerantlıq, mədəniyyətlərarası dialoq ideyaları ilə insanların mənəvi dünyasının qorunmasına dəyərli töhfələr verməyə çalışır.

O, mahir təşkilatçıdır, mükəmməl menecerdir, dövlətçilik ideyalarına sadiq vətəndaşdır, nəcib əməlləri ilə insanların rəğbətini qazanmış əsl şəxsiyyətdir. Mehriban xanım Əliyeva Azərbaycan Prezidentinin ölkəmizin inkişafı üçün qarşıya qoyduğu strateji hədəflərin əldə olunmasına böyük töhfələr verir. Bu siyasətə xidməti, dövlətimiz və xalqımız üçün yaratdığı faydalarla qürur duyur.
Belə şəxsiyyətlərimizin varlığı bizim də qürur mənbəyimizdir.

Şimal-qərb bölgəsinə sərnişin qatarı nə zaman gələcək? - FOTO