FLAŞ
» » Laçında açılan hava limanı bölgədə nələri dəyişəcək? - AÇIQLAMA

Laçında açılan hava limanı bölgədə nələri dəyişəcək? - AÇIQLAMA


Xəbər verdiyimiz kimi, avqustun 16-da Azərbaycan Respublikasının Prezidenti İlham Əliyev və birinci xanım Mehriban Əliyeva Kəlbəcər və Laçın rayonlarında olublar. Səfər çərçivəsində dövlətimizin başçısı Kəlbəcər-Laçın avtomobil yolu üzərində inşa olunacaq tunelin və Laçın Beynəlxalq Hava Limanının təməlini qoyub. Laçın Beynəlxalq Hava Limanı bölgədə nələri dəyişəcək?

Bununla bağlı Sonxeber.az-a danışan deputat Nəsib Məhəməliyev bildirib ki, Prezident İlham Əliyevin və Birinci vitse-prezident Mehriban Əliyevanın təməlqoyma mərasimində iştirak etdikləri Laçın Beynəlxalq Hava Limanının əhəmiyyəti olduqca böyükdür:

"Bununla, ilk növbədə, Laçın, Kəlbəcər, Şuşa və ətraf ərazilərdə yerləşən yaşayış məntəqələrinin nəqliyyat problemi öz həllini tapır. İkincisi, Laçın Beynəlxalq Hava Limanının tikintisi bölgədə turizm sektorunun inkişafına ciddi təkan verəcək. Uçuş-enmə zolağının 3 kilometr olması, yerüstü qurğuların və bütün növ təyyarələrin enmə imkanlarının nəzərdə tutulması limanın beynəlxalq statusunu artıracaq və xarici ölkələrdən sərnişin axınını təmin edəcək.

Laçın, Kəlbəcər və Şuşanın turizm, eyni zamanda sanator-müalicə sahəsi üçün termal suların məskəni olduğunu nəzərə aldıqda, hava limanının əhəmiyyəti qabarıq şəkildə görünür.

Ən əsas məsələlərdən biri də, təbii olaraq, Laçın Beynəlxalq Hava Limanının hərbi təyinatı ilə bağlıdır. Hərbi təyinatlı yüklərin, ümumiyyətlə, mülki yüklərin təyinatı üzrə operativ şəkildə çatdırılması hava limanının əhəmiyyətini daha da artırır. Qeyd etmək yerinə düşər ki, işğaldan azad olunan ərazilərdə 3 beynəlxalq hava limanı tikiləcək və onların hər biri o bölgənin sosial-iqtisadi inkişafında əhəmiyyətli rol oynayacaq".

Aysel Yusifqızı

DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı [email protected] e-mail adresinə göndərin

"İran ancaq Azərbaycana tonlarla narkotik, beyni yuyulmuş gənclər göndərib ki ..."-Nəsib Məhəməliyev - VİDEO


Şərh yaz

Şərh yaz

yenilə, əgər kod görünmürsə