“Bu, İranın Xarici işlər naziri Məhəmməd Cavad Zərifin Azərbaycana üçüncü səfəridir. Birinci səfərdən sonra regionda baş verən proseslər İranı regionda müsbət qonşu kimi xarakterizə etməmişdi. Yaxın zamanlarda İranda prezident seçkiləri olacaq. Yəqin ki, Cavad Zərif bundan sonra Xarici işlər naziri vəzifəsini icra etməyəcək. Bu səfər bir növ vida xarakterli bir səfərdir. Eyni zamanda, bəzi məsələlərə aydınlıq gətirmək üçündür. Azərbayucan hər zaman İrana qarşı səmimi münasibət göstərib. İran əleyhinə olan heç bir beynəlxalq layihədə iştirak etməyib. Çox təssüf ki, biz İrandan buna adekvat cavab görməmişik”. 
“Azərbaycan tərəfi Rəşt-Astara dəmir yolunu da maliyyələşdirib. Azərbaycan bütün mümkün vasitələrdən istifadə edərək İranla dostluq münasibətlərini qoruyub-saxlayıb. Ancaq İran tərəfdən bunu görmürük. Bu münasibətlərin daha da yaxşılaşdırılması, xalqlarımız arasındakı etimad məsələlərinin daha da inkişafı indi daha çox İran tərəfindən asılıdır. İran böyük dövlətdir. Orada bizim 30 milyon soydaşımız yaşayır. Bir sıra məsələlər var ki, İran həmin məqamlarda addımlar atmalıdır, maneələr yaratmamalıdır. Təcavüzkara şərait yaratmamalıdır, ona hərbi dəstək verməməlidir. Ermənistanın ordu quruculuğunda iştirak etməməlidir. Bütün bunlar islam dövlətinə yaraşmır. Biz diplomatik münasibətləri ən yüksək səviyyədə qoruyuruq. Qonşuluq münasibətlərinə sadiqik. Yenə deyirəm, bizim dostluq addımlarımıza qarşı İranın atdığı addımlar adekvat deyil”. 

Deputatın fikrincə, Zəngəzur dəhlizi, İranın yük maşınlarının Dağlıq Qarabağ ərazisinə getməsi, yüklər daşıması İran rəsmilərinin nazirlər və qanunverici orqan səviyyəsində Ermənistana dəstəyi açıq şəkildə Azərbaycanı təhdid edən bəyanatları Bakı ilə Tehran arasındakı qonşuluq münasibətlərinə mənfi təsirlər yaradırdı:

“Azərbaycanın İrana qarşı müsbət münasibətləri təssüf ki, cənub qonşumuz tərəfindən kifayət qədər adekvat qarşılanmır. Azərbaycan xalqı tərəfindən də bu təəssüflə qarşılanır. Bu da anlaşılandır. İran yaxşı bilir ki, regionda destruktiv qüvvə Ermənistandır. Son 30 ildə Ermənistanın Azərbaycana qarşı hansı soyqırımı siyasətlərini həyata keçirdiyini də yaxşı bilir. Ermənilər Azərbaycanın tarixinə, mədəni və dini abidələrinə qarşı vandallıqlar ediblər. Aydındır məsələdir ki, İran İslam Respublikasıdır, amma islam mədəniyyətinə qarşı təhqiredici hərəkətlərə yol verən, məscidlərimizdə donuz saxlayan ermənilərə qarşı bu həcmdə dəstək vermək cənub qonşumuzun səmimiyyətini şübhə altına alır. Çox təssüf ki, Bakı ilə Tehran arasındakı iqtisadi məsələləri də ləngidən məhz İran tərəfi olub”.