» » “Azərbayan-Türkiyə birgə təlimləri həyati əhəmiyyətə malikdir” – MÜSAHİBƏ!

“Azərbayan-Türkiyə birgə təlimləri həyati əhəmiyyətə malikdir” – MÜSAHİBƏ!


Nəsib Məhəməliyev: “Vətən Müharibəsi göstərdi ki, gənclərimiz dövlət, torpaq, vətən və namus üçün həyatlarını qurban verməyə hazırdırlar”

“Bakı Anadolu Türk Liseyinin təşəbbüsünü alqışlayır, digər məktəbləri də bu təşəbbüsə qoşulmağa çağırıram”

“Xarici jurnalistlərin işğaldan azad edilmiş torpaqlarımıza mütəmadi səfərlərinin təşkili, erməni faşizminin ifşası baxımından faydalı olar”


Vətən müharibəsində qalib gələn, erməni işğalındakı torpaqları azad edən ölkəmizin qarşısında yeni vəzifələrin, məqsəd və hədəflərin durduğu məlumdur.

Moderator.az olaraq millət vəkili Nəsib Məhəməliyevlə söhbətimizdə, bugünün aktual məsələləri ilə yanaşı, gələcəyə yönəlik bəzi məqamları da müzakirə etməyə çalışdıq.

-Nəsib müəllim, Azərbaycan və Türkiyə arasında birgə hərbi təlimlərin keçirilməsi prosesi davam edir. Bugünlərdə Hərbi hava Qüvvələrimizin 77 hərbçisi Türkiyədə “Bayraktar TB2 silahsız pilotsuz təyyarələrin (SİHA) operatoru” təlimini uğurla başa vuraraq sertifikatla təltif edildi. Sizcə Türkiyə ilə birgə əməkdaşlıq Azərbaycan üçün nə dərəcədə önəmldir?

-Müasir geosiyasi reallıqları nəzərə alaraq, regionda baş verən prosesləri təhlil etsək görərik ki, Türkiyə ilə Azərbaycanın birgə hərbi təlimləri həyati vacib məsələlərdən biridir. Son müharibə də göstərdi ki, Türkiyə kimi qüdrətli dövlətin Azərbaycana verdiyi mənəvi-siyasi dəstək bizim üçün son dərəcə əhəmiyyətli oldu.

Türkiyə regionda və ümumiyyətlə dünyada ədalətli siyasət aparır. Harada Türkiyə varsa, orada ədalət var. Bizim bölgədə Türkiyə həm də balanslaşdırıcı rol oynayır. Nəzərə alsaq ki, dünyada böyük güclər, bir sıra beynəlxalq təşkilatlar tərəfindən ikili standartlara əsaslanan siaysət yürüdülür, bir çox dövlətlərin siyasətində islamofobiya, turkəfobiya elmentləri mövcuddur. Ayrı-ayrı ölkələrə qarşı, onların milli, dini mənsubiyyətini əsas götrərək sosial ədalət prinsiplərini  pozan siaysət həyata keçirirlər. Bu baxımdan, Türkiyə və Azərbaycan hərbçilərinin birgə təlimlərini olduqca vacib hesab edirəm. Düşünürəm ki, gələcəkdə bu cür təlimlərin daha intensiv keçirilməsi, təhlükəsizlik baxımından daha faydalı olar. 

77 hərbçimizin pilotsuz təyyarələrin operatoru təlimində iştirak etməsi, bu sahə üzrə bilik və bacarığını artırması da  müasir dünyanın tələbidir. 44 günlük Vətən Müharibəsində Azərbaycan şərəfli bir tarix yazdı. Azərbaycan ordusunun keçirdiyi hər bir əməliyyat dünya hərb tarixinə qızıl hərflərlə yazılacaq əməliyyatlardır. Təsadüfi deyil ki, dünyanın bir çox ölkələri tərəfindən Azərbaycan ordusunun Vətən müharibəsindəki hərbi əməliyyatları öyrənilir, təhlil edilir.

Vətən müharibəsinin timsalında bu vaxta qədər aparılan ənənəvi müharibə taktikasından imtina edərək güclü, bahalı silahlara qarşı, qiyməti daha ucuz olan ən müasir texnologiyaları özündə əks etdirən silahların effektini bütün dünya gördü. 30 il ərzində müxtəlif yalanlarla yaradılmış “məğlubedilməz erməni ordusu” mifini mürəkkəb ərazi relyefi şəraitində, qısa zaman kəsiyində Azərbaycan ordusu darmadağın etdi. Bu müharibədə pilotsuz uçuş aparatlarının əhəmiyyəti özünü qabarıq şəkildə göstərdi. Bunun əlavə isbata ehtiyacı yoxdur. Gələcək bu silahlarındır.

-Artıq torpaqlarımız işğaldan azad edilib və Azərbaycan düşmən üzərində parlaq qələbə çalıb. Sizcə artıq bundan sonra hərbə ayrılan vəsaitin bir hissəsini sosial-iqtisadi layihələrə sərf etmək oalrmı?

-Belə bir deyim var: “Sülh istəyrisənsə, müharibəyə hazır olmalısan”. Biz Ermənistan daxilindəki bir çox qüvvələrin, xaricdəki erməni diasporunun revanşizm ruhunda apardığı təbliğatı əsas tutaraq hər zaman müharibəyə hazır olmalıyıq.

Heç bir ölkə istəməz ki, sülh şəraitində çoxmilyardlı vəsaiti silahlanmaya, ordunun saxlanılmasına sərf etsin. Bunun əvəzində çoxsaylı sosial layihələr icra oluna bilər, iqtisadi, mədəni layihələr gerçəkləşdirilə bilər. Lakin çox təəssüflər olsun ki, bizim taleyimizə erməni kimi mənfur xislətə, çirkin niyyətlərə, özündən başqa digər millətləri qəbul etməyən bir toplumla qonşu olmaq yazılıb. Buna görə də hər zaman müharibəyə hazır olmalı, ordumuzun gücünü qoruyub saxlamalıyıq.

-Bakı Türk Anadolu Liseyi Qarabağ zəfəri, Vətən müharibəsi ilə bağlı orta məktəblərin yuxarı sinifləri üçün müsabiqə elan edib. Bu cür müsabiqələrin təşkili Vətən Müharibəsi ilə bağlı həqiqətlərin təbliği, qəhrəmanlarımızın tanıdılması, vətənpərvərlik ruhunun təbliği baxımından necə qiymətləndirirsiniz?

-Mən bu cür müsabiqələrin keçirilməsini müsbət qarşılayıram. Xatırladım ki, torpaqlarımz işğal altında olanda xalqımız özünə qarşı daim tənqidi yanaşırdı. Bəzən gənclər arasında vətənprəvərliyin aşağı səviyyədə olması ilə bağlı bəzi fikirlər səslənirdi. Bildiriliridi ki, kifayət qədər vətənprəvərlik təbliğatı aparılmır və s. Ancaq Vətən Müharibəsi göstərdi ki, Azərbaycanın gənc nəsli bəlkə də əvvəlki nəsillərdən daha vətənpərvərdir. Onlar dövlət üçün, torpaq üçün, vətən üçün, namus üçün öz həyatnı qurban verməyə hazırdırlar. Bu da bilavasitə dövlətimizin  uzun illər gənclər arasında apardığı vətənprəvərlik təbliğatının nəticəsidir.

Bakı Anadolu Türk Liseyinin təşəbbüsü ilə belə bir müsabiqənin keçirilməsi təqdirə layiqdir. Hesab edirəm ki, Azərbaycandakı digər məktəblər də bu təşəbbüsə qoşulmalıdır. Hər bir şəhidimizin döyüş yolu, həyatı öyrənilməlidir. Ayrı-ayrı rayonlarda, kəndlərdə şəhidlərimiz, qəhrəmanlarımız ictimaiyyətə daha yaxından tanıdılmalıdır. Onların şərəfli həyat yolu gənclərimizə nümunə kimi göstəriməli, təbliğ ediməldir. Bu işin davamlı şəkildə həyata keçiriməsi həm də bizim tarixmizə, keçmişimizə , şəhidlərimizin ruhuna hörmətimiz, ehtiramımız olar.

Vətən Müharibəsi göstərdi ki, sadəcə güclü ordunun müasir silahlarla təchiz edilməsi zəfər üçün kifayət deyil. Vətəni qorumaq, düşmənin üzərində qələbə çalmaq üçün millətin vahid bir yumruq kimi birləşməsi, vahid ideologiya ətrafında bir araya gəlməsi, ölkə başçısının ətrafında birləşməsi olduqca vacibdir. Məhz, bu birlik Azərbaycan xalqını qələbəyə apardı.

-Nəsib müəllim, bugünlərdə prezidentin köməkçisi Hikmət Hacıyevin rəhbərliyi altında ölkəmizdə fəaliyyət göstərən diplomatik korpusların nümayəndələrinin işğaldan azad edilmiş ərazilərə səfəri təşkil edildi. Erməni faşizminin ifşası baxımından bu cür səfərlərin önəmini necə dəyərləndirirsiniz və sizcə gələcəkdə işğaldan azad edilmiş digər ərazilərimizə, o cümlədən Şuşaya bu cür səfərlərin təşkili faydalı ola bilərmi?

-Bu cür səfərlər olduqca zəruri və faydalı tədbirlərdir. Mən bunu alqışlayıram. Onu da qeyd edim ki, bu, işğaldan azad edilmiş torpaqlara edilən ilk səfər deyil. Hörmətli Hikmət Hacıyevin rəhbərliyi altında bir neçə rayona bu cür səfərlər təşkil edilib. Bu səfərlərin müsbət nəticələri danılmazdır. Gələcəkdə işğaldan azad edilmiş digər rayonlarımıza da bu cür səfərlərin təşkili vacibdir.

Əlavə olaraq təklif edərdim ki, dünyanın aparıcı dövlətlərinin KİV-lərinin, xəbər agentliklərinin, televiziyalarının nümayəndələri dövlətimiz tərəfindən Azərbaycana dəvət olunsun və onların da işğaldan azad edilən ərazilərə səfərləri təşkil edilsin. Qoy bu səfərlər əsnasında onlar 30 ilə yaxın müddət ərzində ermənilər tərəfindən dağıdılan tarixi, mədəni, dini abidələrə, qəbiristanlıqlara, məhv edilən inzibati binalara, təbiətə və ekologiyaya tutulan divana öz gözləri ilə görsünlər.

Bildiyiniz kimi, ermənilər işğal müddətində 55 min hektara yaxın meşə sahəsini məhv edib. Yeraltı və yerüstü sərvətlərin vəhşicəsinə qanunsuz istifadəsi həyata keçirilib. Ermənilər nəinki İslam dininə məxsus ibadət yerlərini, məscidləri, həm də provaslav kilsələrini, sinaqoqları yerlə-yeksan ediblər. Bu faktlar əyani şəkildə dünyaya göstərilməli, erməni vandallarının vəhşiliyini dünya ictimaiyyəti real şəkildə görməlidir.

Təbii ki, bir neçə ildən sonra biz bu torpaqlarda bərpa edilmiş yeni, “ağıllı şəhər”lərin, “ağıllı kəndlər”in, ekoloji “yaşıl zonalar”ın mövcudluğuna şahid olacağıq. Dünya hər iki millətin özünün və digər millətlərin tarixinə, mədəniyyətinə, ətraf mühitə olan münasibətini görməlidir. Özlərini qədim, mədəni millət kimi təqdim etməyə çalışan ermənilərin hansı vəhşiliklərə imza atdığı da, Azərbaycan xalqının zəngin mədəni və mənəvi dəyərlərə malik olduğu da müqayisəli şəkildə beynəlxalq ictiamiyyətin diqqətinə çatdırılmalıdır. Bu baxımdan, xarici jurnalistlərin işğaldan azad edilmiş bölgələrə intensiv səfərlərinin təşkili olduqca faydalı olar.

DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı [email protected] e-mail adresinə göndərin

Şah və mat


Şərh yaz

Şərh yaz

yenilə, əgər kod görünmürsə