“Azərbaycan Prezidenti İlham Əliyev tərəfindən xüsusi nümayəndəlik institutunun yaradılması mühüm hadisədir”. Bu fikri SİA-ya Milli Məclisin deputatı Nəsib Məhəməliyev deyib.

Nəsib Məhəməliyev bildirib ki, yeni təsisat erməni işğalından azad olunmuş ərazilərin bərpası, bu torpaqlarda məskunlaşmanın aparılması, kommunikasiya və infrastruktur layihələrinin icrası baxımından çox önəmlidir. İndiki şəraitdə Şuşaya və gələcəkdə işğaldan azad edilmiş digər rayonlara xüsusi nümayəndənin təyin olunması qarşıya qoyulan məsələlərin daha çevik və keyfiyyətli şəkildə həllinə töhfə verəcək.

Millət vəkilinin sözlərinə görə, artıq dövlətimizin başçısı tərəfindən Şuşaya təyin olunmuş xüsusi nümayəndəyə müvafiq tövsiyə və tapşırıqlar verilib. Bunlar ilk növbədə Şuşa şəhərinin yenidən qurulması, bərpası, mədəniyyətin, tarixi irsimizin qorunub saxlanması, yeni tikiləcək binaların müasir dünya standartlarına uyğun olmasıdır. Burada ölkə başçısının strategiyası ondan ibarətdir ki, Şuşa və işğal altında olmuş digər rayonlar “ağıllı şəhər”, “ağıllı kəndlər” prisipi ilə tikilməlidir.

“Həyata keçirilən və nəzərdə tutulan quruculuq işləri dünya miqyasında azərbaycanlıların bir xalq olaraq ekologiyaya, ətraf mühitə, bəşəriyyətə verdiyi töhfələrin nədən ibarət olduğunu real şəkildə göstərəcək. 30 illik işğal dövründə ermənilər bu əraziləri tamamilə dağıdıb, viran qoyublar. Amma dövlətimiz tərəfindən bütün ərazilər yüksək səviyyədə bərpa ediləcək”, -deyə N.Məhəməliyev vurğulayıb.