Beləliklə Prezidentin bu təyinatından sonra ortaya iki sual çıxır. Prezidentin Şuşaya xüsusi nümayəndəsinin təyin olunması yeni idarəetmə modeli kimi dəyərləndirmək olarmı və yaxın gələcəkdə İcra hakimiyyətlərinin ləğv edilməsi mümkündürmü?

Şuşa şəhərinə xüsusi nümayəndənin təyin etməsi Azərbaycan tarixində yeni haldır

Millət vəkili Nəsib Məhəmməliyev isə əməkdaşımıza bildirib ki, Prezidentin Şuşa şəhərinə xüsusi nümayəndə təyin etməsi Azərbaycan tarixində yeni haldır və idarəetmə sistemində aparılan islahat, təkmilləşmə kimi qəbul edilməlidir: ” Bu yeni institutdur və ölkə Başçısı Şuşanın bərpası ilə bağlı yeni təyin olunan nümayəndənin qarşısında konkret vəzifələri müəyyənləşdirdi, tapşırıqlarını verdi. Hesab edirəm ki, bu təyinat ən qısa zamanda, tapşırıqların operativ, keyfiyyətlə yerinə yetirilməsini təmin edəcəkdir. Bu sistem işğal altında olan ərazilərdə infrastruktur layihələrinin, sosial obyektlərin tikintisini, məskunlaşdırmanı sürətləndirəcək və bunu müsbət addım kimi qiymətləndirirəm”.

Millət vəkili İcra hakimiyyətlərinin yaxın illərdə ləğv olunması məsələsinə də münasibət bildirdi. Onun fikrincə bu barədə hələlik konkret nəsə deyə bilmərəm: ”Ancaq, hesab edirəm ki, yerli icra hakimiyyətləri haqqında əsasnamə yenidən işlənməlidir. Xüsusi nümayəndələrin digər rayonlara təyin olunması, prinsip etibari ilə mümkündür. Ancaq düşünürəm ki, struktur islahatlarının davam etdirilməsi daha effektiv olardı. Bərpa zonasından fərqli olaraq, digər regionlarda icra başçısının və yaxud xüsusi nümayəndənin vəzifəsi siyasi rəhbərliklə məhdudlaşmalıdır. Kommunal-təsərrüfat xarakterli məsələlərlə bələdiyyələr məşğul olmalıdır”.