FLAŞ
» » Prezident İlham Əliyev xalqın qəlbində artıq qəhrəmandır - ŞƏRH

Prezident İlham Əliyev xalqın qəlbində artıq qəhrəmandır - ŞƏRH


“2020 Azərbaycan üçün olduqca uğurlu il kimi tarixə düşdü. İlk növbədə ona görə ki, son 30 ildə Azərbaycan xalqının ürək yarası olan Dağlıq Qarabağ münaqişəsi həll olundu. Regionda bir çox dünya güclərinin geosiyasi maraqları olduğundan olduqca mürəkkəb bir problem idi. Cənab Prezident, Ali Baş Komandan İlham Əliyevin daxili və xarici siyasəti, regional situasiyanı düzgün qiymətləndirmə bacarığı və uzlaşdırması mürəkkəb problemin həllini təmin etmiş oldu. Eyni zamanda ilin əvvəlindən dünyanı narahat edən pandemiya ilə mübarizədə də Azərbaycan bir çox dünya ölkələrinə nümunə ola bildi”.

Bu sözləri Publika.az-a açıqlamasında millət vəkili Nəsib Məhəməliyev deyib. O bildirib ki, Azərbaycan Ermənistanla müharibədə möhtəşəm qələbə qazandı, bu qələbənin memarı və bilavasitə təşkilatçısı Azərbaycan Respublikasının Prezidenti İlham Əliyev və onun ətrafında sıx birləşmiş Azərbaycan xalqıdır:

“Çinin Uhan şəhərində meydana gələn COVID-19 infeksiyası qısa zamanda bütün ölkələri əhatə etdi. Pandemiya ilə başlayan il dünya ölkələri arasında və beynəlxalq münasibətlər sistemində durğunluq yaratmışdı. Bu münasibətlərə təkan verən qüvvəyə çox böyük ehtiyac vardı. Belə olan halda Azərbaycan Respublikasının Prezidenti Türkdilli Dövlətlərin Əməkdaşlıq Şurasının iclasını onlayn rejimdə keçirdi. Buraya Ümumdünya Səhiyyə Təşkilatının Baş direktoru və aidiyyəti qurumların rəhbərləri də cəlb olunmuşdu. Azərbaycan koronavirus əleyhinə lazım olan texniki avadanlıqların gətirilməsində, laboratoriyaların yaradılmasında, qoruyucu maskaların istehsalında, dezinfeksiyaedici məhsulların və məhlulların gətirilməsi və istehsalının təşkil olunmasında, eləcə də virusla mübarizədə maarifləndirmə sahəsində öz töhfələrini verdi.

İlham Əliyev dünyanın 120 ölkəsini təmsil edən Qoşulmama Hərəkatının sədri kimi bu hərəkatın 40 dövlətdən ibarət təmas qrupunun, eləcə də digər bir çox beynəlxalq təşkilatların rəhbərlərini, Avropa İttifaqının və Afrika İttifaqı Komissiyasının nümayəndələrini, həmçinin ÜST-nin Baş direktorunu və BMT-nin Baş katibini bir yerə cəlb etməklə genişmiqyaslı onlayn konfrans həyata keçirdi. Burada ÜST-nin rəhbəri Tedros Adhanom Qebreyesus Azərbaycan Respublikasının Prezidentinə xüsusi təşəkkürünü bildirmişdi.

Müharibə ərəfəsində bəzi qüvvələr Azərbaycanın əleyhinə BMT Təhlükəsizlik Şurasında qətnamənin qəbul olunmasına çalışırdı. Məhz Qoşulmama Hərəkatının üzvü olan ölkələrin qəti mövqeyi və Azərbaycanın mənafelərini müdafiə etməsi cənab Prezidentin bu sahədə apardığı siyasətin birbaşa qələbəsidir. Böyük dövlətlər tərəfindən Qoşulmama Hərəkatının daimi üzvlərinə qarşı çox ciddi tədbirlər olmasına baxmayaraq, cənab Prezidentin nüfuzu və onun digər ölkələrin qarşısında etdiyi xidmətlərinə görə qətnamələr qəbul olunmadı. Odur ki, bu gün beynəlxalq birlik Azərbaycanın mövqeyini dəstəkləyir. Bu, real olaraq müharibə dövründə Azərbaycana göstərilmiş etimad idi.

Sonrakı proseslərdə Prezidentin BMT-nin koronavirusla mübarizədə xüsusi sessiyasının keçirilməsi barədə təşəbbüsü dünyanın 150 ölkəsi tərəfindən qəbul olundu. Bu, Azərbaycan kimi ölkələr üçün görünməmiş bir nəticə idi. 200-ə yaxın ölkəni özündə cəmləşdirən BMT-nin 150 ölkəsinin Azərbaycan Prezidentinin təşəbbüsünü müsbət qarşılaması möhtəşəm qələbə idi. Azərbaycanın bir dövlət olaraq qlobal dəyərlərə və bəşəri problemlərin həllinə verdiyi töhfə idi. Bütün bunlar təbii ki, Azərbaycan dövlətinin beynəlxalq nüfuzunun artmasını təmin etmiş oldu”.


Nəsib Məhəməliyev qeyd edib ki, bütün görülən işlərin nəticəsi olaraq bu gün Azərbaycan qalib ölkədir:

“Azərbaycan xalqı qalib xalqdır, Azərbaycan Prezidenti dünyada qalib prezident kimi təqdim olunur. Azərbaycanın həm iqtisadiyyatda, həm pandemiya ilə mübarizədə, həm də müharibədə əldə etdiyi uğurlar və təcrübələr bu gün dünyanın əksər ölkələri tərəfindən nümunə olaraq qəbul edilir və öyrənilir. Azərbaycan 21-ci əsrdə öz torpaqlarını işğaldan azad etmiş yeganə ölkədir. Azərbaycan 21-ci əsrin silahlarını, yüksək texnologiyalarını tətbiq etməklə müharibədən maksimum az itkilərdə çıxmış güclü və müasir dövlətdir. Dünya bugünkü Azərbaycanı artıq belə tanıyır. Dünyanın hansı ölkəsində yaşamasından asılı olmayaraq Azərbaycan xalqı öz tarixi vətəni və dövləti ilə fəxr edir. Təbii ki, dövlətin əldə etdiyi nəticələr onun aparıcı qüvvəsi olan Prezidentin xidmətləridir”.

Millət vəkili vurğulayıb ki, Prezident İlham Əliyevə Milli Qəhrəman adının verilməsi ilə bağlı təşəbbüslərin reallaşması tarixi hadisə olardı:

“Belə bir təşəbbüsü həyata keçirmək mümkündür və xalqın ürəyindən gələn bir səsdir. Mən də bu səsi dəstəkləyirəm. Əsas odur ki, Prezident İlham Əliyev xalqın qəlbində artıq qəhrəmandır. Azərbaycan xalqı da etiraf edir ki, 44 günlük müharibənin hər bir günü qəhrəmanlıq salnaməsi idi. Bu, Ali Baş Komandan olaraq həm Prezidentin, həm də hər bir Azərbaycan əsgərinin qəhrəmanlığı idi. Təbii ki, xalqın verdiyi qiymət hər şeydən üstündür. Bunu sadəcə formal olaraq rəsmiləşdirmək lazımdır. Cənab Prezident tarixin təkərini dəyişdi. Öz adını tarixin səhifələrinə qızıl hərflərlə yazdırdı. Bunu heç bir qüvvə inkar edə bilməz. Odur ki, xalqın səsinə səs vermək və rəsmiləşdirmək lazımdır. Azərbaycan Prezidenti həqiqətən əsl qəhrəmandır”.

DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı [email protected] e-mail adresinə göndərin





Azərbaycanda hərbi vəziyyət ləğv edilir


Şərh yaz

Şərh yaz

yenilə, əgər kod görünmürsə