“Azərbaycan Ordusu, onun Prezidenti, Ali Baş Komandanı qalibdir. Bundan sonra bütün beynəlxalq tədbirlərdə psixoloji üstünlüklər Azərbaycanın tərəfindədir və ölkəmizin populyarlığı, nüfuzu günü gündən artır. Hər bir azərbaycanlı bununla qürur duyur”.
Bunu Bizimyol.info-ya açıqlamasında Milli Məclisin deputatı Nəsib Məhəməliyev MDB Dövlət Başçıları Şurasının videokonfrans formatında keçirilən iclasında Azərbaycan Respublikasının Prezidenti İlham Əliyevin nitqini şərh edərkən bildirib.

Deputata qeyd edib ki, Prezidentin bu tədbirdə nitqi bütövlükdə müharibə mövzusuna həsr olunmuşdu və nitqini iki hissəyə bölmək olar: “Dövlət Başçısı birinci hissədə—ümumbəşəri problem, Covid-19 Pandemiyası ilə əlaqədar ölkəmizdə və beynəlxalq səviyyədə görülən işləri barədə məlumat verərək bildirdi ki, qısa zaman ərzində 10 yeni xəstəxana, 8 laboratoriya yaradıldı, Türkiyədən, Rusiyadan, İtaliyadan, Kubadan, Çindən həkimlər dəvət edildi. Koronovirusla mübarizəyə, həmçinin iqtisadi fəaliyyətsizlikdən əziyyət çəkən sahbkarlara dəymiş zərərin ödənilməsinə görə 2,5 milyard dollar vəsaitin xərcləndiyini, 30- dan çox ölkəyə yardım edildiyini, ÜST-a 10 milyon dollar ianə köçürüldüyünü bildirdi.

Vaksinasiya işləri ilə bağlı dünyanın aparıcı şirkətləri ilə danışıqların aparıldığını və gələn ilin əvvəlindən dövlət hesabına könüllülük prinsipləri əsasında əhalinin peyvəndləmə işlərinə başlanacaqdır.

Ölkə Başçısı nitqinin ikinci hissəsində Vətən müharibəsi, Müzəffər Azərbaycan Ordusunun cəmi 44 gün ərzində Ermənistan ordusunu darmadağın etdiyini, 28 il ərzində erməni rəhbərlərinin işğalçı, destruktiv fəaliyyətləri, dünya birliyini aldatmaları, işğal olunmuş əraziləri vəhşicəsinə dağıtdıqları, mədəni-tarixi abidələri yerlə yeksan etmələri, müharibə başlayan andan qadağan olunmuş ballistik raketlərlə, fosforlu bombalarla cəbhə bölgəsindən uzaqda yerləşən şəhərlərin atəşə tutulması, mülki əhalinin həlak olması barədə ətraflı məlumat verdi”.

Deputat bildirib ki, tədbirdə diqqət çəkən məqamlardan biri Ermənistan baş naziri Paşinyanın iclasda iştirak etməməsi idi: “90-cı illərin əvvəllərində Azərbaycanda yaranmış xaotik vəziyyətdən, siyasi qüvvələrin hərc-mərcliyindən, vəzifə davasından sui-istifadə edən ermənilər torpaqlarımızı işğal edərək, bu tipli beynəlxalq tədbirlərdə özlərini təkəbbürlü, “qalib” kimi aparırdılar. Bu baxımdan biabırçı məğlubiyyətdən sonra onların indiki vəziyyəti olduqca acınacaqlı görünür. Ancaq Prezident İlham Əliyev, qalib Ali Baş Komandan olmasına baxmayaraq, özünəməxsus təvazökarlıqla əsas cinayətkarların məhz keçmiş prezidentlər Koçaryan və Sarkisyan olduqlarını həmkarlarının diqqətinə çatdırdı. Dağıdılmış Ağdam və digər şəhərləri Xirosima ilə müqayisə edərək, ermənilərin necə bir vəhşi millət olduqlarını diplomatik şəkildə vurğuladı. Yekunda Qarabağ probleminin artıq tarixdə qaldığı, artıq bərpa işlərinə başlandığını və yeri gəlmişkən dost ölkələrini bu prosesdə iştiraka dəvət etdi. Bir məsələni də qeyd etmək istərdim. Uzun illər beynəlxalq tədbirlər və yaxud ikitərəfli danışıqlar prosesində cənab Prezident İlham Əliyevin, Koçaryan, Sarkisyan kimi cinayətkarlarla bir masa arxasında oturmasını müşahidə etmək, yumşaq desəm ağrılı idi. Daha sonra Paşinyan kimi küçə avantüristi də, hakimiyyətə gələn gündən primitiv, ziddiyyətli, provakativ bəyanatları ilə ermənilərin əsil simasını göstərdi. İlham Əliyev kimi dövlət adamının belə təsadüfi adamlarla eyni masada oturması belə bizim üçün ağrılı gəlirdi. Şükürlər olsun ki, ədalət zəfər çaldı. Bu gün düşmən ölkə çalxalanır. Dövlətçilikləri böyük təhlükə qarşısındadır. Dünya erməniliyinə elə bir zərbə vurulmuşdur ki, yaxın 10 illiklər ərzində çətin ki, yaraları sağalar”.