» » “Zəfər paradı dövlətçilik tariximizə qızıl hərflərlə yazıldı”

“Zəfər paradı dövlətçilik tariximizə qızıl hərflərlə yazıldı”


Nəsib Məhəməliyev: “Qalib ölkə, qalib xalq olmaq tam başqa hisslərdir”

Bu gün Azərbaycan ordusunun Vətən Müharibəsindəki tarixi qələbəsi ilə bağlı möhtəşəm parad keçirilib.

Maraqlıdır, bu parad Azərbaycan ordusunun gücünün, Azərbaycan dövlətinin iradəsinin bir daha bütün dünyaya nümayiş etdirilməsi kimi dəyərləndirilə bilərmi?

Moderator.az-a açıqlama verən millət vəkili Nəsib Məhəməliyev, bugünkü paradın tarixi əhəmiyyətinə diqqət çəkdi:

“Azərbaycan tarixində ilk dəfə hərbi parad 1919-cu ildə Cumhuriyyət ordusunun yaradılmasının 1 illiyi münasibətilə keçirilmişdir. Son üç parad isə, müstəqillik dövrünə təsadüf edir. Bu gün keçirilən Zəfər paradı milyonlarla azərbaycanlının uzun illər arzuladığı möhtəşəm tədbir kimi dövlətçilik tariximizə qızıl hərflərlə yazıldı. Bütün dünyanın gözü paytaxt Bakıya yönəlmişdir.

Qalib ölkə, qalib xalq olmaq tam başqa hisslərdir. Hər birimizin qəlbi qürur hissi ilə doludur. 2008 və 2018-ci illərdə keçirilmiş hərbi paradlarda nümayiş olunan texnika və silahlar, ordumuzun döyüş imkanlarını əyani şəkildə göstərirdi. Xalq öz ordusu ilə fəxr edirdi. Lakin qarşıda işğal altında olan torpaqlarımızın azad olunması kimi çətin, mürəkkəb bir vəzifə durduğuna görə natamamlıq hissi keçirirdik. İndiki Zəfər paradı formaca daha yığcam olmasına baxmayaraq, məzmunca əvvəlkilərdən fərqlənirdi. 101 il bundan əvvəl keçirilmiş paradda, Bakını erməni-daşnak, bolşevik qüvvələrindən azad etmiş Nuru paşanın komandanlığı altında Qafqaz islam ordusunun qəhrəman əsgərləri iştirak etmişdilər. Tarix təkrar olunur. Müzəffər Ali Baş Komandan İlham Əliyevin yanında müasir dünyanın ən güclü Liderlərindən biri kimi tanınmış, ən çətin anlarda öz qətiyyəti, prinsipiallığı ilə Azərbaycana dəstək verən qardaş Türkiyə dövlətinin Başçısı Rəcəb Tayyib Ərdoğanı görmək, sarsılmaz birliyin nümayişidir.

Vətən müharibəsi düşmənlərimizin və dostlarımızın kim olduğunu bir daha göstərdi. Türk komandolarının və ilk dəfə olaraq, döyüşlərdə sağlamlıqlarını itirmiş Qazilərimizin keçidi sevinc hisslərini göz yaşlarına qatmaqla hər kəsi kövrəltdi.

Yaddaşlara həkk olunacaq bir məqamı da qeyd etmək istərdim. “Qarabağ Azərbaycandır” sözləri yazılmış avtomobilin üzərində döyüşlərdə ermənilərdən qənimət kimi alınmış texnikanın nömrə nişanları simvolik olaraq vurulmuşdu. Birinci Qarabağ müharibəsində isə, ermənilər keçirdikləri analoji paradda həlak olmuş əsgərlərimizin adlarını yazmışdılar. Millət olaraq fərqimiz burada da özünü göstərir. İnsanlığı olmayan insanlıqdan, mədəniyyəti olmayan ermənilər mədəniyyətdən danışır.

Minilliklər keçəcək, bu günki Zəfər paradı, onun müəllifləri Ali Baş Komandan İlham Əliyev, müzəffər Azərbaycan Əsgəri qürur hissi ilə xatırlanacaqlar. Xalqımız 1918-ci ildən bəri Nuru paşanı, türk şəhidlərini unutmadığı kimi, hörmətli Rəcəb Tayyib Ərdoğanı və onun komandasının üzvlərinin qardaşlıq dəstəyini heç zaman unutmayacaqdır. Tarix belə yazılır”.

İlham Əliyev şəhid general və polkovnikimizin ailəsinə mənzil verdi - RƏSMİ