“Ümumiyyətlə son günlərin statistikası vəziyyətin qənaətbəxş olduğunu göstərir. Elə buna görə də Nazirlər Kabineti yanında fəaliyyət göstərən Operativ Qərargah, Bakı, Sumqayıt şəhərlərini və Abşeron rayonu istisna olmaqla, digər regionlarda tətbiq olunmuş sərt karantin rejimini ləğv etdi. Bir çox sahələrdə, müəyyən olunmuş şərtlər daxilində iqtisadi fəallıq bərpa olundu. Hökumət tərəfindən modul tipli xəstəxanaların tikintisi davam etdirilir”. Bunu SİA-ya millət vəkili Nəsib Məhəməliyev deyib.


Onun sözlərinə görə, ölkə başçısı bu gün növbəti, Fövqəladə hallar nazirliyinin modul tipli xəstəxanasının videoformatda açılışında koronovirusla mübarizə kontekstində görülən işlər barədə ictimaiyyəti məlumatlandırdı: “Diqqətçəkən məqamlardan biri, pandemiya başlanan vaxtı ölkədə cəmi 6 laboratoriyanın olmasıdır. Hal-hazırda isə 46 laboratoriya mövcuddur. Vaxtında görülmüş tədbirlər nəticəsində yeni yoluxanların sayı kəskin aşağı düşmüş, ölkə xəstəxanalarının xəstə qəbul etmə imkanları xeyli artmış, buna görə nəzərdə tutulan 7 yeni xəstəxananın tikintisi təxirə salınmışdır. Koronovirusa qarşı vaksinlərin alınması üzərində iş gedir. Etiraf etmək lazımdır ki, yeni vaksinlərin hazırlanması və istifadəsi ilə əlaqədar cəmiyyətdə çoxlu şayiələr dolaşır. Bunu nəzərə alan cənab Prezident, nəzərdə tutulan planlarla bağlı qeyd etdi ki, bir neçə şirkətlə iş aparılır. Həmin şirkətlərin istehsal etdikləri vaksinlər etibarlı olduqlarını sübut etdikdən və beynəlxalq sertifikat alandan sonra biz onları ölkəyə gətirəcəyik. Hesab edirəm tam doğru yanaşmadır.

Azərbaycanda proseslər nəzarətdə olsa da, görürük ki, bir çox ölkələrdə yayılma sürətlə davam edir. Artıq dünya üzrə 25 milyonu keçmişdir. Ona görə də, tam arxayınlaşmaq üçün əsas yoxdur. Bunları nəzərə alaraq karantin rejimi sentyabrın axırına qədər uzadıldı. Hesab edirəm ki, operativ qərargah, müəyyən qaydalar çərçivəsində iqtisadi fəallığın artırılması üçün tədbirlər görməlidir.

Başqa bir məqam isə, dövlət başçısının qanun qarşısında hər kəsin bərabər olduğunu, heç kimin xüsusi imtiyaza sahib olmadığı barədə ciddi xəbərdarlığıdır. Məhz ciddi nizam intizamın nəticəsində bu nailiyyətlər əldə olunmuşdur. Yalnız bu halda tezliklə koronovirusa qalib gəlmək olar”.