“Azərbaycanda Covid-19 pandemiyası ilə bağlı genişmiqyaslı tədbirlər həyata keçirilib və proses davam edir. Respublika Prezidenti cənab İlham Əliyevin zamanı qabaqlayan qəti qərarları nəticəsində, ölkəmiz bir çox dünya ölkələri üçün nümunədir”. Bunu SİA-ya millət vəkili Nəsib Məhəməliyev deyib.

Deputatın sözlərinə görə, qoruyucu məmulatların gətirilməsi, Azərbaycanda istehsalının təşkil olunması, yeni karantin xəstəxanalarının istifadəyə verilməsi, modul tipli xəstəxanaların tikintisi, profil üzrə mütəxəssislərin hazırlanması, əcnəbi həkimlərin cəlb olunması, qəbul olunmuş sosial paketlər, iqtisadi fəallığı təmin etmək üçün verilmiş subsidiyalar və digər tədbirlər aparılan siyasətin düzgün olduğunun təsdiqidir: “Beynəlxalq müstəvidə isə, Azərbaycan Prezidentinin videoformat şəklində keçirdiyi, Türkdilli dövlətlərin, Qoşulmama Hərəkatına aid ölkələrin təmas qrupu ilə konfransları, BMT Baş Assambleyasının xüsusi sessiyasının keçirilməsi təşəbbüsü, Ümumdünya Səhiyyə Təşkilatına və digər imkansız ölkələrə edilən maddi yardımlar beynəlxalq ictimaiyyət tərəfindən yüksək qiymətləndirilib. Həmin təşkilatların və bir çox ölkələrin başçılarının cənab Prezidentə minnətdarlıq hisslərini çatdırması, ölkəmizin beynəlxalq nüfuzunun artmasına səbəb olub. Təbii ki, beynəlxalq ictimaiyyət və Azərbaycan xalqı görülən işləri yüksək qiymətləndirir”.