Azərbaycan Respublikasının Prezidenti cənab İlham Əliyev Baş Prokuror vəzifəsinə Baş Prokurorun 1-ci müavini, Baş Prokuror Yanında Korrupsiyaya Qarşı Mübarizə Baş İdarəsinin rəisi Kamran Əliyevin namizədliyini irəli sürdü. Bu gün artıq Milli Məclis yekdilliklə prezidentin təklifini dəstəklədi.

Kamran Əliyevin ölkənin prokurorluq orqanlarının rəhbəri vəzifəsinə gətirilməsi demək olar ki, hadisəyə münasibət bildirən hər kəsdə xoş təəssürat yaratdı. Hətta müxalifət təmsilçiləri də uzun illər Korrupsiyaya qarşı əzmkarcasına mübarizə aparmış bir hüquqşünasın belə yüksək vəzifəyə təyinatına müsbət yanaşdıqlarını bildirdilər.

Kamran Əliyev keçdiyi zəngin həyat yolu, prokurorluq orqanlarında çalışdığı zaman öz peşakarlığı və dolğun həyat yolu ilə bu vəzifə üçün yetərli qədər təcrübəsinin olduğu sübut edilmişdir.

Əliyev Kamran Bayram oğlu 1965-ci ilin noyabr ayının 18-də Balakən rayonunda anadan olmuşdur. 1987-ci ildə Rusiya Federasiyasının İrkutsk Dövlət Universitetinin hüquq fakültəsini fərqlənmə diplomu ilə bitirdikdən sonra təyinatla prokurorluq orqanlarına işə qəbul olunaraq Rusiya Federasiyasının Zabaykalye Nəqliyyat Prokurorluğunun Çita Nəqliyyat prokurorluğunun müstəntiqi vəzifəsi üzrə stajoru təyin edilmişdir. Daha sonra həmin prokurorluqda və Zabaykalye Nəqliyyat Prokurorluğunda böyük müstəntiq vəzifəsində işləmişdir.

1990-1993-cü illərdə keçmiş SSRİ Baş Prokurorluğunun Elmi-Tədqiqat İnstitutunda əyani şöbə üzrə aspirantura təhsili almış, paralel olaraq həmin müəssisədə elmi işçi vəzifəsində işləmişdir. 1993-cü ildə həmin İnstitutda disertasiya işini müdafiə edərək hüquq elmləri namizədi elmi dərəcəsini almışdır.

Daha sonra köçürülmə qaydasında Azərbaycan Respublikası Prokurorluğu orqanlarına işə qəbul olunmaqla Kadrlar idarəsinin prokuroru, Elm-Tədris Mərkəzinin rəisi, Baş Prokurorluğun İstintaq və ağır cinayətlərə dair işlər üzrə istintaq idarələrində müstəntiq və böyük müstəntiq, Baş prokurorun köməkçisi və böyük köməkçisi, Baş Prokurorluğun Dövlət İttihamının müdafiəsi idarəsinin rəisi, 2007-ci ildən isə Azərbaycan Respublikasının Baş prokuroru yanında Korrupsiyaya qarşı Mübarizə İdarəsinin rəisi vəzifələrində çalışmışdır.

Azərbaycan Respublikası Prezidentinin 5 avqust 2014-cü il tarixli Sərəncamı ilə Azərbaycan Respublikası Baş prokurorunun müavini - Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinin rəisi təyin edilib.

II dərəcəli dövlət ədliyyə müşaviri ali xüsusi rütbəsindədir. Azərbaycan Respublikasının Baş Prokurorluğu Kollegiyasının üzvü, Hüquq elmləri üzrə fəlsəfə doktorudur.

Azərbaycan Respublikası Prezidentinin 27 sentyabr 2008-ci il tarixli Sərəncamı ilə “Azərbaycan bayrağı” ordeni ilə təltif edilmişdir.

Beynəlxalq Prokurorlar Assosiasiyasının İcraiyyə Komitəsinin, Avropa Şurasının Korrupsiyaya qarşı Mübarizə Aparan Dövlətlər Qrupunda (GRECO) Azərbaycan nümayəndə heyətinin üzvüdür, habelə ölkəmizin Şərqi Avropa və Mərkəzi Asiya üzrə Antikorrupsiya Şəbəkəsinin İstanbul Fəaliyyət Planı üzrə İqtisadi Əməkdaşlıq və İnkişaf Təşkilatında (OECD) Milli Koordinatorudur.

İngilis və rus dillərini sərbəst bilir. Ailəlidir, iki övladı var.

Yeni Baş Prokurorun həyat yoluna baxdıqda onun karyerasında ani bir sıçrayışında olmadığı, prokurorluq orqanlarının ən aşağısından gələrək rəhbər vəzifəsinə necə yüksəldiyini görmək olar. 

Onunla birlikdə çalışmış şəxslərindən təəsuratlarından aydın olur ki, Kamran Əliyev hər zaman öz kollektiv yoldaşlarına qarşı diqqətcil, səmimi , ədalətli olmuşdur. Uzun müddətdir onun rəhbərlik etdiyi Korrupsiyaya Qarşı Mübarizə Baş İdarəsi Prezident İlham Əliyevin razılığını qazanmış, dövlət başçısı bunu öz çıxışlarında dəfələrlə bildirmişdir. Heç təsadüfi deyil ki, bir müddət əvvəl dövlət başçısı Dövlət Təhlükəsizliyi Xidmətinin rəisi vəzifəsinə məhz bu baş idarəsinin rəis müavini olan Əli Nağıyevi təyin etmişdir. Əli Nağıyevin quruma rəhbərliyindən sonra qurumun korrupsiyaya qarşı ardıcıl apardığı mübarizə bütün ölkə tərəfindən müsbət qarşılanır. Son zamanlar rayonlarda rüşvətxor məmurlara qarşı  peşəkarcasına həyata keçirilən əməliyyatlarda bunu sübut edir. Yeni Baş Prokuror dünyaya Azərbaycanın ən dilbər güşələrindən olan gözəl Balakənimizdə göz açıb.