Səhlənkarlıq koronavirusun ikinci dalğasının başlanmasına, nəticədə sərt karantin rejiminin təkrar tətbiqinə səbəb ola bilər
 
Ötən ilin dekabr ayından yayılan yeni növ koronavirus (COVID-19) xəstəliyi 2020-ci ilin mart ayından Ümumdünya Səhiyyə Təşkilatı tərəfindən dünyada pandemiya elan olunub. Bununla əlaqədar olaraq dünyanın əksər ölkələrində, o cümlədən Azərbaycanda karantin rejimi tətbiq edilib, sərhədlər bağlanıb, gediş-gəliş məhdudlaşdırılıb. Zaman keçdikcə, bir çox dövlətlər mövcud məhdudiyyətləri sanitar-epidemioloji vəziyyətə uyğun olaraq yumşaldır, karantin rejimindən mərhələli çıxış mexanizmləri tətbiq edir, bəzi ölkələr isə vəziyyətin hələ də ciddiliyini nəzərə alaraq sərt karantin rejimini davam etdirirlər. Azərbaycanda da Nazirlər Kabinetinin 2020-ci il 18 aprel tarixli, 144 saylı qərarı ilə ölkə ərazisində tətbiq olunan xüsusi karantin rejiminin müddəti uzadılıb. COVID-19 virusu ilə bağlı hazırkı sanitar-epidemioloji vəziyyət, xüsusilə xəstəliyin yayılma dinamikası və coğrafiyası, karantin zonalarındakı şəxslərin sıxlığı, onlar arasında virusa yoluxma halları təhlil edilib və 2020-ci il 27 aprel tarixindən məhdudiyyətlərin bir qisminin yumşaldılmasına qərar verilib. 

Əfsuslar olsun ki, bəzi insanlar xüsusi karantin rejiminin yumşaldılmasını koronavirus təhlükəsinin sovuşduğu kimi qavrayır, özünü qorumadan, sanitar-gigiyena qaydalarına məhəl qoymadan əvvəlki vaxtlarda olduğu kimi, həyat tərzi keçirməyə çalışırlar. Amma anlamırlar ki, dünya, o cümlədən Azərbaycan bu bəladan hələ tam qurtarmayıb. Karantin rejimindəki məhdudiyyətlərin bəzisi aradan qaldırıldığı üçün əhali arasında virusa yoluxmada artım ola və prosesin ikinci dalğası başlaya bilər. Vətəndaşlarımız bilməlidir ki, COVID-19 xəstəliyi uzunmüddətli prosesdir. Ona görə də mövcud qaydalara riayət olunması və zəruri profilaktik tədbirlərin davam etdirilməsi vacibdir. Bu məqsədlə gigiyena qaydalarına daha ciddi riayət olunmalı, davam etdirilən özünütəcrid, "Evdə qal!” kampaniyasına hər bir kəs, xüsusən yaşı 65-dən artıq olan vətəndaşlar dəstək verməlidir. Düzdür, xüsusi karantin rejimindəki mövcud məhdudiyyətlərin sanitar-epidemioloji şəraitdən asılı olaraq mərhələli yumşaldılması zəruridir. Amma epidemioloji vəziyyət tələb edərsə, yəni xəstəliyin dinamikasında artım olarsa, karantin rejimi yenidən sərtləşdiriləcək, müvafiq məhdudiyyətlər yenidən tətbiq olunacaq. Bu səbəbdən indiki vəziyyətdə hər şey insanlara bağlıdır. Məhdudiyyətlər götürülsə belə, əgər insanlar profilaktik tədbirlərə, sanitar normalara uyğun davranmasa, yoluxma halları çoxala bilər. Məhdudiyyətlərin bir qismi aradan qaldırılsa da, virusa yoluxma sürətinin qarşısını almaq üçün ölkədə kütləvi tədbirlər keçirilməməli, vətəndaşlar yenə də 2 metrlik distansiya tələbinə riayət etməlidirlər.


Mövzu ilə bağlı fikirlərini "Kaspi” qəzetinə açıqlayan millət vəkili Nəsib Məhəməliyev deyib ki, aprelin 27-dən sonra karantin rejiminin yumşaldılması ilə əlaqədar əhalidə koronavirus təhlükəsinin sovuşduğu barədə yaranmış təsəvvür yanlış olmaqla bərabər, təhlükəlidir. Onun sözlərinə görə, aparılan müşahidələr göstərir ki, müəyyən kəsim insanlar problemin ciddiliyini kifayət qədər dərk etmir, yaxud məsələyə səhlənkar yanaşırlar: "Dünya ölkələrində pandemiya ilə bağlı prosesləri izlədikdə və görülən tədbirləri nəzərə aldıqda, görürük ki, tam rahatlanmaq üçün əsas yoxdur. Əksinə, səhlənkarlıq daha da ciddi fəsadlara səbəb ola bilər. İndiyə qədər heç bir ölkədə koronovirusa qarşı vaksin icad olunmayıb və ən optimist mütəxəssislər belə yaxın bir ildən tez bunu gözləmirlər. Ona görə də vətəndaşlarımız Prezidentimizin çağırışlarına cavab olaraq, Nazirlər Kabineti yanında Operativ Qərargahın tövsiyələrinə, özünütəcrid və gigiyenik qaydalara riayət edərək koronavirusla mübarizəyə öz dəstəklərini verməlidirlər. Əks halda, bu, özünü və yaxınlarının həyatını risk altında qoymaq deməkdir. Belə olarsa, hökumət karantin rejimini uzatmaq məcburiyyətində qalacaq. Bu isə bütövlükdə cəmiyyətin normal həyata qayıtmasını əngəlləmək deməkdir”.