Müsahibimiz Azərbaycan Dövlət Pantomima Teatrının aktyor və  rejissoru Leyla Atayevadır.

Ucqar dağ rayonundan olan bir xanım necə oldu ki, aktyorluq sənətinə gəldi? Sənətinizə gedən yol haqqında danişardız zəhmət olmasa?

-Bu uşaqlıqdan gələn istək idi. Əvvəlcədən qeyd etmək istəyirəm ki, mən Rusiyada doğulmuşam və ibtidai məktəbədə  orda getmişəm. Daha sonra Balakənə köçdük və təhsilinə burda davam etdim. Rusiya təhsil sistemi elədir ki, həm də şagirdin yaradıcı və kreativ xüsusiyyətlərinə diqqət yetirilir. Şagirdlər məktəbdə tamaşaları özləri hazırlayırlar və oynayırdılar, müəllimlər hər dəfə fərqli şagirdi rejisor olaraq seçirdi və həmən şagird müəllimindən köməyi ilə digər şagirdləri rollara görə bölürdü. Daha sonra şagirdlər rolları əzbərləyir və öz bacarıqlarına görə rolları ifa edirdilər. Həmçinin valideyinlərim məni rəqs məktəbinədə yazdirmişdilar, bura insanın artistlik və sənət ruhunu daha da inkişaf etdirir.  Təbii ki, mənim özümün də buna marağım olmasa idi aktiv iştirak etməzdim. Sadəcə belə alındı ki, tamaşalarda, rəqs dərnəklərində, masqarad bayramlarında iştirak etmək mənim xoşuma gəlirdi və olduğum mühit buma dəstəkçi idi. Yaradıcı tərəflərin inkişafına yol verirdi. Mən düşünürəm ki, bu hər cəmiyyət üçün önəmlidir, çünki incəsənət bir millətin bünövrəsini təşkil edir. Bunun üçündə uşaqlıqda təhsil sistemində şagirdin yaradıcı inkişafı üçün yer ayrılmalıdır. Şagirdə azad və kreativ düşüncə tərzi aşılanmalıdır. Amma ilk öncə istəyim sırf aktyorluq sənəti deyildir. Təxminən 9-cu sinifdə oxuyarkən qərar vermişdim ki, rejisor olacam. Sadəcə universitetdən sonra yolum teatr aktyorluğuna düşdü və  hesab edirəm ki, bu mənim üçün daha xeyirlidir. Çünki gələcəkdə rejisor kimi aktyorlarla işləyəndə onlarla daha rahat dil tapacam. Onuda qeyd edim ki, teatrda rejisor kimisə fəaliyyətim var. Pantomima Teatrında " İt gəzdirən xanım " tamaşasının rejisoruyam.

2 peşəniz var. Əgər birini seçməli olsaydınız hansını seçərdiz?

-Özümü daha çox rejisor kimi gorürəm. Aktyorluq peşəsinin sahibi olan insanın elə xüsusiyyəti olmalıdır ki, onlar mənim üçün çətindir. Aktyor rejissorun gördüyü şəkli görməlidir, rejissoru tam anlamalıdır və rejissorun gördüyü səhnəni canlandırmalıdır. Bir aktyor olaraq mən bunlara şübhəsiz ki, riayyət edirəm. Hesab edirəm ki, aktyor öz yaradıcılığını rejissorun istəyi çərçivədə görməlidir,  lakin istədiyim öz hekayələrimi canladırmaqdır. Çünki mən hər dəfə gənc aktyorlar görəndə onları fərqli obrazlarda təsəvvür edirəm və quruluş vermək istədiyim hekayələr,  pyeslər və romanlar var. Sadəcə bunun üçün hələ vaxt lazımdır. Daha çox təcrübə yığıb peşakarlasmalıyam. Ondan sonra isə aktyorlarla rejissor qismində çalışa bilərəm.

Səhnə adamları əksərən iki qrupa bölünürlər - 1) Səhnədə fərqli, şəxsi həyatda fərqli olanlar  2)  Həm səhnədə, həm şəxsi həyatda fərqli olanlar. Siz özünüzü hansı qrupa aid edirsiz.

-Səhnə fərqli obraza girmək üçün meydanıdır. Aktyorluğun məsədidə məhz öz həyatından fərqli həyatı canladırmaqdır. Əlbətdə heç bir insanın həyatı səhnədə canlandırdığı Əsədə oxşamayacaq. Məqsəd personajı canladırmaqdır və sözsüz ki, o sənin özündə fərqli olacaq. Çünki personajın həyatıda səninkindən fərqlidir. Əgər bir aktyorun səhnədə canlandırdığı obraz həyatdakı özündən fərqlənmirsə, əgər biz səhnədə personajı yox onun özünü götürüksə, deməli o, öz peşəsinə məsuliyyətli münasibət göstərmir. İstənilən halda səhnədə hər aktyor da öz xüsusiyyətini nümayiş etdirəcəkdir. Mənəvi cəhətdən sağlam insan səhnədə də hər obrazda öz təmiz və yüksək xüsusiyyətini qoruyacaqdır. K. Stanislavski deyib ki, " aktyor həyatda da mədəni, kübar, ədalətli və etik normaları bilən biri olmalıdır ".

Azərbaycan Dövlət Pantomima Teatrında təmsil olunursuz. Azərbaycanda Pantomimanın gələcəyi haqqında nə deyə bilərsiz ?

-Pantomima Teatrının hal hazırda gənclər üçün ən maraqlı teatr adlandıra bilərəm. Çünki tamaşalarda bizim üslub ənənəvi teatr formalarından fərqlənir. Mövzuları isə zamana uyğun, tamaşaçının qəlbində əks - səda doğura biləndir. Pantonomima Teatrı istedadlı gənclər üçün əla fürsətdir. Çünki bəddi rəhbərimiz Bəxtiyar Xanızadə gənclərlə iş birliyi etməyi xoşlayan, gəncləri dəstəkləyən, özüdə gənc ruha sahib insandır. Bu günə qədər Pantonomima Teatrı Azərbaycanı bir çox xarici ölkələrdə təmsil edib. Hər zaman xaricdə də maraqla qarşılanıb. Mən özüm Pantonomima Teatrının gələcəyini uğurlu görürəm. Hesab edirəm ki, bu günə qədər nə uğurlarımız olubsa bu hələ yolun başlanğıcıdır, bu gündən sonra daha böyük uğurlara ümid edirəm.

Son olaraq Balakən gənclərinə, əsasda öz xəyallarını gerçəyə çevirmək üçün bu il qəbul imtahanında iştirak edəcək Balakənli abutireyentlərə öz arzusunu gerçəyə çevirərək əhəmiyyətli uğura imza atmış bir sənətkar olaraq nə deyə bilərsiz ?

-Ən əsası cəsarətli olmaq, özünə inanmaq, nə istədiyini bilməkdir. Hər şəkildə, hər vəziyyətdə öz arzularına gedən yolda vicdanlı davranmaqdır. Arzulara tək inanmaq yox, onların arxası ilə getmək lazımdır. Hətta bu arzuları başqalarına əlçatmaz görünsə belə əsası öz inamın və yorulmadan çalışmağındır. Həyat sevmədiyin işlə illəri xərcləmək üçün çox qısadır. Həyatınızı var dövlət üçün, kimisə qane etmək üçün sərf etməyin. Həyatın anlarını dolğun yaşayın. Ürəyinizin səsini dinləyin və sizin üçün yaxşı olanı seçin. Özünüzə və məqsədinizə qarşı dürüst olun, qalan düzələcək. Həmçinin İncəsənət Universteti ilə bağlı kiminsə sualı varsa hesabıma yaza bilər, doğru istiqamətə yönləndirə bilərəm.

Çox sağolun Leyla xanım

-Xoşdu, siz sağolun.

Balaken.info