Balakən Rayon İcra Hakimiyyəti tərəfindən kənd təsərrüfatına ciddi ziyan vuran qəhvəyi mərmər bağacığına qarşı mübarizə tədbirləri davam etdirilir. Mütəxəssislər və aidiyyəti qurumlar bu təhlükəli zərərverici ilə mübarizədə vətəndaşların da fəal iştirakının vacibliyini vurğulayırlar.

Bildirilir ki, zərərverici aşkar edildikdə onu süpürgə, tozsoran və digər mexaniki vasitələrlə toplayaraq sonradan məhv etmək lazımdır. Bu üsul bağacığın yayılmasının qarşısını almaqda effektiv hesab olunur.

Beynəlxalq təcrübə göstərir ki, qəhvəyi mərmər bağacığı ilə mübarizədə aldadıcı tələlər və süni sığınacaqlardan geniş istifadə edilir. Xüsusilə karton və qəzetlə doldurulmuş qutular bağacığın toplanması üçün səmərəli üsul sayılır. Bu qutular evlərin günəş düşən hissəsində və ya çardaqda yerləşdirilməlidir.

Balakən Rayon İcra Hakimiyyəti bir daha sakinlərə müraciət edərək bildirir ki, qəhvəyi mərmər bağacığı ilə mübarizə hər birimizin ortaq məsuliyyətidir. Bu sahədə birgə və vaxtında görülən tədbirlər kənd təsərrüfatı məhsullarının qorunmasında mühüm rol oynayır.

Şahidi olduğunuz hadisələri çəkib bizə göndərin! 7/24 whatsapp