Son günlər müşahidə olunan kəskin və fasiləsiz yağıntılar Balakən rayonu ərazisində bir sıra kəndlərdə sel təhlükəsi formalaşdırıb. Güclü yağış suları bəzi yaşayış məntəqələrində vətəndaşların həyətyanı sahələrinə, eləcə də əkin sahələrinə dolaraq çətinliklər yaradıb.

Yaranmış vəziyyətlə əlaqədar Balakən Rayon İcra Hakimiyyəti tərəfindən operativ tədbirlər görülür. Rayon icra hakimiyyətinin başçısı Natiq Ağayev riskli ərazilərə baxış keçirib, mövcud vəziyyətlə yerində tanış olub.

Baxış zamanı aidiyyəti qurumların nümayəndələrinə yağış sularının istiqamətləndirilməsi, suötürücü kanalların açılması, potensial təhlükə olan nöqtələrdə qabaqlayıcı tədbirlərin gücləndirilməsi ilə bağlı müvafiq tapşırıqlar verilib.

Hazırda ərazilərdə texnika və canlı qüvvə cəlb olunmaqla sel təhlükəsinin qarşısının alınması istiqamətində işlər davam etdirilir. Vətəndaşlara ehtiyatlı olmaları, zərurət yaranacağı təqdirdə aidiyyəti qurumlarla əlaqə saxlamaları tövsiyə olunur.

Qabaqlayıcı tədbirlər nəzarətdə saxlanılır.

Şahidi olduğunuz hadisələri çəkib bizə göndərin! 7/24 whatsapp