Azərbaycanda neft məhsullarının pərakəndə satışı sahəsində fəaliyyət göstərən “Lukoil Azərbaycan” şirkətində rəhbərlik dəyişib.

Banker.az-ın əldə etdiyi məlumata görə, şirkətə altı ildir rəhbərlik edən Zaur Cəlilov vəzifəsindən ayrılıb. Cəlilovun yerinə Lukoyl Azərbaycan Şirkətinin rəhbəri vəzifəsinə Rasim Əmrəliyev təyin edilib.

Rasim Əmrəliyev buna qədər Rusiyada Lukoylun müxtəlif struktur bölmələrində rəhbər vəzifələrdə  çalışıb.

Xatırladaq ki, “LUKOil Azərbaycan” Rusiyanın “LUKOil” şirkətinin Azərbaycandakı törəmə müəssisəsidir. “LUKOIL” Qrupu Azərbaycanın neft-qaz sektorunda 1994-cü ildən fəaliyyət göstərir və hazırda ölkə ərazisində iki törəmə müəssisə ilə təmsil olunur.

Şirkət “Şah-Dəniz” və “Cənubi Qafqaz Boru Kəməri” layihələrində 10%-lik paya malikdir. Bundan başqa, şirkət neft məhsullarının pərakəndə satışı bazarında “LUKOİL” brendi altında fəaliyyət göstərir.

Şirkət Azərbaycanda 87 yanacaqdoldurma məntəqəsi və 1 neft bazasına məxsusdur. Qeyd edək ki, şirkətin rəhbəri təyin edilmiş Rasim Əmrəliyev əslən Balakən rayonundadır. O, Atlas Araşdırmalar Mərkəzinin eksperti, tanınmış politoloq Zeynal Əmrəliyevin qardaşıdır.