Balaken.info xəbər veriri ki, Balakən Rayon Mərkəzi Xəstəxanasında Azərbaycan dövlətinin qurucusu, Ümummilli Lider Heydər Əliyevin anadan olmasının 102-ci ildönümünə həsr olunmuş anım tədbiri keçirilib.

Tədbirin açılışını Balakən RMX Publik Hüquqi Şəxsin direktoru Dilbər Quliyeva edib. Tədbir iştirakçıları Ümummilli Lider Heydər Əliyevin və Vətən uğrunda canlarını fəda etmiş şəhidlərin əziz xatirəsini bir dəqiqəlik sükutla yad ediblər.

Çıxış edən Dilbər Quliyeva, Heydər Əliyevin müasir Azərbaycanın formalaşması və inkişafı istiqamətində atdığı tarixi addımlar, ölkənin sosial-iqtisadi, siyasi və mədəni həyatında yaratdığı dərin izlərdən bəhs edib.

Daha sonra Səhiyyə İşçiləri Həmkarlar İttifaqı Şurasının sədri Könül Mustafayeva Ulu Öndərin həyat və fəaliyyətinə dair geniş təqdimatla çıxış edərək, onun dövlət quruculuğu sahəsindəki misilsiz töhfələrini və xalqın rifahı naminə həyata keçirdiyi islahatların əhəmiyyətini bir daha vurğulayıb.

Tədbir çərçivəsində Ulu Öndər Heydər Əliyevin həyat və fəaliyyətinə həsr olunmuş videoçarx nümayiş etdirilib. Videoçarxda, Azərbaycanın müstəqilliyi uğrunda apardığı mübarizə, dövlətçiliyin möhkəmləndirilməsi və xalqımıza verdiyi xidmətlər geniş şəkildə əks olunub.

Sonda Balakən RMX-nin rəhbərliyi, tibb və qeyri-tibb işçiləri Ulu Öndər Heydər Əliyevin xatirəsini ehtiramla yad edərək, abidəsi önünə gül dəstələri düzüblər.

Şahidi olduğunuz hadisələri çəkib bizə göndərin! 7/24 whatsapp