Aprelin 2-də Balakən Rayon Baytarlıq İdarəsi üçün inşa edilmiş yeni inzibati binanın açılış mərasimi olmuşdur.

Mərasimdə Kənd Təsərrüfatı Nazirliyi yanında Dövlət Baytarlıq Xidmətinin rəisi Sialə Rüstəmova çıxış edərək qurumun tabeliyində olan baytarlıq idarələrinin, diaqnostika kabinetləri və laboratoriyaların maddi-texniki bazasının möhkəmləndirilməsi istiqamətində həyata keçirilən tədbirlər barədə məlumat vermişdir. Bildirmişdir ki, regionların sosial-iqtisadi inkişafına dair Dövlət Proqramına uyğun olaraq, ötən müddətdə respublikamızın 60-a yaxın baytarlıq obyektində, o cümlədən 32 baytarlıq məntəqəsində tikinti və yenidənqurma işləri aparılmış, obyektlər müasir avadanlıqla təmin olunmuşdur. Bu il daha 14 rayonda xidmətin yerli idarələri üçün müasir tələblərə cavab verən yeni inzibati binalar tikiləcəkdir.

Rayonun qocaman baytar həkimi Fuad Səlimov çıxış edərək bu sahənin inkişafına göstərilən diqqət və qayğıya görə dövlətimizin başçısına minnətdarlığını bildirmişdir.

Sonra Sialə Rüstəmova və rayon icra hakimiyyətinin başçısı Asif Məmmədov yeni binada yaradılan şəraitlə tanış olmuşlar.

Məlumat verilmişdir ki, dövlət vəsaiti hesabına inşa edilən ikimərtəbəli binada şöbələr müasir avadanlıqla təmin olunmuşdur.