Balakən rayonunun təhsil müəssisələri hər il inkişaf edərək daha böyük nailiyyətlər qazanır. Bu uğurlu məktəblərdən biri də Nizami Gəncəvi adına 1 nömrəli tam orta ümumtəhsil məktəbdir. Azərbaycan və rus dillərində tədrisin aparıldığı məktəbdə 1802 şagirdin təlim-tərbiyəsi ilə 147 müəllim məşğul olur.

Məktəbin yüksək nəticələr əldə etməsi burada sistemli və məqsədyönlü tədrisin təşkil olunmasının göstəricisidir. Bu uğurların əsas memarlarından biri məktəbin direktoru, Əməkdar müəllim Şəfiqə Tütünçiyevadır. O, 2002-ci ildən etibarən bu məktəbə rəhbərlik edir və fədakar pedaqoji fəaliyyəti ilə kollektivin rəğbətini qazanıb. Şəfiqə müəllimə keçmişdə bizim məktəbin də direktoru olub və rəhbərlik etdiyi dövrdə ciddi nizam-intizamı və tələbkarlığı ilə seçilib.

Onun rəhbərliyi altında Nizami Gəncəvi adına 1 nömrəli tam orta ümumtəhsil məktəb yalnız akademik nəticələri ilə deyil, eyni zamanda şagirdlərin müxtəlif intellektual və idman yarışlarında əldə etdiyi uğurlarla da fərqlənir. Şagirdlər fənn olimpiadalarında, müxtəlif müsabiqə və turnirlərdə yüksək nailiyyətlər qazanaraq məktəbin adını ucaldırlar.

Məktəbdə yaradılan müasir təhsil mühiti və intizamlı idarəçilik sistemi onu rayonun ən nüfuzlu təhsil ocaqlarından birinə çevirib. Şəfiqə müəllimə kimi prinsipial və fədakar təhsil işçiləri sayəsində Balakən məktəbləri respublika səviyyəsində nümunəvi təhsil müəssisələri sırasında yer almağa davam edir.

Şəfiqə müəllimənin pedaqoji sahədəki əvəzolunmaz xidmətlərini nəzərə alaraq, demək istərdim ki, regionda ondan daha savadlı və peşəsini bu qədər layiqincə icra edən ikinci bir direktor tanımıram. Onun rəhbərliyi altında məktəbdə yaradılan nizam-intizam, yüksək akademik standartlar və fədakar pedaqoji yanaşma sayəsində bu təhsil ocağı daim fərqlənib. O, yalnız bir direktor kimi deyil, həm də şagirdlərin və müəllimlərin inkişafına yönəlmiş bir mentor kimi fəaliyyət göstərib. Belə təhsil işçilərinin olması ölkəmizin gələcəyi üçün böyük qazancdır.

Balaken.info
İbrahim Şıxməmmədov

Şahidi olduğunuz hadisələri çəkib bizə göndərin! 7/24 whatsapp