“Nazirlər Kabineti yanında Operativ Qərargah Azərbaycan Prezidenti İlham Əliyevin tapşırığına əsasən yaradılmış və qısa zaman kəsiyində dünya ölkələrini bürümüş yeni növ koronovirusdan Azərbaycan xalqını qorumaq məqsədi daşıyır”.
Bunu Bizimyol.info-ya açıqlamasında Milli Məclisin deputatı Nəsib Məhəməliyev bildirib.

Deputat qeyd edib ki ötən dövür bir daha göstərdi ki, dövlət başçısının qəbul etdiyi qəti qərarlar, məhdudlaşdırıcı tədbirlər nəticəsində bir çox ölkələrlə müqayisədə ölkəmiz az itkilərlə başa vurmaqdadır: “Eyni zamanda fevral ayından başlayaraq, mütəxəssislərin, deputatların, jurnalistlərin, ümumiyyətlə ziyalıların fasiləsiz apardıqları maarifləndirici təbliğat öz bəhrəsini verib.

Ancaq çox təəssüflər olsun ki, son günlər sosial şəbəkələrdə müzakirə obyektinə çevrilmiş keçmiş deputat İlham Əliyevin karantin rejiminin qaydalarını kobudcasına pozaraq övladına toy məclisi keçirməsi aparılan siyasətə ziddir və cəmiyyət tərəfindən kəskin qınanılır. Mövcud qanun-qaydaların pozulması ilə təşkil olunmuş məclis iştirakçılarının açıqlamaları isə xalq tərəfindən qəzəblə qarşılanır. Pandemiya ilə bağlı karantin rejiminin qaydalarına dözüm, səbr, təmkinlə yanaşan insanlar dövlətdən məsələyə ədalətli mövqe gözləyirdilər. Hər zaman olduğu kimi ədalətli mövqe ölkə başçısından gəldi. Nümayişkaranə şəkildə qanunları taptalayaraq cəmiyyətə hörmətsiz yanaşan şəxslər layiq olduqları qiyməti aldılar”.

N.Məhəməliyevin sözlərinə görə, bu hadisə bir daha sübut etdi ki, cənab Prezident cəmiyyətin saflaşmasında, sosial ədalət pinsiplərinin bərqərar olmasında, qanunun aliliyinin qorunmasında hamıdan çox maraqlıdır: “Kimliyindən asılı olmayaraq hər kəs qanun qarşısında bərabərdir. Çalışın müsbət davranışlarınızla başqalarına nümunə olun və düşünürəm ki, ölkə başçısına ən böyük xidmət, sədaqət budur”.