“Ermənistan hərbçilərinin bilavasitə vəhşicəsinə kəndləri iri kolibrli artilleriya atəşinə tutmasının yalnız bir səbəbi var. O da, sərhədyanı kəndlərdə yaşayan sakinləri qorxudaraq, panik mühit yaratmaq və əlavə torpaqları işğal etməkdən ibarətdir”.
Bu barədə Bizimyol.info-ya açıqlamasında Milli Məclisin deputatı Nəsib Məhəmməliyev bildirib.


Deputat qeyd edib ki, Ermənistan silahlı qüvvələrinin xaincəsinə hücumu nəticəsində Tovuz rayonunun altı kəndində mülki obyektlər, kənd sakinlərinə məxsus fərdi evlər dağıdılıb: “Bir nəfər 76 yaşlı kənd sakini ermənilərin atdığı artilleriya atəşi nəticəsində dünyasını dəyişib. Ermənistan hərbçilərinin bilavasitə vəhşicəsinə kəndləri iri kolibrli artilleriya atəşinə tutmasının yalnız bir səbəbi var. O da, sərhədyanı kəndlərdə yaşayan sakinləri qorxudaraq, panik mühit yaratmaq və əlavə torpaqları işğal etməkdən ibarətdir. Ancaq qəhrəman Azərbaycan əsgərinin döyüş ruhu ən yüksək səviyyədədir və xalq ordusuna güvənərək bir addım da geri çəkilmədi. Ordumuz düşmənə artıqlaması ilə elə bir zərbə vurdu ki, düşmən ölkənin daxilində ciddi çaxnaşmalar, narazılıqlar, qarşıdurmalar intensivləşdi. Xalq Paşinyan hökumətindən öz əsgərlərinin meyitlərini tələb etməyə başladı”.

Nəsib Məhəmməliyev bildirib ki, Azərbaycan Prezidenti İlham Əliyev dərhal Tovuz rayonunda baş vermiş dağıntıların bərpası, əhaliyə dəymiş ziyanın aradan qaldırılması üçün komissiya yaratdı və dövlət tərəfindən lazım olan maliyyənin ayrılması üçün tapşırıqlarını verdi: “ Şəhid olmuş general-mayor Polad Həşimovun və polkovnik İlqar Mirzəyevin ailələrini mənzillə təmin etdi. Birinci vitse Prezident Mehriban xanım Əliyeva Tovuz istiqamətində həlak olmuş 12 şəhidimizin ailə üzvlərinin sosial qayğılarının tam qarşılanması üçün Heydər Əliyev Fonduna xüsusi tapşırıq verdi.

Atışmada yaralanmış əsgər və zabitlərimiz hərbi hospitallarda ən yüksək səviyyədə müalicə olunurlar. Təbii ki, ölkə rəhbərlərinin vətən uğrunda canlarını fəda etmiş şəhidlərə, yaralılara göstərdiyi diqqət və qayğı, həmçinin dağılmış ərazinin operativ şəkildə bərpası dövlətin hər zaman vətəndaşının yanında olduğunu göstərir. Xalqın öz liderinə inamını daha da artırır”.