Artıq bir neçə gündür ki, Azərbaycan xalqı yenidən mənfur düşmənə, erməni işğalçılarına qarşı bir yumruq kimi birləşib, düşməni ən sərt şəkildə cəzalandırmaq üçün həmrəy olub. Bu günlərdə Azərbaycan Ordusunun Tovuz istiqamətində erməni təxribatının qarşısını alarkən nümayiş etdirdiyi misilsiz qəhrəmanlığa dəstək məqsədilə paytaxtda keçirilən yürüş də bunun əyani sübutu idi. Ancaq təəssüflər olsun ki, hər zaman bu kimi situasiyalarda öz şəxsi maraqları üçün yararlanmaq, cəmiyyətdə çaşqınlıq, qarşıdurma yaratmaq istəyən qüvvələr, bu dəfə də müqəddəs amal uğrunda küçələrə çıxan minlərlə insanımızın diqqətini başqa istiqamətə yönəldə bildi. İnsan selinin arasına soxulmuş təxribatçı qüvvələr qanunverici orqana daxil olaraq vandal hərəkətlərə yol verdilər.

Baş verənlərlə bağlı fikirlərini bölüşən Milli Məclisin deputatı Nəsib Məhəməliyev deyib ki, ordumuzun erməni işğalçılarına vurduğu cavab zərbələrindən ruhlanan, orduya, Ali Baş Komandana dəstək məqsədilə ölkəmizin bir çox bölgələrində, o cümlədən paytaxt Bakıda on minlərlə gənc üçün küçələrə axışdı: "Koronavirus pandemiyası ilə bağlı karantin rejiminin qüvvədə olmasına, insanların kütləvi toplanmasının təhlükəli olmasına baxmayaraq, hakimiyyət gənclərin vətənpərvərlik hisslərinə hörmətlə yanaşdı və maneçilik göstərmədi. Ancaq çox təəssüflər olsun ki, 90- cı illərin əvvəllərində olduğu kimi, vətəndaşların səmimi duyğularından öz çirkin məqsədləri üçün sui-istifafə etmək istəyən, sapı özümüzdən olan xain, satqın qüvvələr yaranmış vəziyyətdən xaos, anarxiya yaratmağa cəhd etdilər". Deputat deyir ki, baş verənlərə nəzər yetirdikdə xeyli suallar ortaya çıxır: "Ordumuzun düşmənlə müharibə apardığı, şəhidlər verdiyimiz vaxtda, gecə vaxtı Milli Məclisin binasına daxil olaraq, divarları, mebeli, müxtəlif əşyaların dağıdılmasının məqsədi, məramı nədir?. Qarabağa, orduya dəstək çağırışlarının, sonradan bəzilərinin "Allahu əkbər" şüarları səsləndirmələri, kimlərin, hansı təşkilatların tapşırıqlarını icra edirdilər. Gecə vaxtı Parlament binasında kafir, ermənimi axtarırdılar". Nəsib Məhəməliyev deyib ki, hadisələrlə yerində tanış olmaq üçün Milli Məclisin binasına girərkən əsil vandallığın şahidi olub: "Heç bir normal Azərbaycan gənci bu hərəkəti etməz. Düşünürəm ki, bu bilavasitə uzun illər Azərbaycana qarşı düşmənçilik mövqeyi ilə seçilən, ölkəmizin müstəqilliyini həzm edə bilməyən qüvvələrin tapşırıqlarını icra edənlərdir. 90-cı illərin əvvəllərində biz tez-tez bu tipli iğtişaşların şahidi olurduq. Azərbaycana düşmən münasibət göstərən qüvvələr, öz aqentləri vasitəsilə insanlar arasında dezinformasiya yayır, panika yaradır və kütlə psixologiyasından istifadə edərək xaos, anarxiya yaratmaqla rayonlarımızın işğalı üçün münbit şərait formalaşdırırdılar. Burada xüsusi olaraq, heç bir idarəetmə təcrübəsi olmayan, dövlət idarəetmə, beynəlxalq münasibətlər sistemindən bixəbər insanların apardığı vəzifə davasını da vurğulamaq lazımdır. Belə kreslo uğrunda mübarizə aparan "qəhrəmanların" fəaliyyəti nəticəsində, cəbhə bölgələrindən ağır texnika, şəxsi heyət çıxarılaraq Bakıya gətirilirdi və bir-birinin ardınca iradəsiz dövlət başçıları canlarını götürüb qaçırdılar. Azərbaycan xalqının yaxşı yadındadır. Müharibənin getdiyi dövrdə, tez tez Milli şurada bəzi deputatların tələbi ilə, Müdafiə naziri, digər güc strukturlarının hesabatları dinlənilirdi və bu dinləmələrin qapalı keçməsinə baxmayaraq, azərbaycan xalqından fərqli olaraq, düşmən detallarına qədər məlumatlı olurdu". Deputat deyib ki,  bu yaxınlarda, Yaxın Şərq reqionunda gedən proseslərdə öz aktiv fəaliyyəti ilə seçilən bir generalı öldürdülər: "Bu hərbiçi heç vaxt ölkəmizə qarşı müsbət münasibətilə seçilməmiş, əksinə, əzəli düşmənimizə əhəmiyyətli şəkildə dəstək vermişdir. Cənublu soydaşlarımızın əksəriyyətinin adekvat münasibətinə baxmayaraq, bir çox vətəndaşlarımızın dini mənsubiyyəti, milli mənsubiyyətdən üstün tutmaları təəssüf edici və dövlətçiliyimiz üçün təhlükəli vəziyyəti aydınlaşdırdı. Müharibə aparan dövlət üçün cəmiyyətin bütün təbəqələrinin davranışlarından tutmuş, psixoloji vəziyyəti və s. ən kiçik detallarına qədər öyrənilməli və nəzərə alınmalıdır. Müxtəlif yad təsirlərə məruz qalmış insanlarla peşəkar psixoloqların, sosioloqların, ziyalıların, din xadimlərinin ciddi izahat işlərinin aparması vacibdir. Bir məsələni xüsusi olaraq vurğulamaq istəyirəm. Azərbaycan artıq 90-cı illərin geridə qalmış, oturuşmamış ölkəsi deyi. Azərbaycan dünya miqyasında söz sahibi olan, hər tərəfli inkişaf etmiş müstəqil siyasət aparan güclü dövlətdir və fəaliyyətə başladığı gündən düşmənə bir santimetr torpaq verməyən, əksinə mürəkkəb şəraitdə bir çox torpaqları azad etmiş qətiyyətli Prezidenti var. Hüquq mühafizə orqanlarından xahişim budur ki, xalqımızın, dövlətimizin gələcəyi naminə xalqın müqəddəs hisslərindən çirkin məqsədlər üçün istifadə edərək düşmən dəyirmanına su tökən təxribatçılar müəyyənləşdirilərək qanuna uyğun şəkildə cəzalandırılsınlar. İmkan vermək olmaz ki, bu tipli təxribatçılar, dövlətimiz üçün həssas məqamda arxadan balta vursunlar. Müharibə şəraitində uşaqdan böyüyə hər kəs ayıq olmalıdır".

Füzuli