Xəbər verildiyi kimi, Milli Məclisin mayın 31-i, plenar, iyunun 1-i və 2-də keçirilən növbədənkənar iclaslarında bir sıra mühüm qanun layihələrinin qəbulu ilə yanaşı, “Ünvanlı dövlət sosial yardımı haqqında” qanunda, eləcə də İnzibati Xətalar Məcəlləsində dəyişikliklə bağlı qanun layihəsi müzakirəyə çıxarıldı. Hər iki qanun layihələri ətrafında deputatlar yetərincə çıxış etdi, fərqli fikirlər səsləndirdi, sual doğuran bəzi məqamlara aydınlıq gətirildi və üçüncü oxunuşda səsə qoyularaq qəbul edildi. Deputatlar 3 gün ərzində, həmçinin cari məsələlərdən də danışdı, seçicilərini narahat edən məsələlərə toxundu.

Çıxışlardan bir neçəsini olduğu kimi təqdim edirik.

Millət vəkili Nəsib Məhəməliyev:

- Koronavirus pandemiyasından sonra artıq dünyada ictimai-iqtisadi münasibətlər dəyişib. Artıq bir çox dünya ölkələri distant idarəetməyə keçiblər və idarələrarası, müəssisələrarası, dövlətlərarası münasibətlər distant-onlayn rejimində həyata keçirilir. Bu da bir reallıqdır ki, Azərbaycan əhalisinin təxminən 50 faizi kənd yerlərində yaşayır. Çox xoş oldu ki, son dövrlər fermerlərin elektron qeydiyyatı prosesi həyata keçirilir və ümumiyyətlə, istənilən mərkəzi icra hakimiyyəti orqanları daha çox onlayn rejimdə işləməyə üstünlük verir ki, bu da normal haldır.

Ancaq, çox təəssüflər olsun ki, internetlə bağlı regionlarda çox ciddi problemlər var. Səhv eləmirəmsə, cənab Prezident Rabitə və Yüksək Texnologiyalar (RYT) nazirini fevral ayında qəbul etmişdi və qısa zamanda respublikanın 100 faiz ərazisinin keyfiyyətli internetlə təmin olunması ilə bağlı tapşırıqlarını vermişdi. Lakin hal-hazırda bu sahədə ciddi problemlər qalmaqdadır və hesab edirəm ki, RYT Nazirliyi bunun üzərində işləməlidir.
İkinci məsələ; biz burdan Şimal-Qərb istiqamətində yola çıxarkən, Qobustan-Şamaxıya çatanda artıq İran radiolarını eşidirik. Əvvəllər də bu məsələlər burda qaldırılıb. İsmayıllı-Qəbələ bölgəsində həmin radiolar eşidilir. Şəki-Qax ərazisi də olmaqla, Balakənə qədər Gürcü radioları, arada olan məsafədə, hətta erməni radiolarının da səslərini eşidirik.

Hesab edirəm ki, müharibə təkcə cəbhədə aparılmır, eyni zamanda informasiya müharibəsi aparılır. Bu bizim strateji istiqamətimiz olduğu üçün Rabitə və Yüksək Texnologiyalar Nazirliyi ciddi işlər görməlidir, lazım gələrsə, daha güclü və yeni texniki qurğular alınıb tətbiq olunmalıdır.
Seçicilərimi narahat edən bəlli bir məsələ var ki, cənab Prezidentin enerji sahəsində apardığı siyasət olduqca doğru-düzgündür. Əvvəllər biz elektrik enerjisini idxal edirdiksə, indi xarici ölkələrə ixrac edirik. Ancaq infrastrukturun fiziki cəhətdən aşınması baxımından Balakən rayonunun bir çox kəndlərində, hətta yüksək gərginlikli xətlərin yerdə olması, işıq dirəklərinin çürüməsi nəticəsində sutka ərzində çoxsaylı işıq keçmələri yaranır.
Hesab edirəm ki, “Azərişıq” ASC tərəfindən yerlərdə ciddi işlər görülməlidir, problemlər aradan qaldırılmalıdır.

Torpaq islahatı ilə bağlı qısaca demək istəyirəm ki, vaxtilə rayon aqrar islahat komissiyasının sədri işləmişəm və keçmiş SSRİ miqyasında ən ideal torpaq islahatı məhz Azərbaycanda aparılıb. Buna kölgə salmağın özü ədalətsizlikdir.