Nəsib Məhəməliyev: “Dövlətin təhlükəsizliyi üçün hansısa təhdid yaranarsa, sosial şəbəkələrə nəzarət mexanizmi reallaşa bilər”

Son vaxtlar ölkədəki karantin rejiminə nəzarət çərçivəsində qanuni vəzifələrini icra edən polis əməkdaşlarına qarşı sosial şəbəkələrdə bəzi təhqir və arzuedilməz ifadələr yer almaqdadır.

Məlum tendensiya sosial şəbəkələrə nəzarətin artırılması məsələsini yenidən aktuallaşdıra bilərmi? Ümumiyyətlə, sosial şəbəkələrin kimlərinsə təhqir və böhtan tribunasına çevrilməsini əngəlləmək üçün hansısa addımlar atmağa ehtiyac varmı?

Moderator.az-a açıqlama verən millət vəkili Nəsib Məhəməliyev, dövlətin təhlükəsizliyi üçün hansısa təhdid yaranacağı təqdirdə, sosial şəbəkələrə nəzarət mexanizminin reallaşa biləcəyini vurğuladı:

“Ümumiyyətlə, müşahidələrim belə qənaətə gəlməyə imkan verir ki, Azərbaycanda pandemiya ilə əlaqədar karantin rejimi tətbiq olunmağa başlayan andan geniş əhali kütlələri tərəfindən iki peşənin daşıyıcılarına rəğbət artdı. Bilavasitə koronovirus infeksiyası ilə mübarizə aparan həkim, tibb personalına və 24 saat ərzində, soyuq-şaxtalı, isti, yağışlı, küləkli havada ictimai adayişi, insanların əmin-amanlığını qoruyan polis işçilərinə. Hərəkətin məhdudlaşdırıldığı dövrdə polis-vətəndaş münasibətlərinin nə qədər mədəni səviyyədə qurulduğunun dəfələrlə şahidi olmuşam. Əlbəttə, hər yerdə olduğu kimi, burada da müəyyən istisnalar ola bilər.

Hesab edirəm ki, xalqımızın tam əksəriyyəti polisin gördüyü işləri, çəkdiyi əziyyəti yüksək qiymətləndirir. Sosial şəbəkələrdə aparılan kompaniya isə, bulanıq suda balıq tutmaq istəyən müəyyən qüvvələr tərəfindən qızışdırılır. Onlar düşünürlər ki, bu yolla xalq-polis qarşıdurması yarada bilərlər. Necə ki, Amerikada öldürülmüş qaradərili gəncin ətrafında siyasi qüvvələrin manipulyasının şahidi oluruq. Nəticədə, ölkənin hər yerində dağıdıcılıq, anarxiya, qarət, yaşayış mərkəzlərinin, ticarət obyektlərinin yandırılması, zorlama, polis işçilərinin öldürülməsi kimi cinayətlər törədilir. İnsanlar kütləvi şəkildə tabesizliyə çağırılır.

Hər kəsə məlumdur ki, bu dağıdıcı proseslər siyasi partiyalar və digər maraqlı qüvvələr tərəfindən qızışdırılır. Bu bizə lazımdırmı? Qətiyyən milyonlarla insanın rifahını, əmin-amanlığını, cüzi bir qüvvənin, tək tək insanların ambisiyalarına qurban vermək olmaz. Ola bilsin bəzi aldadılmış gənclər bunun məsuliyyətini o qədər də dərk etməsinlər. Ancaq Azərbaycan xalqının tam əksəriyyəti çox gözəl anlayır ki, bu olduqca təhlükəlidir. Sosial şəbəkələrlə bağlı, bir çox ölkələrdə ciddi narazılıqlar var. Çünki sosial şəbəkə sahibləri indiyə qədər istifadəçilərin işlətdiyi heç bir ifadəyə görə məsuliyyət daşımırdılar. Buna görə də ayrı-ayrı ölkələrdə terrora dəstək, dövlət çevrilişlərinə çağırışlar, təhqir, şantaj, böhtan, qarayaxma adi hal almışdır. Bu yaxınlarda ABŞ- nın prezidenti Donald Tramp sosial şəbəkələrin məsuliyyətilə bağlı sərəncam imzaladı. Hesab edirəm ki, bizdə bu sahədə mövcud neqativ halların qarşısının alınması üçün qanunvericilikdə müəyyən addımlar atıla bilər. Düşünürəm ki, maarifləndirici işlərin aparılması da effektiv olardı.

Əgər bu tendensiya kütləvi xarakter alarsa, dövlətin təhlükəsizliyi üçün hansısa təhdid yaranarsa, sosial şəbəkələrə nəzarət mexanizmi reallaşa bilər. İnanmıram ki, vəziyyət o səviyyəyə çatar. Bunun üçün elə bir əsas yoxdur.

Xarici ölkələrdə gizlənib sosial şəbəkələr vasitəsilə söyüş, təhqir, böhtan yağdıranlara qarşı hüquqi müstəvidə tədbirlər görmək olar və onların kimlərinsə əlində oyuncağa çevrilməsinin qarşısını almaq olar”.

Seymur ƏLİYEV