Nəsib müəllim, hər vaxtınız xeyir. Balaken.info olaraq xahiş edirik seçiciləri maraqlandıran suallara aydınlıq gətirəsiniz. 

—Hər vaxtınız xeyir, buyurun. 

Aprel ayının 9-da Milli Məclisdə hökumətin 2019-cu ildə gördüyü işlərlə bağlı hesabatı dinlənildi. Müzakirələr necə keçdi və deputatların  hesabata münasibəti qənaətbəxşdirmi? 

— Bəli ənənəvi olaraq hər il Azərbaycan Respublikası Nazirlər kabineti, əvvəki il ərzində görülmüş işlərlə bağlı millət vəkilləri qarşısında çıxış edirlər. Prosedur qayda belədir. Plenar iclasa bir neçə gün qalmış hesabat ilində əldə olunmuş nailiyyətlər statistik  rəqəmlər özündə əks etdirən tam təsnifatla deputatlara tanış olmaq üçün paylanır. Plenar iclasda isə Baş nazirin rəhbərliyi ilə bütün hökumət üzvləri iştirak edir.
 
Hökumət sədrinin məruzəsindən sonra iki-üç gün ərzində millət vəkillərinin çıxışları təşkil olunur və seçicilərin qaldırdıqları problemlər hökumətin nəzərinə çatdırılır və onlar da yekunda qaldırılan məsələlərə münasibət bildirirlər. 

Ancaq bu il koronovirus pandemiyasına  görə hesabat fərqli formatda keçirildi. Yaşı 65-dən yuxarı həmkarlarımız iclasda iştirak etmədilər. Baş nazir on-layn rejimdə məruzə etdi. Yaranmış vəziyyətə görə, əvvəldən parlament rəhbərliyi tərəfindən müəyyən olunmuşdu ki, ancaq komitə sədrləri, müxalifət partiyalarının təmsilçiləri və bitərəflərin nümayəndələri çıxış etsinlər. Digər millət vəkilləri isə çıxışlarını və təklifləri hökumətə baxılmaq üçün yazılı şəkildə təqdim etsinlər. Hesab edirəm ki, təhlükəsizlik baxımından doğru yanaşmadır.

Hesabata münasibətə gəldikdə onu deyə bilərəm ki, 2019-cu ildə Respublika Prezidenti İlham Əliyevin rəhbərliyi ilə sosial-iqtisadi, ümumiyyətlə cəmiyyətin bütün sahələrində qlobal xarakterli əsaslı dəyişikliklər baş vermişdir. Makroiqtisadi sabitlik təmin olunmuş, ÜDM, qızıl, valyuta ehtiyatları artmış, qəbul olunmuş iki sosial paketin nəticəsində 4,2milyon insanın rifah halı yaxşılaşmışdır. Bütün bunlar və bir çox sadalamadığım faktlar əsas verir ki, hökumətin hesabatı Milli Məclis üzvləri tərəfindən müsbət qiymətləndirilsin. 

Seçki kompaniyası çərçivəsində Balakən rayon seçicilərinin qaldırdıqları   problemlərlə bağlı səsləndirmək imkanı yarandımı?

— Əvvəlcə onu qeyd edim ki, əvvəlki çağırışda da, rayonumuzun seçicilərinin elə bir problemi olmayıb ki, mən deputat olaraq onları səsləndirməyim və yaxud aidiyyəti orqanlar qarşısında qaldırmayım. Bu mümkünsüzdür. Tam məsuliyyətlə deyə bilərəm ki, ən çətin anlarda belə seçicilərlə bir yerdə olmuşam. Fiziki cəhətdən imkan olmadığı halda, köməkçilərim, digər vasitələrlə köməyimi əsirgəməmişəm. 

Qaldı ki, hökumətin son hesabatında problemlərin qaldırılması məsələsi. Hesab edirəm ki, bütün dünyanı bürümüş koronovirus pandemiyası ilə əlaqədar hökumətin qarşısında xeyli maliyyə tutumu tələb edən çoxlu layihələrlə çıxış etmək, etik baxımdan o qədər də düzgün deyil. Bunu mən öz çıxışımda da qeyd etmişdim. 

Bütün bunlara baxmayaraq, pandemiyadan sonra nəzərə almalı olduğu bir neçə problemləri hökumətə yazılı şəkildə təqdim etmişəm.

1. Balakən rayon mərkəzindən 18-20 km. məsafədə,az saylı avar xalqının nümayəndələrinin kompakt şəkildə yaşadığı Qabaxçöl qəsəbəsi və ətraf kəndlərdə 30 minədək əhalinin istifadə etdiyi, 1962-ci ildə tikilmiş,indiyə qədər heç vaxt təmir olunmamış 100 çarpayılıq xəstəxana binası, 2012-ci ildə baş vermiş zəlzələdən sonra tam yararsız hala düşmüşdür. Bununla əlaqədar bölgənin ağsaqqalları,ziyalıları cənab Prezidentə kollektiv müraciət etmişlər və ölkə Başçısı ərizəni nəzarətə götürərək səhiyyə nazirliyinə müvafiq tapşırıq vermişdir. Ancaq hələlik bir nəticə yoxdur.

2. Həmin qəsəbədə yerləşən uşaq bağçasının sökülüb tikilməsi üçün 2014-cü ildə investisiya xərcləri hesabına 300 min manat vəsait ayrılmış və layihə-smeta sənədlərinin işlənməsi üçün 30 min manat xərclənmiş,qalan hissəsi isə büdcəyə qaytarılmışdır.

3. Rayon  ərazisində çoxlu sayda yararsız, qəzalı vəziyyətdə olan işıq dirəklərinin və xəttlərinin dəyişdirilməsinə ehtiyac vardır.

4. Balakən şəhəri və ətraf kəndlərin içməli su, kanalizasiya sisteminin yenidən qurulması.

5. Rayonun bəzi ərazilərində, ələlxüsus sərhədyanı kəndlərdə internetin olmaması.

6. Yeni məskunlaşmış ərazilərdə qazlaşma işlərinin aparılması.

7. Böyrək xəstələri dializ aparatına qoşulmaq üçün qonşu Zaqatala şəhərinə getmək məcburiyyətində qaldıqlarından xahiş edirlər ki, hemodializ aparatının alınması və ən müasir üslubda tikilmiş Balakən rayon mərkəzi xəstəxanasında təşkil olunsun.

8. Əlil və xəstə uşaqları olan  valideynlərin  işləməsi,uşaqların isə saxlanması və təhsil almaları üçün ixtisaslaşmış uşaq bağçası-məktəbin tikintisi.

9. İşsizliyin aradan qaldırıması məqsədilə özünü məşğulluq proqramlarını inkişaf etdirmək.

10. Elektrik enerjisinə və qaza tətbiq olunan limitin artırılması.

Suallara cavab verdiyini üçün  təşəkkür edirəm.
Balaken.info//