Deputat Nəsib Məhəməliyev SONXEBER.AZ-ın suallarını cavablandırıb.

-Nəsib müəllim, bütün dünya ölkələri pandemiya kimi qəbul edilən koronavirusla mübarizə aparır. Bu günə kimi minlərlə insan bu virusdan dünyasını dəyişib. Bir çoxları koronavirusun xəstəlik olmadığını, hansısa qüvvələr tərəfindən hazırlanan biokimyəvi silah olduğunu bildirir. Bu iddia nə qədər həqiqətə uyğundur?

- Dünya ölkələri pandemiya ilə mübarizə aparır. Bu günə qədər 700 000- ə qədər insan bu virusa yoluxub. Onların da 33 000- dən bir az çoxu dünyasını dəyişib. Son vaxtlar koronovirusun ətrafında çoxsaylı şayiələr, müxtəlif ölkələrdən ekspertlər, alimlər, hətta ayrı-ayrı dini konfessiyaların nümayəndələri bəyanatlar səsləndirirlər. Böyük dövlətlər virusun yayılmasında bir-birilərini ittiham edirlər. Amma fakt odur ki, koronovirus, bəşəriyyəti təhdid edən, laboratoriya mənşəli olduqca ciddi təhlükədir. Demək olar, bioloji silahdır. Əgər dünya birliyi mövcud konflikləri, geosiyasi ziddiyətləri unudaraq və həmrəylik şəklində mübarizə aparmasalar, planetin gələcək taleyi qaranlıq ola bilər. Fərq ondadır ki, virus peyda olana qədər böyük dövlətlər öz hərbi potensialına arxalanaraq, digər ölkələri təhdid edirdilərsə, indi ən inkişaf etmiş ölkələr belə bu virusun qarşısında acizdirlər.

-Nəsib müəllim, qaydalara uymayan, çağırışlara cavab verməyən və bütün günü küçələrdə olan vətəndaşlarımız da var.

-Bəli, təəssüf ki, sosial məsuliyyəti aşağı olan, problemin ciddiliyini dərk etməyən vətəndaşlarımız da yox deyil. Artıq respublikamızda bu günə qədər 273 nəfər koronovirusa yoluxub və hər gün artmaqda davam edir. Respublika Prezidentinin gördüyü qabaqlayıcı tədbirlər olmasaydı, bu rəqəm çox böyük ola bilərdi . Əgər vətəndaşlar karantin rejiminə riayət etməsələr, qaydaların sərtləşdirilməsi qaçılmaz olacaq. Zərurət yaranarsa, hətta fövqəladə vəziyyət elan oluna bilər.

-Son bir neçə gündür ki, mətbuatda hər adama minimum əməkhaqqı qədər, yəni 250 manat yardım ediləcəyi ilə bağlı xəbərlər verilir. Bununla bağlı Milli Məclisdə hər hansı qanun layihəsi hazırlanırmı?

-Bununla bağlı ayrıca qanun qəbul edilməsinə ehtiyac yoxdur. Nazirlər kabineti yanında Operativ Qərargahın işçi qrupları fəaliyyət göstərir. Ən çox ehtiyacı olan, günəmuzd çalışan, imkansız ailələrdən tutmuş, karantin rejimində zərər çəkmiş sahibkarlara qədər hər kəs kompensasiya alacaq. Kompessasiyaların verilməsi sırf icra hakimiyyətinə aid məsələdir.

-Bu xəstəliklə bağlı aparılan maarifləndirmə işləri yetərlidirmi?

-Çox yaxşı haldır ki, bu məsələdə milli həmrəylik özünü yaxşı mənada göstərdi. Bütün dövlət və özəl telekanallar, KİV əhalinin maariflənməsi istiqamətində kifayət qədər səy göstərirlər. Ən ucqar bölgələrdə belə, uşaqdan böyüyə hər kəs koronovirusla bağlı məlumatlıdır. Ancaq bu başqa məsələdir ki, hamı qiqiyenik qaydalara, davranış normalarına riayət etmir. Panika yaratmadan maarifləndirmə işləri fasiləsiz davam etdirilməlidir.

-Milli Məclisin 2 plenar iclasında siz koronavirusla mübarizə ilə bağlı qanun layihəsinin hazırlanması təklifi ilə çıxış etdiniz. Bu pandemiyanın ölkə ərazində yayılmasının qarşısının alınması üçün daha hansı addımlar atılmasına ehtiyac var?

- Bəli, ikinci iclasda "koronovirusla mübarizə haqqında" qanunun qəbul olunmasını təklif etmişdim. Hesab edirəm belə bir qanunun qəbul olunmasına ehtiyac var. Bu sahədə çalışan həkimlərin, tibb personalının hüquqlarından tutmuş, vəzifələri, sosial statusları, sığorta, xəstələrin öhdəlikləri və bir çox məsələlər öz əksini qanunda tapmış olardı. Cənab Prezident Yeni klinikanın açılışında bir çox problemlərə aydınlıq gətirdi.

-Ölkə ərazisində karantin rejim elan olunduğuna görə demək olar ki, insanlarımız evdə qalmaqla bu virusdan qorunmağa çalışır. Təbii ki, bu da daha çox komunal xidmətlərdən istifadə deməkdir. Son bir ayın komunal borcu insanlarımıza güzəştə gedilə bilərmi?

-Hadisələrin gedişatına uyğun olaraq, cəmiyyətdən sosial sifariş olarsa, hökumət bu məsələyə baxa bilər. Karantin rejimi aprel ayının 20-ə qədər müəyyənləşdirilib. Əgər o vaxta qədər pandemiyanı lokallaşdırmaq mümküm olsa, bu sahədə dəyişikliyə ehtiyac olmayacaq.

-Ölkə ərazində koronavirusa yoluxanların sayı artarsa, fövqəladə vəziyyət elan oluna bilərmi?

- Allah eləməsin. Əgər kütləvi xarakter alsa, tətbiq oluna bilər.

-Bilirsiniz bütün dünya müharibəni dayandıraraq öz ölkəsində insanlarını qorumaq üçün koronavirusla mübarızə aparır. Lakin Ermənistan dövləti bu vəziyyətdə də təxribatlarından qalmır, atəşkəsi tez-tez pozurlar.

-Bu ermənilərin xəstə xislətindən irəli gəlir. Onlar, millət olaraq yüz il öncə "böyük ermənistan" kimi bir virusa yoluxublar. El arasında gözəl bir məsəl işlədilir " keçinin başı ağrıyanda buynuzunu çobanın çomağına sürtər". İnanıram ki,qürur mənbəyimiz olan milli ordumuz vaxtlı-vaxtında təxribatların cavabını artıqlaması ilə verir. Yekun qələbə bizim olacaqdır.

Aysel Yusifqızı
Sonxeber.az