Koronavirusun dünya iqtisadiyyatına vurduğu zərbəni hər ölkə bir şəkildə qarşılamağa hazırlaşır.

ABŞ koronavirusdan iqtisadiyyata dəyən zərəri azaltmaq üçün 1 trilyon dollar ayırıb. Hər adambaşına 1000 dollar dəstək veriləcəyini bəyan edib.Fransa sahibkarlara dəstək olaraq 45 milyard avro, İspaniya 200 milyard avro, Almaniya 500 milyard avro, Türkiyə 100 milyard TL ayırıb. Fransada bəzi sahələrin vergiləri, kommunal ödənişlər dondurulacaq. Güzəştli kredirlər veriləcək. Türkiyədə pensiyalar 1000 Tl-dən 1500 tl-yə qaldırılıb. Türkiyəfə pərakəndə ticarət, avtomobil, teatr, tekstil sahələri də daxil olmaqla bir çox sahələrdə kreditlərlə bağlı güzəştlər var. Gürcüstan turizm obyektlərinə, otel və restoranlara vergi tətili verib.Azərbaycanda da mövcud vəziyyətdən əziyyət əkən insanların sayı həddən artıq çoxdur. Dövlət bu insanlara hansısa bir şəkildə yardım edəcəkmi, kompensasiyalar ola bilərmi?

Bizimyol.info-nun sualını Milli Məclisin deputatı Nəsib Məhəməliyev cavablandırır:

“Mövcud şəraitə və iqtisadi imkanlarına uyğun olaraq, müxtəlif ölkələr koronovirusla mübarizə kontekstində maliyyə vəsaitləri ayırırlar. Son dövrlər dünya bazarında neftin qiyməti kəskin düşsədə , Azərbaycanda 2020- ci ilin büdcəsinin icrası ilə bağlı problem olmayacaq. Ancaq faktdır ki, karantin dövründə qeyri neft sektorunun inkişafı ilə bağlı tənzimləyici tədbirlərin görülməsi vacibdir. Ələlxüsus, kiçik və orta sahibkarlığın dəstəklənməsi istiqamətində hökumət bəzi addımlar ata bilər. Əhalinin məşğulluq səviyyəsinin aşağı düşməməsi , iş yerlərinin ixtisara salınmaması üçün stimullaşdırıcı tədbirlərə ehtiyac var. Bir məsələni də qeyd edim ki, adlarını çəkdiyiniz ölkələrin ayırdıqları maliyyə vəsaiti təkcə sosial- iqtisadi sahəyə deyil, eyni zamanda koronovirusun əleyhinə vaksinlərin yaradılması,yayılma arealının məhdudlaşdırılması və xəstələrin müalicəsinə sərf olunur”,- deyə deputat bildirib.

Spektr Araşdırma və İnkişaf Mərkəzinin İdarə Heyətinin Sədri Ramil Abbasov isə hesab edir ki, dövlətlə birlikdə ziyanı balanlaşdıra və dəymiş ziyanı bölüşdürə bilərik.

“Restoranlarda gündəlik haqqa işləyən ofisiantlar, aşbaz və.s əhalinin məşğul hissəsi var. Bu adamlar indi tam gücü ilə işləmir. Deməli bu vəziyyət uzun çəksə artıq bu kütlə problemlə üzləşəcək. Gələn aydan isə işini dayandırmış şirkətlər öz işçilərinə əmək haqqı verməli və digər öhdəliklərini yerinə yetirməlidir. Sahibkarların üzləşdiyi problemlərin tərkib hissəsi olaraq dövlət tərəfindən banklara da kredit ödənişlərində güzəşt müddəti verilməsi üçün tövsiyyə xarakterli müraciət etməsi çox yaxşı olardı. Bilirsiniz ki, ölkə gəlirlərinin neftdən asılılığı gəlirlərimizi də azaltdığı üçün büdcə də o qədər yaxşı vəziyyətdə deyil. Tədiyyə balansında neft-qaz hissəsisini çıxmaqla digər sahələr defisitlidir. Elə bundan qaynaqlanır ki, neft gəlirlərimiz düşən kimi artıq gəlirlərimiz xərclərimizi ödəmir. Başlayırıq ehtiyatlarımızdan istifadə etməyə. Koronavirusunun isə nə qədər davam edəcəyi məlum olmadığı üçün ehtiyatlardan qənaətlə istifadə etməliyik. Yadda saxlamaq lazımdır ki, bu virusdan hər kəs ziyan çəkəcək. Amma dövlətlə birlikdə biz bu ziyanı balanlaşdıra və dəymiş ziyanı bölüşdürə bilərik”.