» » İlham Əliyev son 200 ildə heç kimin əldə edə bilmədiyi bir nəticə əldə etdi - Nəsib Məhəməliyev

İlham Əliyev son 200 ildə heç kimin əldə edə bilmədiyi bir nəticə əldə etdi - Nəsib Məhəməliyev


Bu gün Azərbaycan Respublikasının Prezidenti İlham Əliyevin doğum günündür. Milli Məclisin deputatı Nəsib Məhəməliyevdən aldığımız müsahibədə, İlham Əliyevin 44 günlük savaşda əldə etdiyi daxili və xarici uğurların gələcək konturlarını cızmağa çalışmışıq.

İlham Əliyev tutduğu vəzifədən asılı olmayaraq, köklü dəyişiklərə nail olan Liderdir

-Prezident İlham Əliyevin müharibədən əvvəl və sonrakı nüfuzu?

-Prezident İlham Əliyevin xalq arasında reytinqi hər zaman yüksək səviyyədə olmuşdur. Çünki İlham Əliyev hansı vəzifədə çalışmasından asılı olmayaraq, köklü dəyişiklərə nail olmuş Liderdir.

90-cı illərin əvvəllərində Ulu Öndər Heydər Əliyevin neft strateqiyasını, o zamanlar Neft şirkətində vitse-prezident vəziifəsində çalışan İlham Əliyev həyata keçirmişdir. Aylarla Amerikada, Avropa ölkələrində çalışaraq neft kontraktlarının ölkəmizin maraqlarına uyğun şərtlərlərlə hazırlanmasını təşkil etmiş və bu günki, güclü Azərbaycan iqtisadiyyatı üçün zəmin yaratmışdır.

1997-cildə İlham Əliyev Milli Olimpiya komitəsinin prezidenti seçilir. 2000-ci il Olimpiya oyunlarından başlayaraq, bütün olimpiyalarda, dünya və Avropa çempionatlarında idmançılarımız ən yüksək pillələrdə üçrəngli bayrağımızı dalğalandırdılar. Artıq çempionlarımızın sayı yüzlərlədir. Ölkənin bütün şəhər və rayonlarında olimpiya-idman kompleksləri inşa olundu. Əhali və ərazi baxımdan Azərbaycanda dəfələrlə böyük ölkələri qabaqlamaqla, dünyada idman ölkəsi kimi tanındı. Gənclər kütləvi şəkildə idmanla məşğul olmağa başladılar. 44 günlük müharibə əsgərimizin nəyə qadir olduğunu göstərdi.

2003-cü ildə Prezident seçildikdən sonra, ölkə tarixində ilk dəfə “Regionların sosial-iqtisadi inkişafı üzrə” dövlət proqramlarını təsdiq etdi və artıq 4-cü proqram icra olunmaqdadır. Analoji 3 proqram Bakı şəhəri və ətraf qəsəbələr üçün də işlənmişdir.

Azərbaycanı Şərq-Qərb, Şimal-Cənub nəqliyyat dəhlizinin mərkəzinə çevirmiş, Bakı-Ceyhan, Bakı-Supsa neft, Bakı-Ərzurum, TAP, TANAP qaz, Bakı-Axalkalaki-Qars dəmiryolu kimi transmilli layihələrin inşasınl başa çatdırmışdır. Azərbaycanda kosmik sənayenin əsasını qoymuşdur. Üç kosmik peykimizin buraxılması ilə, Azərbaycan, az sayda ölkələrin təmsil olunduğu kosmik ailənin üzvü olmuşdur.

Dünyanın 50 ən güclü ordusu sırasında yer almış, müasir texnologiyalara sahib, ən mürəkkəb tapşırıqları yerinə yetirən, döyüş qabiliyyətli ordu formalaşdırmışdır. Azərbaycan, keçmiş SSRİ respublikaları arasında ilk dəfə 155 ölkənin dəstəyi ilə, BMT TŞ-nın qeyri-daimi üzvü seçilmiş və həmin təşkilata sədrlik etmişdir. Qoşulmama hərəkatına, Türk Şurasına sədrlik, bir çox beynəlxalq tədbirlərə ev sahibliyi etmiş, qlobal təşəbbüslərlə çıxış etmişdir. Minlərlə azərbaycanlı gənc dünyanın nüfuzlu ali məktəblərinə dövlət hesabına oxumağa göndərilmiş, “ASAN xidmət” kimi Azərbaycan brendini tətbiq etməklə, neft kapitalının insan kapitalına çevrilməsinin real nəticəsi dünyaya təqdim edilmişdir. Çadır şəhərcikləri ləğv olunmuş, qaçqınlar, məcburi köçkünlər, şəhid ailələri, əlillər minlərlə yeni mənzillə təmin olunmuşdur. Sənayenin, kənd təsərrüfatının, özəl sektorun, təhsilin, səhiyyənin, mədəniyyətin, inkişafında, şəhərsalma, dövlət idarəetmə və bir çox digər sahələrdə köklü dəyişikliklər edilmişdir. Əhalinin elektrik enerjisinə, qaza, içməli və texniki suya olan tələbatının ödənilməsi istiqamətində qlobal layihələr icra olunmuşdur. Bakı dünyanın ən gözəl şəhərləri sırasında yer almış, ölkənin bütün şəhər və rayonları abadlaşdırılmışdır. Tarixi, mədəni abidələrimiz, maddi və qeyri-maddi irsimiz UNESKO-nun siyahısına salınmışdır. Bütün bunların nəticəsi olaraq, 30 il ərzində işğalda qalmış torpaqlarımızın azad olunması, Prezident İlham Əliyevin Ali Baş Komandan, qalib Sərkərdə kimi adını qızıl hərflərlə tarixə yazdırdı. Azərbaycan tarixinin son 200 ildən artıq bir dövründə heç kim belə bir nəticə əldə edə bilməmişdir. Düşünürəm ki, bu faktlar özü özlüyündə İlham Əliyevin imicinin və nüfuzunun ən gözəl göstəricisidir.

İlham Əliyevin və Azərbaycan xalqının beynəlxalq səviyyədə mövqeyini müəyyənləşdirmək üçün Paşinyanın və erməni xalqının düşdüyü vəziyyətə baxmaq lazımdır

-Vətən müharibəsi, prezident İlham Əliyevin və Azərbaycan xalqının Beynəlxalq səviyyədə mövqeyini necə müəyyənləşdirdi?

-Vətən müharibəsi ilk növbədə Azərbaycan xalqının uzun illər davam edən məğlub sindromundan azad etdi. Misli görünməmiş milli birliyə nail olmuş İlham Əliyevin timsalında, dünyaya bacarıqlı, öz haqqları uğrunda vuruşmağı, ölümə getməyi şərəf bilən, heç bir super gücün belə qarşısında baş əyməyən qalib xalq kimi tanıtdı. Müharibədən əvvəl və sonra baş vermiş prosesləri təhlil etdikcə, İlham Əliyevin BMT, Qoşulmama hərəkatı, İƏT, Münhen Təhlükəsizlik konfransı, MDB dövlət başçılarının sammiti, Türk Şurası, Valday diskussiya klubu və s. kimi beynəlxalq platformalardakı çıxışları, bir çox dövlət başçıları ilə apardığı iki tərəfli danışıqlar, dünyanın nüfuzlu KİV-ə verdiyi müsahibələr, Dağlıq Qarabağ kimi mürəkkəb problemin həllini şərtləndirən əsas amillərdir. Onun atdığı diplomatik gedişlər, həmkarlarından fərqli olaraq, strateji düşüncə qabiliyyətinin bir neçə addım irəlini görmək bacarığını sübut etdi. Təkcə bir faktı xatırlatmaq kifayətdir ki, Fransa və bəzi Qərb ölkələrinin müharibə ərəfəsində Ermənistana verdikləri bir mənalı dəstəyə rəğmən, prosesdən kənarda saxlanmaları bunun bariz nümunəsidir. Vətən müharibəsinin İlham Əliyevin və Azərbaycan xalqının beynəlxalq səviyyədə mövqeyini müəyyənləşdirmək üçün hal-hazırda Paşinyanın və erməni xalqının düşdüyü vəziyyətə baxmaq lazımdır. Dünyanın bir çox Ölkələrində siyasətçiləri, media qurumlarını satın almış, xəstə erməni yalanlarını yaymaqla məşğul olan cinayətkar dünya erməniliyi elə bir zərbə almışdır ki, özlərinin etiraflarına görə küçəyə çıxmağa belə utanırlar. Amma bizim soydaşlarımız əksinə, harada yaşamaqlarından asılı olmayaraq başı dik, qürurla gəzirlər.

-İlham Əliyev müharibədən sonra qeyri populyar addımlar atmağa məcburdur. Məsələn erməni ilə bir yerdə yaşamaq, ermənilərin Azərbaycan hakimiyyətində, Parlamentində təmsil olunması, dövlət strukturlarında fəailiyyət göstərməsi kimi gələcəkdə qeyri-populyar addımlar atmağa məcbur olacaq. Bu dövrü rahat keçmək mümkün olacaqmı?

-Azərbaycan bütün millətlərin yaşadığı multikultural dövlətdir. Azərbaycan vətəndaşlığını qəbul etmiş ermənilərin digər vətəndaşlarla birgə konstitusion hüquqlarının qorunması doğru addımdır. Bölgədə dayanıqlı sabitliyin qorunması üçün ölkə başçısının atdığı addımlar tamamilə doğrudur və ölkəmizin müsbət beynəlxalq imicini möhkəmləndirir. Konfrantasiyadan sülhə, barışığa, əməkdaşlığa doğru irəliləməliyik. Hər şeyi açıqlamağa ehtiyac duymuram. Ancaq yaranmış yeni reallıqlar göstərir ki, zaman xalqımızın xeyrinə işləyir. Əgər üçtərəfli bəyannamənin 10-cu bəndini diqqətlə təhlil etsək, görərik ki, cənab Prezident indiyə qədər olduğu kimi, bu sahədə də başqalarından bir neçə addım irəliyə starateji addım atmışdır. Ona görə də, nigarançılığa ciddi səbəb yoxdur. Mən Prezidentə tam etibar edirəm. Tarix sübut etdi ki, xalqın mənafeyinə zidd heç bir addım atmamışdır. Prezidentimizlə fəxr etməliyik.

- Müharibə ciddi iqtisadi və sosial problemlər yaradan bir hadisədir. Bu günkü sosial vəziyyətin gərginləşməməsi üçün atılan addımlara yetərlidirmi?

-İlin əvvəlində başlamış Pandemiya və ardınca müharibə iqtisadiyyatda geriləmələlərə səbəb olmuşdur. Bu bütün dünya iqtisadiyyatına da aiddir. Ancaq 2020-ci ilin dövlət büdcəsi əsasən icra olundu, əksər sosial öhdəliklər yerinə yetirildi. 30 il işğalda qalmış və tamamilə dağıdılmış rayonların bərpası və digər yeni reallıqlar yaranmışdır. Hesab edirəm ki, Azərbaycan iqtisadiyyatı bütün bunların öhdəsindən layiqincə gələcəkdir. Sosial gərginləşmənin baş verməməsi üçün hökumət qabaqlayıcı tədbirlər alır, cəmiyyətin sosioloji vəziyyəti öyrənilir və lazımi qərarlar qəbul olunur.

-Qafqazın lideri. Ciddi, məsuliyyətli bir fikirdir. İlham Əliyev və Azərbaycan Qafqazın lideri olaraq qala biləcəkmi?

-Qafqaz regionu öz spesifik xüsusiyyətlərinə görə olduqca vacib, eyni zamanda mürəkkəb regiondur. Ulu öndər Heydər Əliyevin əsasnı qoyduğu və Prezident İlham Əliyevin sistemli şəkildə apardığı balanslaşdırma siyasəti, bu hadisələrə qədər də ölkəmizi Qafqazda lider dövlət, İlham Əliyevi Lider başçı kimi tanıtmışdı. Ölkəmizdə keçirilən çoxsaylı forumlar, bir çox beynəlxalq tədbirlərə ev sahiblik etməsi, ABŞ və Rusiya kimi supergüclərin hərbi rəhbərliklərinin hər il keçirilən görüşlərinin Bakıda keçirilməsi və s. dediklərimin sübutudur. Nəhayət 44 günlük Vətən müharibəsində “məğlubedilməz” erməni ordusunun darmadağın edilməsi və bu müharibədə Prezident İlham Əliyevin atdığı hər bir addım, hətta düşmənlərimiz tərəfindən onun necə bir Lider olduğu dəfələrlə qeyd olundu. Ermənistanın özündə belə ayrı-ayrı siyasətçilər, sadə insanlar belə nicatı Azərbaycannı Prezidentində görürlər. Düşünürəm ki, gələcək illərdə bu status daha da möhkəmlənəcəkdir.

Sabah hava yağmursuz olacaq