» » Deputat: BMT böyük dövlətlərin əlində oyuncağa çevrilib

Deputat: BMT böyük dövlətlərin əlində oyuncağa çevrilib


Sentyabrın 21-də BMT Baş Assambleyasının 75-ci Sessiyası çərçivəsində BMT-nin 75 illiyinə həsr edilmiş Yüksək Səviyyəli İclas keçirilib.
Azərbaycan Respublikasının Prezidenti, Qoşulmama Hərəkatının sədri İlham Əliyev iclasda videoformatda çıxış edib.Prezident İlham Əliyev 120 dövləti özündə birləşdirən Qoşulmama Hərəkatının və Azərbaycan Respublikasının adından bildirdi ki, BMT-də islahatlar aparılmalıdır, BMT müasirləşdirilməli, gəncləşdirilməlidir.

Milli Məclisin deputatı Nəsib Məhəməliyev Bizimyol.info-ya verdiyi açıqlamada dövlət başçısının fikrini dəstəkləyərək, BMT-nin müasir dünyanın çağırışlarına cavab vermədiyini bildirdi.


“Prezident İlham Əliyev BMT Baş Assambleyasının video format şəklində keçirilən 75-ci sessiyasında iki statusda çıxış etdi. Birincisi, dünyanın 120 ölkəsini özündə birləşdirən Qoşulmama hərəkatının sədri, ikincisi isə, Azərbaycan Respublikasının Prezidenti kimi. Cənab Prezident öz çıxışında müasir dünyanın,eyni zamanda BMT-nın qarşısında duran problemlərə ölkəmizin mövqeyini, münasibətini və təkliflərini bildirdi. Haqlı olaraq BMT-də islahatların aparılması, müasirləşdirilməsinin zəruriliyi barədə fikirlər səsləndirdi. BMT-nın çoxtərəfli əməkdaşlıq platforması kimi müasir çağırışlara cavab verməsinə gəldikdə isə, hesab edirəm ki, indiki vəziyyətdə xeyr. Tam cavab vermir. Düzdür,1945-ci ildə yarandığı andan əsas məsələ kimi qarşıya qoyulan yeni dünya müharibəsinin qarşısının alınmasında təşkilatın rolu çox böyükdür. Baxmayaraq ki, ötən dövürdə planetin müxtəlif yerlərində lokal müharibələr, qarşıdurmalar baş vermişdir. Hələ də həll olunmamış konfliklər davam edir. Dünyanın ayrı-ayrı regionlarına, ölkələrə qarşı ədalətsizliklər, ikili standartlardan irəli gələn qərəzli siyasət aparılır. Dini, irqi ayrı-seçkiliyə yol verilir. Təşkilatın strukturlarında qeyri-proporsional təmsilçiliyə yol verilir. Proseslərə operativ, qabaqlayıcı, tədbirlərin görülmədiyi üçün milyonlarla insan öz ölkələrindən qaçqın vəziyyətinə düşür. Bu baxımdan hesab edirəm ki, BMT-də islahatların aparılması olduqca vacibdir və zamanın tələbidir. Durğunluq daha ağır fəsadlara səbəb ola bilər”.

BMT Təhükəsizlik Şurasının qərarlarının yerinə yetirilməsində yol verilən ikili standartlar barədə danışan millət vəkili təşkilatın müəyyən dairələrin təsiri altından çıxa bilmədiyini vurğulayıb.

“İşğal altında olan rayonların erməni silahlı qüvvələri tərəfindən boşaldılması barədə BMT Təhlükəsizlik Şurasının 4 qətnaməsi var. Ancaq 30 ilə yaxın müddət keçməsinə baxmayaraq icra olunmur. Digər münaqişələrlə bağlı belə faktlar var. Ancaq böyük dövlətlərin maraqlarını təmin etmək lazım gələndə operativ qərar verilir və qısa zaman kəsiyində yerinə yetirilir. Bu o deməkdir ki, BMT təşkilat olaraq böyük dövlətlərin əlində oyuncağa çevrilmişdir. 193 ölkə BMT-nın üzvüdür. Onlardan 5-i TŞ-nın daimi, 15 ölkə müvəqqəti üzvdür. 200-ə yaxın ölkənin taleyini 5 ölkənin verməsi ədalətsizlikdir. Nəzərə alsaq ki, dünya əhalisinin dörddə birini təşkil edən müsəlman ölkələrindən bir dənə olsa ölkə TŞ-da təmsil olunmur. Hesab edirəm ki, dünyada sülhün, ədalətin bərqərar olması üçün konsensus olmalıdır. Bu ilk növbədə TŞ-dan başanılmalıdır. Təhlükəsizlik Şurası özünün qəbul etdiyi qətnamələrin icrasını təmin etməlidir. Qətnamələr kağız üzərində qalmalı deyil. Dəqiq vaxt təyin olunmalıdır. Müəyyən olumuş vaxt ərzində icra edilmədikdə ciddi sanksiyalar tətbiq olunmalı, gərəkirsə işğalçı dövlətə qarşı silahlı müdaxilə olmalıdır. Təbii ki, bunun üçün təşkilatın resursları olmalıdır. Yaşadığımız planet olduqca kiçikdir. Əgər əgər sağlam şüur əsassız ambisiyalara üstünlük gəlməsə, planetimizin gələcəyi sual altındadır”.

“İran Ermənistanın ordu quruculuğunda iştirak etməməlidir” - Deputat