Nəsib Məhəməliyev: "Zamana və proseslərə uyğun olaraq islahatlar daim aparılacaq"

"Azərbaycan ildən ilə nəinki," Doing business", digər maliyyə institutlarının hesabatlarında da öz layiqli yerini tutacaq"

Azərbaycanda həyata keçirilən uğurlu siyasət və məqsədyönlü islahatlar, bütün bunların nəticəsində əldə edilən uğurlar, qazanılan nailiyyətlər ölkəmizin təkcə yerləşdiyimiz coğrafiyada, Cənubi Qafqazda deyil, eləcə də dünyada, beynəlxalq təşkilat və qurumlar arasında mövqelərini möhkəmləndirir, onun nüfuzunu, siyasi çəkisini artırır. Bunu təkcə ayrı-ayrı dünya dövlətləri, inkişaf etmiş Avropa ölkələrinin Azərbaycana olan maraqlarının artması fonunda müşahidə etmirik, eyni zamanda dünyanın aparıcı siyasi, iqtisadi yönümlü təşkilatlarının illik dəyərləndirmələri, hazırladıqları hesabatlardan da aydın şəkildə müşahidə edirik.

Azərbaycanın davamlı olaraq yüksək pillələrdə yer aldığı, hesabatlarında daim yüksək qiymətləndirildiyi dünya səviyyəli təşkilatlardan biri də Dünya Bankıdır. Sözügedən maliyyə qurumunun ötən 10-15 il ərzində təqdim etdiyi bütün hesabatlarda Azərbaycan ən yüksək pillələrdə qərarlaşıb, ölkəmizin həyatımızın müxtəlif sahələrində həyata keçirdiyi islahatlar, yürütdüyü siyasət təqdir olunub. Elə bu günlərdə açıqlanan Dünya Bankının nüfuzlu "Doing Business 2020" hesabatı da belə deməyə əsas verir. Məlumat üçün qeyd edək ki, Azərbaycan "Doing Business 2020" hesabatında ən islahatçı 20 ölkə sırasına daxil edilib. Hesabata əsasən, Azərbaycan "Doing Business" üzrə dörd sahə üzrə sahibkarlıq fəaliyyəti ilə məşğul olmağı asanlaşdırıb. Bu sahələr əmlakın qeydiyyatı, kreditlərin alınması, minoritar investorların hüquqlarının qorunması və müqavilələrin icrasının təmin edilməsidir.

Hesabatda qeyd edilir ki, paytaxtın kadastr xəritəsinin tərtib olunması və Bakıdakı hər bir fərdi torpaq sahəsinin qeydiyyatı, eləcə də mövcud sənədləşmənin təkmilləşdirilməsi və daşınmaz əmlak prosedurlarının çevikliyi nəticəsində daşınmaz əmlakın qeydiyyatı prosesi daha da sürətlənib. Minoritar investorların hüquqlarının müdafiəsi tərəflərin imzaladığı əlverişsiz sazişlər üzrə məsuliyyətin direktorlar üzərinə qoyulmasından sonra güclənib. Kommersiya ilə bağlı mübahisələr yarandıqda tərəflər onlayn olaraq müraciət göndərə və vasitəçilik etmək üçün maddi stimul əldə edə bilərlər. Onu da qeyd etmək yerinə düşər lo, Azərbaycan "Doing Business 2019" hesabatında 32 pillə irəliləyərək ən islahatçı ölkələr sırasında 57-ci pillədən 25-ci yerə yüksəlmişdi.

Milli Məclisin deputatı Nəsib Məhəməliyev sözügedən hesabatla bağlı fikirlərini "OLAYLAR"-a bölüşərkən qeyd edib ki, ölkəmizin əksər beynəlxalq təşkilat və qurumların hesabatlarında, reytinq cədvəllərində qabaqcıl yerləri bölüşdürməsi ölkədə həyata keçirilən uğurlu siyasət və onun nailiyyətləri ilə əlaqədardır. Millət vəkili bu kimi hesabatların Azərbaycanın beynəlxalq aləmdə mövqelərinin daha da möhkəmləndirilməsinə müsbət təsir göstərdiyini də vurğulayıb.

-Nəsib müəllim, məlum olduğu kimi Azərbaycan "Doing Business 2020" hesabatında ən islahatçı 20 ölkə sırasına daxil edilib. Bununla bağlı fikirlərinizi bilmək istərdim. Hər il sözügedən hesabatda Azərbaycanın bir neçə pillə irəliləməsi nəylə bağlıdır?

-Hesab edirəm ki, Azərbaycanın, Dünya Bankının "Doing Business 2020" hesabatında ən islahatçı 20 ölkənin arasında olması, ilk növbədə 2018 - ci il prezident seçkilərindən sonra Prezident İlham Əliyevin apardığı iqtisadi, sosial, kadr və struktur islahatlarının nəticəsidir. Gömrük və vergi sistemindəki dəyişikliklər, daşınmaz əmlakın qeydiyyatın sadələşdirilməsi, sahibkarlıqla məşğul olmaq üçün " bir pəncərə" sisteminin yaradılması, maksimum qısa vaxt ərzində qeydiyyat və rüsumun ödənilməməsi, kredit resurslarının əl çatan olması, elektrik şəbəkəsinə qoşulmanın rahat və burada insan faktorunun minimuma endirilməsi və digər məsələlərin həlli obyektiv olaraq respublikamızın beynəlxalq miqyasda yerini göstərir. Azərbaycanın ildən-ilə həmin hesabatda irəliləməsi cənab prezident tərəfindən aparılan sistemli siyasətin nəticəsidir.

-Bu Azərbaycanda düzgün və məqsədyönlü idarəçiliyin mövcud olduğu demək deyilmi?

-Təbii, ilk növbədə Azərbaycanda yaradılmış ictimai siyasi sabitlik imkan verir ki, bütün sahələrdə islahatlar aparılsın. Oturuşmuş idarəetmə sistemi, üstəgəl islahatlar, beynəlxalq təşkilatların müsbət qiymətləndirməsinə şərait yaradır.

-Ümumiyyətlə, həyata keçirilən islahatlar istər idarəçilik, istərsə də əhalinin sosial rifah halının yaxşılaşdırılmasına necə təsir göstərir?

-Cari ilin əvvəlindən Prezidentin qəbul etdiyi " Sosial paketin" icrası 3 milyona yaxın insanın rifah halının yaxşılaşmasına səbəb olub. Şəhid ailələrinə verilən birdəfəlik yardımlar, əlillərə, məcburi köçkünlərə və digər kateqoriyadan olan imtiyazlı insanlara verilən minlərlə mənzillər, regionlarda kənd təsərrüfatı ilə məşğul olmaq üçün subsidiyaların, gübrənin verilməsi, su təchizatı, biznesin, turizmin stimullaşdırılması birmənalı şəkildə insanların yaxşı yaşamasını şərtləndirən amillərdir.

-İslahatların davamlı olacağına dair verilən vədlər Azərbaycanın növbəti illərdə Doing Business hesabatında daha da irəliləyəcəyini deməyə əsas verirmi?

-İslahatların aparılması, dinamik prosesdir. Zamana və proseslərə uyğun olaraq islahatlar daim aparılacaq. Əminəm ki, Azərbaycan ildən ilə nəinki," Doing business", eyni zamanda digər maliyyə institutlarının hesabatlarında da öz layiqli yerini tutacaq.

-Bu kimi hesabatlar Azərbaycanın beynəlxalq aləmdə mövqelərinin möhkəmləndirilməsi baxımından nə dərəcədə əhəmiyyətlidir?

-Bir çox ölkələrdən fərqli olaraq Azərbaycan, kənar maliyyə dəstəyi olmadan özü özünü tam təmin edən ölkədir. 2008- ci ildən başlayaraq , indiyə qədər tam bərqərar olmayan beynəlxalq maliyyə böhranını ən az ağrılı keçirən ölkələrdən biri Azərbaycandır. Dünya bunu görür və hesablaşır. Təbii olaraq respublikamızın nüfuzu artır, mövqeləri möhkəmlənir, bu da xalqımızın həm bu günü, həm də gələcəyi üçün olduqca əhəmiyyətlidir.