Nəsib Məhəməliyev: “Bu bayram daha geniş formatda keçirilməyə layiqdir”

Bu gün Bakının erməni işğalından azad edilməsinin 102-ci ildönümü ilə əlaqədar olaraq Gəncədə Azəbaycan və Türkiyə hərbi hava qüvvələri birgə uçuşlar həyata keçirib.

Maraqlıdır, məlum tarixi hadisənin iki dövlət tərəfindən bu cür təntənə ilə qeyd edilməsi, bununla bağlı birgə uçuşların keçirilməsi bir növ Azərbaycan və Türkiyə düşmənlərinə verilən mesaj sayıla bilərmi?

Moderator.az-a açıqlama verən millət vəkili Nəsib Məhəməliyev 15 sentyabrın Azərbaycan tarixində özünəməxsus rol oynadığını vurğuladı:

“15 sentyabr-Azərbaycan hərb tarixində qızıl hərflərlə yazılmış ən şərəfli günlərdən biridir. 1918-ci il may ayının 28-də Cümhuriyyət elan olunsa da, Bakı və ölkənin əksər hissəsi erməni-bolşevik qüvvələrənin əlində idi. Nuru paşanın komandanlığı ilə Qafqaz İslam Ordusu, Gəncədən başlayan döyüş əməliyyatları sentyabrın 15-də Bakının azad olunması ilə nəticələndi. Döyüşlərdə 1100-dən artıq şəhid verdi. Aradan 100 ildən artıq vaxt keçməsinə baxmayaraq, Azərbaycan xalqı Bakıda, Şamaxıda, Şəkidə, Qubada dəfn olunmuş türk şəhidlərinin qəbirlərini qoruyub saxlayır, hörmətlə yad edir. Müstəqillik illərində bu şəhidliklər iki qardaş ölkəni bir-birinə yaxınlaşdıran müqəddəs abidələrə çevrilmişlər.

Tarix təkrar olunur. İyirminci əsrin əvvəllərində olduğu kimi, sonlarında da ölkəmiz erməni və onlara himayədarllq edən qüvvələrlə gərgin mübarizə aparmaq zorunda qaldı. Yenə də Azərbaycanın yanında Türkiyəni görürük. Eynilə, Azərbaycan qardaş ölkənin yanındadır.

Bakının azad olunmasının 102-ci ildönümü ilə hər iki ölkənin hərbi hava qüvvələrinin birgə uçuşları olduqca sevindiricidir. Hər bir tədbirin özünəməxsus mənası var. Belə bir tədbirin təntənəli şəkildə keçirilməsi, şanlı hərb tarixini yaşatmaqla bərabər, gənclər arasında vətənpərvərlik ruhunun artmasına xidmət edir. Hesab edirəm ki, 15 sentyabr günü dövlətçilik tariximizin ən önəmli bayramlarından biridir və daha geniş formatda keçirilməyə layiqdir.

Başda Ali Baş komandan İlham Əliyev olmaqla, Azərbaycan xalqını bu bayram münasibətilə təbrik edirəm və işğal altında olan torpaqlarımızın azad olunmasını arzulayıram”.