Bir qayda olaraq bu tipli görüşlərdə maksimum diplomatik normalar qorunur və bir çox məsələlər səthi müzakirə olunur.

Ancaq dünənki qəbulda ölkə başçısı ölkələrimiz arasında əvvəllər mövcud olmuş iki tərəfli əməkdaşlığın məhz, Yunanıstan hökumətinin günahı ucbatından aşağı səviyyəyə düşməsi və etimadsızlıq mühiti yaratdığını faktlarla bildirdi. Dağlıq Qarabağ və ətraf ərazilərin işğalda saxlanması səbəbindən, Ermənistan-Yunanıstan-Kipr arasında hərbi əməkdaşlığın Azərbaycanda narahatlıq yaratdığını səfirin diqqətinə çatdırdı.

Diqqət çəkən əsas məqamlardan biri şərqi Aralıq dənizində qardaş Türkiyənin apardığı kəşfiyyat-qazıntı işlərinə, Yunanıstan və müttəfiqlərinin törətdiyi maneələrlə əlaqədar Azərbaycanın qardaş ölkəni bir mənalı şəkildə dəstəkləməsidir. Heç kimə sirr deyil ki, müasir beynəlxalq münasibətlər sistemində sosial ədalət prinsipləri arxa plana keçir. İkili standartların mövcud olduğu, geosiyasi maraqlar uğrunda gərgin mübarizə getdiyi şəraitdə hər bir ölkə öz təhlükəsizliyini qorumaq üçün prioritetləri müəyyənləşdirmək məcburiyyətindədir. Azərbaycan uzun illər xarici siyasətdə balanslaşdırma prinsipinə üstünlük verib, bütün qonşularla, (Ermənistan istisna olmaqla) qarşılıqlı hörmət şəraitində münasibətlər qurub.

Ancaq ərazisinin bir hissəsi işğal altında olmasına rəğmən, ədalətli mövqe əvəzinə qərəzli münasibət görən Azərbaycan xalqı dostunu və düşmənini gözəl tanıyır. Dost isə qardaş Türkiyənin timsalında çətin günlərdə qətiyyətli mövqeyini nümayiş etdirdi. Hesab edirəm ki, cənab Prezidentin birmənalı, qəti mövqeyi, həm xalqımız, həm də qardaş ölkə tərəfindən yüksək qarşılandı. Dünyada və regionda baş verən hadisələr öz mürəkkəbliyi ilə seçilir. İkitərəfli, üçtərəfli, çoxtərəfli əməkdaşlıqda hadisələrə operativ, çevik müdaxilə tələb olunur. Proseslərə müşahidəçi kimi yox, aktiv şəkildə inteqrasiya edən ölkələr daha çox uğur qazanır. Bu baxımdan cənab prezident İlham Əliyevin hücum diplomatiyası ölkəmizin beynəlxalq nüfuzunun artmasına xidmət edir.