Son günlər qızılca xəstəliyinin geniş yayılması ilə bağlı məlumatlar yayılıb.
Bizimyol.info xəbər verir ki, sosial şəbəkələrdə qızılca xəstəliyinin geniş yayılması ilə bağlı məlumat tirajlanıb. Bildirilib ki, sözügedən xəstəlik daha çox azyaşlı uşaqlar arasında geniş yayılıb. Məsələ ilə bağlı Səhiyyə nazirliyinə və Dövlət Statistika Komitəsinə müraciət etsək də əfsuslar olsun ki, rəsmi cavab ala bilmədik.

Bununla bağlı Bizimyol.info-ya açıqlama verən müstəqil ekspert, tibb elmləri doktoru, professor Adil Qeybulla bildirib ki, qızılca xəstəliyinə yolunxanlar hökmən həkim nəzarəti altında olmalı, yataq rejiminə keçirilməlidir. Belə olmadığı təqdirdə ağırlaşma halı yaşana və insanların həyati təhlükəsi, nəsiltörətmə potensialları zərər görmüş ola bilər:


“Ümumdünya Səhiyyə Təşkilatının (UNİCEF) qrafiki var, həmin qrafiklə uşaqlar müəyyən yaş həddinə qədər qızılca xəstəliyinə qarşı peyvənd olunmalıdırlar. Məhz bu peyvəndin nəticəsidir ki, neçə illərdir bu xəstəlik təsadüf eləmir. Son vaxtlar yəqin ki, peyvənd məsələsində problem var, ona görə ölkədə bu xəstəliyin geniş yayılma halı qeydə alınıb. Bİz də rast gəlirik bu cür xəstələrə, əfsuslar olsun ki, Səhiyyə nazirliyi rəsmi statistikanı açıqlamır. Bu xəstəliklə bağlı insanlara, vətəndaşlara əsas tövsiyyə ondan ibarətdir ki, belə situasiyalarda diqqətli olsunlar. Ən azı pediatrın və infeksionistin məsləhətlərinə qulaq asaraq həmin xəstələrə lazımi tədbirlər görülsün. Heç olmasa xəstə ambulator, ev şəraitində yataq rejiminə keçirilməlidir. Mütləq şəkildə yataq rejiminə keçirilməli, çoxlu maye qəbul etməlidir. Yataq rejiminə keçməyin önəmi ondan ibarətdir ki, ağırlaşmalar olmasın. Çünki qızılca xəstəliyi bəzən ağırlaşmalar verir və bəzən də həyat üçün təhlükəli olan nəsiltörətmə qəbiliyyətinə zərər verəcək fəsadlar törədir. Əhalinin çıxış yolu ondan ibarətdir ki, həkimlərə müraciət etsinlər və həkim məsləhəti əsasında hərəkət etsinlər. Digər tərəfdən də uşaqların peyvəndlənməsinə diqqət yönəltsinlər. Uşaqlar UNİCEF-in qrafikası əsasında peyvənd olunmalıdır. Lakin bəziləri peyvəndlərdən yayınır. Yayınma səbəbi isə buna barmaqarası yanaşmasıdır, poliklinikalara olan etimadsızlıqdır, güvənsizlikdir. Poliklinikalara ciddi təlabat yoxdur. Onlar özləri vətəndaşları çağırmalıdırlar, peyvəndlənməyə məcbur etməlidir. Təəssüflər olsun ki, bu belə deyil”.

Peyvənd təhlükəlidirmi?

-Xeyr, siz təsəvvür edin ki, 4 karantin infeksiyasından biri peyvənd əsasında yoxa çıxıb. Ona görə də peyvəndə qarşı yaranan bu inamsızlıq əsassızdır. Sadəcə olaraq bəzi uşaqlarda nevroloji problemlər var və yaxşı olar ki, onlar öz həkimlərinin nəzarəti altında olsunlar. Qalan situasiyalarda peyvənd kütləvi şəkildə edilməlidir. Bəzən peyvəndlənmiş xəstələr yenidən xəstəliyə yoluxurlar ki, burada peyvəndlərin keyfiyyətsizliyi məsələsi rol oynayır.

Bizimyol.info