Tanınmış müəllim "Aztelekom" MMC-dən şikayətçidir.

Kazus.az xəbər verir ki, bu barədə Ə.Əliyev adına Astara rayon Qapıçıməhəllə kənd ümumi orta məktəbinin tarix müəllimi Həbib Əlizadə sosial şəbəkədə məlumat paylaşıb.

O, evlərinə telefon xətti çəkdirmək üçün "Aztelekom" MMC-yə müraciət etdiyini, lakin rədd cavabı aldığını bildirib: 

"Aprel ayı ərzində ard-arda iki dəfə 30 manatlıq data paket götürmüşəm. Amma bəs etmir, internet ehtiyacımız həddən çoxdu. Keçən gecə internet bitdi deyə təzədən 20 manatlıq paket götürməyə məcbur qaldım. Ay ərzində 80 manata çıxdı xərc! Ailədə 3 nəfər müəllimik. Hələ bacım və qardaşım ayrı paketlər götürür!

Neçə illərdir  "Aztelekom"a müraciət edirik ki, bizim evimizə telefon xətti çəkin, internetdən sərfəli istifadə edə bilək. Amma rayonda deyirlər ki, bunun üçün texniki təchizat yoxdur. Bu gün yenə soruşduk. Yenə eyni cavab. Əlavə olaraq rəsmi onlayn şikayət məktubları da göndərdim.

Mən başa düşmürəm, hansı acınacaqlı vəziyyətdir ki, bircə dənə ev telefonu xətti çəkilə bilmir? Belə biabırçılıq olar?

Mən ay ərzində internet ehtiyacıma görə 80 manat xərcləyəndən sonra bu maaşımla digər xərclərimi necə etməliyəm görəsən? Lap bunu qoydum kənara! Bu boyda Aztelekom bircə evə telefon xətti çəkmək gücündə deyilmi?"