Azərbaycan Respublikası Prezidenti yanında Gənclər Fondu Azərbaycan Respublikasının prezidenti cənab İlham Əliyevin 7 fevral 2011-ci il tarixli 826 nömrəli fərmanı ilə təsis olunmuşdur.

Fondun fəaliyyətinin əsas məqsədi gənclər siyasəti ilə bağlı elm, təhsil, mədəniyyət və digər sosial sahələrə yönəlmiş ictimai və sosial əhəmiyyətli, o cümlədən beynəlxalq səviyyədə həyata keçirilən layihə və proqramları qrant şəklində məqsədli maliyyələşdirməkdən, həmin sahədə konfrans, seminar, festival, olimpiada və digər tədbirlərin təşkilindən, habelə gənclərə maliyyə köməyi nəzərdə tutulan layihələri dəstəkləməkdən ibarətdir.

Yaradılan bu cür imkandan Balakən Gənlər evi sosial xidmət müəssisəsinin gəncləri də istifadə edir.

Belə ki, fondun elan etdiyi fiziki şəxslər üçün 13-cü qrant müsabiqəsində müəssisənin metodisti Fuad Mikayılov da iştirak etmiş və onun "Kiçik qəlbdə böyük gələcək!" layihəsi qalib olmuşdur.

Həmin layihə çərçivəsində Balakən, Zaqatala və Qax rayonlarında təlim xarakterli maarifləndirici görüşlərin keçirilməsi davam edir.

Əsas məqsədi psixo-sosial durumu sağlam Azərbaycan gənliyinin formalaşdırılması olan layihədən 200-dən çox gəncin faydalanması nəzərdə tutulub.