Müsahibimiz Milli Məclisin deputatı Nəsib Məhəməliyevdir

- Nəsib müəllim, bildiyimiz kimi, ötən dövr ərzində əhalinin sosial müdafiəsinin gücləndirilməsi istiqamətində dövlət başçısı tərəfindən mühüm Fərman və sərəncamlar imzalanıb. Bütün bunlar, konkret olaraq, faktlarda özünün əksini necə tapır?

-Ümumiyyətlə, Prezident İlham Əliyev 2003-cü ildə fəaliyyətə başladığı dövrdən apardığı siyasətin mərkəzində Azərbaycan vətəndaşının durduğunu bəyan etdi və ötən dövr ərzindəki fəalyyəti ilə bunu dəfələrlə əyani şəkildə sübut etdi. Çoxsaylı fərman və sərəncamların imzalanması aparılan siyasətin nəticəsidir ki, bu gün Azərbaycan dünyada hərtərəfli inkişaf etmiş və güclü bir dövlətə çevrilmişdir.

Konkret olaraq, son dövrlər əhalinin sosial müdafiəsi ilə bağlı islahatların nəticəsində şəhid ailələrinə birdəfəlik müavinətlərinin verilməsi, şəhid ailələrinə, Əfqanıstan veteranlarına verilən müavinətlərin 300 manata çatdırılması, uzun illər yataqxanalarda yaşayan məcburi köçkünlərə yeni mənzillərin verilməsi, tələbələrin təqaüdünün artırılması, yüz minlərlə insanın pensiya təminatının yaxşılaşdırılması, əhalini narahat edən, əsas problemlərdən olan çoxmənzilli evlərin qeydiyyata alınması və bir çox tədbirlər görülmüşdür.

Tam məsuliyyətlə demək olar ki, sosial müdafiə sahəsi ilə bağlı aparılan siyasətin müsbət nəticəsini hər bir Azərbaycan vətəndaşı, real olaraq, öz həyatında hiss edir.

- İyunun 18-də Prezident İlham Əliyevin müvafiq sərəncamları ilə minimum əməkhaqqı yenə də artırıldı, eləcə də müxtəlif kateqoriyalar üzrə çalışanların maaşlarında artım baş verdi. Bu barədə nə deyə bilərsiniz?

- Azərbaycan Prezidenti İlham Əliyevin 18 iyun tarixli sərəncamlarına müvafiq olaraq, minimum əmək haqqı 250 manata çatdırıldı. Eləcə də, dövlət qulluğunun müxtəlif sahələrində çalışan insanların, hüquq-mühafizə orqanlarının əməkdaşlarının əmək haqları artırıldı. Bu sərəncamların çox böyük əhəmiyyəti vardır.

Düşünürəm ki, əhalinin sosial müdafiəsinin gücləndirilməsi ilə yanaşı, dövlətimizin müsbət imicinin formalaşmasına da, bilavasitə xidmət edir. Belə ki, bu göstəricilərə görə, Azərbaycan MDB-də ön sıralara çıxmışdır və demək olar ki, inqlabi xarakter daşıyır.

- Nəsib müəllim, Azərbaycan vətəndaşlarının böyük sevincinə səbəb olmuş daha bir hadisə də fiziki şəxslərin problemli kreditlərilə bağlı oldu. Ekspertlərin fikrincə, fiziki şəxslərin problemli kreditlərinin həlli ilə bağlı tədbirlərin görülməsi üçün dünyada analoqu olmayan bir qərar verən Prezident İlham Əliyev sosial inqilab nümunəsi təqdim etmiş oldu. Sizin bu barədə fikirlərinizi bilmək istərdik...

- Fiziki şəxslərin problemli kreditlərinin dövlət tərəfindən ödənilməsi, ümumiyyətlə dünyada rast gəlinməyən bir məsələdir. Belə bir humanist addımı atmaqla, Prezident İlham Əliyev xalqın problemlərinə, məişət qayğılarına nə qədər diqqətlə yanaşdığını bir daha sübut etmiş oldu. Bir çox ölkələrə nümunə olacaq bir addım atdı. Bu da, təbii olaraq, əhali tərəfindən çox böyük razılıq hissi ilə qarşılandı. Azərbaycan xalqı da öz qədirbilənliyini göstərərək, belə addımları yüksək qiymətləndirir və hər zaman olduğu kimi, öz prezidentini gördüyü işlərə görə daim dəstəkləyir.

- Sonda Azərbaycanın nailiyyətlərinə, sosial sahədə atılan mühüm addımlara rəğmən müəyyən dairələr ölkəmizə qarşı qarayaxma kampaniyası aparır. Buna münasibətiniz necədir?

- Bu qarayaxma kompaniyasını aparanlara mənim münasibətim, birmənalı tərzdə, mənfidir. Bunlar bir neçə qrupa bölünür. Azərbaycanın iqtisadi-siyasi inkişafını arzulamayan, bu və ya digər məsələlərdə maraqları olan güclər, düşmən Ermənistan və erməni diasporu və düşmən dəyirmanına su tökməyə çalışan özünü müxalifət adlandıran radikal qüvvələr.

Fakt ondan ibarətdir ki, Azərbaycan inkişaf etdikcə, belə qüvvələr daha da aqressivləşirlər. Amma xalqımız müdrik xalqdır, dövlətimiz kifayət qədər güclüdür. Belə kampaniyaların heç biri dövlətçiliyimizə və milli birliyimizə təsir edə bilməz.

RƏFİQƏ KAMALQIZI sia.az//