Bu gün Balakən rayonunda böyük və çox gözəl bir tədbir keçirildi. Xeyli sayda şagird məktəbli paltarlarında əllərində güllərlə yenə " Balakən təhsilinin mərkəzi " olan liseyin heyətinə toplamışdı. Şagirdlərin ucalan səsi ilə gözəl şeirlər , müəllimlərin qayğılı baxışları xoş görüntü yaradırdı. Digər bir tərəfdə şəhid analarının üzündəki üzüntü və fərəh duyğusu , atalarının gözündəki məğrurluq kənardan baxanda insanda qürur hissi yaradırdı.  Hərbiçilər öz göy formaları ilə başları dik dayanmışdılar. Çiyin çiyinə vuruşduqları öz döyüş yoldaşlarının əlamətdar  günü  üçün.

   Bu gün axı Aminin doğum günü idi. 26 yaşı bitirdi Aminin. Şəhidlər ölmür deyilir. Sadəcə onlar uca Allah dərgahında öz layiqli yerlərinə qalxırlar , peyğəmbərə qonşu olurlar. İgidliklə adları aləmə yayılır. Amin üçün şəhidlik bir başqa anlam idi. Aminin şəhidlər , Mübariz İbrahimov , Milli Qəhrəmanlar haqqında necə həvəslə  danışdığını özüm şəxsən eşitmişəm. Aminin şəhid olduğunu, həm də elə igidliklə şəhid olduğunu eşidəndə  liseyin qarşında Mübariz İbrahimov və Fərid Əhmədovun necə qəhrəmanlıq etdiyini , onunla bu hadisə barədə olan söhbətimizi xatırladım. Bu mənim onunla ən uzun söhbətim olmuşdu. Başqa vaxtlarda da qarşı qarşıya gələndə görüşüb , hal - əhval tutub ayrılırdıq. Səmimi deyirəm o söhbətdən sonra hər dəfə Amini görəndə ağlıma Mübariz İbrahimov gəlirdi. İndi düşünürəm ki, bir insanın   taleyini necə qibtə etdiyi insanın taleyinə oxşarmış. İgid elə igiddir. Bir Mübarizdə bizim yanımızda imiş , gözümüzə baxa baxa bizimlə danışmış , deyirmiş , gülürmüş. Amin sübut etdi ki, bu vətənin qoynunda minlərlə igid var. Amin Balakənin igidlər diyarı , qəhramanları yurdu olduğunu sübut etdi.  Bu torpaqlardan çıxan babalarımızın ruhu bilirəm ki, şaddır. Çünki Balakəndən Vətənin Qəhramanı , həqiqi bir qəhrəman çıxdı. Bu gün məzun olduğu, bizim ən çox görüşdüyümüz liseydə Aminin büstünün açılışı oldu. Həm Tacəddin ata, həm Gülşən ana çıxış edərkən üzlərində olan məğrurluq , qüruru sözlə ifadə etmək mümkün deyildi. Hər şəhid atasının, anasının gözünə baxanda belə olur. Sanki onların gözündən axan qürur və kədər yaşı sanki bütün sözləri yuyur aparır. Amin Novruzov , Kamal Məmmədov və Vahid Əlisoltanov demək olar ki, eyni kəndin uşaqları idi. Demək olar ki, bir küçədən idi. Hamı bir biri ilə tanış , dost. Bəlkə də hər gün bir birilərini görürdülər, görüşürdülər. 

Hər 3 igid 44 günlük savaşda ayrı - ayrılıqda igidliklə şəhid oldu. Bu gün açılan büst Aminin igidliyinin sadə xatirəsidir sadəcə. Gələcəkdə liseyin o yüksək nəticə göstərən məzunları ali məktəblərdə " Mən Vətən Müharibəsi Qəhramanı Amin Novruzov adına Liseyin məzunuyam " deyəcəklər fəxrlə. Bu vətənin qoynunda , bu rayondan minlərlə igid çıxacaq. Necə ki, biz Aminlə Mübarizin , Fəridin igidliyindən ağız dolusu danışırdıq gələcəkdə də Aminin igidliyindən danışacaq, bundan ilham alacaq yeni qəhramanlar olacaq.Amin tarixdir. Çox insan unudulacaq , yaddan çıxacaq , amma şəhidlər , qəhramanlar əsla. Onları gələcəkdə də danışacaqlar, müzakirə edəcəklər, onlar haqqında oxuyub öyrənəcəklər. Kaş səninlə yenə igidlərdən danışardıq. Elə səndən danışarıq , sənin igidliklərindən. Bu gün çox sevindim. Ona ki, yenə səninlə liseydə üz üzrə gələcəyəm. Yenə sənə baxıb  təbəssüm qopacaq üzümdə. Qarşına gəlib ürəyimdən keçən sözləri də deyəcəm. Sən mənə cavab verməyəsən bilirəm. Nə fərqi var ki. Sən onsuz öz sözünü demisən. Tək mənə yox , bütün Azərbaycan tarixinə öz sözünü demisən. Buna görə də igid oğlan , tarix səni heç vaxt unutmayacaq !

Zeynal Əmrəliyev
Balaken.info





















Foto: Ramazan