"Elementar etika, estetika qaydalarına riayət etməyən və yaxud xəbəri belə olmayan kifayət qədər vəzifəli şəxslərə də rast gəlirsən"

Zaman-zaman kütləvi informasiya vasitələrində Dənizkənarı Milli Parkda baş verən neqativ hallar barədə yazılır, bulvar ərazisində müşahidə edilən bu və digər problem ictimailəşdirilir. Ancaq təəəsüflər olsun ki, səlahiyətli qurumlar rəhbərlik etdikləri sahədə tənzimləmə yaratmağa, cəmiyyəti narahat edən problemləri həll etməyə maraqlı görünmürlər. Dənizkənarı Milli Park ərazisində ən çox şikayət edilən, ictimailəşdirilən məsələ çayxana və kafelərdə müştərinin hüquqlarının kobud şəkildə pozulması ilə bağlıdır. Daha dəqiq desək bulvar ərazisində sadə çay içmək demək olar ki, qadağandır. Yalnız 7-10 manatından keçib bulvarda şirniyyat və ya mürəbbə ilə çay içə bilərsən.

Son vaxtlar isə bu ərazi üçün daha bir problem xarakterik olub. Bu da icarəyə saathesabı velosipedlərin verilməsi ilə bağlıdır. Belə ki, bulvar ərazisində xüsusi velosiped sürülən ərazilərin məhdud olması, velosiped həvəskarlarının bulvarın əhali baxımdan daha gur yerlərində öz "məharətləri"ni göstərmələrinə yol açır. Bir çox hallarda gənclərin icarəyə götürdükləri velosipedləri çox sürətlə idarə etməsi ətrafdakılar üçün ciddi təhlükə yaradır. Bu kimi hadisələr zaman-zaman bulvar ərazisində müşahidə edildiyindən, artıq rəsmi səviyyələrdə də buna irad bildirilir. Millət vəkili Nəsib Məhəməliyev elə bu məsələ barədə öz etiraz dolu fikirlərini ifadə edib. O, qeyd edib ki, bir müddət əvvəl anoloji hadisə ilə qarşılaşıb və bu kimi hadisələrin nə dərəcədə dəhşətli nəticələrə gətirib çıxaracağı qənaətinə gəlib: "Bakı bulvarı dünyanın ən ğözəl, yaraşıqlı və insanların rahat gəzmələri, əylənmələri, istirahət etmələri, idmanla məşğul olmaları üçün ideal məkandır. Buna görə də uşaqdan tutmuş ən yaşlı vətəndaşlarımızın, eləcə də günü gündən artan şəhərimizin qonaqlarının ən çox üz tutduğu yer məhz bulvardır. Yəqin ki, hər birimiz müxtəlif ölkələrdə olan zaman, həmin ölkənin insanları, Azərbaycandan olduğumuzu öyrənən kimi, Bakı da olduqlarını, bulvarın gözəlliklərindən böyük həvəslə danışırlar. Ola bilsin, gündəlik həyatımızda rastlaşdığımız üçün, bu ğözəlliklər bizim üçün adi görünür. Başqa ölkələrdən gələn turistlərin gözü ilə baxmağı bacarsaq, düşünürəm ki, bulvarın yaratdığı müsbət aura insanlarımızı daha da xoşbəxt edər. Amerika sosioloqlarının gəldiyi belə bir nəticə var. "Müasirlər heç zaman ətrafda baş verən hadisələri düzgün qiymətləndirməyi bacarmayıblar". Yeri gəlmişkən, bu gözəl sərvəti bakılılara bəxş etdiyi üçün, cənab Prezidentə təşəkkürlərimizi çatdırıram".

Millət vəkilinin sözlərinə görə,  son vaxtlar hər yerdə sağlam həyat tərzinin, təmiz havada yerimənin insan orqanizminə faydaları haqqında o qədər təbliğat aparılıb ki, axşamlar vaxt olanda, həmkarları və bəzi dostlarla bulvara gedir: "Təxminən iki həftə öncə, az qala faciəyə çevriləcək bir hadisənin şahidi olduq. Çox yüksək sürətlə velosipedlərlə öz aralarında yarışan bir qrup gənclərdən biri qəflətən əyləci basaraq idarəetməni itirdi və aşaraq zədələndi. Yoldaşlarımızdan biri qeyri-ixtiyari olaraq, "sənə bu da azdır"deyə hiddətini bildirdi. Ən dəhşətlisi o idi ki, həmin gənclər, ailəsi ilə gəzintiyə çıxan məsum bir körpənin həyatına son qoya bilərdilər. Çox şükür, bədbəxt hadisə baş vermədi. Demək olar ki, buna bənzər hadisə dünən axşam da baş verdi. Bir neçə müxtəlif qruplarda birləşmiş gənclər, xüsusi olaraq düzəldilmiş velosiped yollarında yox, məhz insanların kütləvi şəkildə gəzdikləri ərazilərdə yüksək sürətlə, qışqıra qışqıra insanlar üçün real təhlükə yaradırlar. Bəziləri əllərində fast food, yüksək səslə müxtəlif xalqlara məxsus musiqiləri dinləyərək öz keflərindədir. Söz yox, bunların arasında xarici turistlər də yox deyil. Qəribə də olsa bu tipli insanların arasında orta və yaşlılarda, qadınlar da var. Avropaya inteqrasiyadan danışırıq. Avropada insanlar ictimai yerlərdə qışqırmırlar, ucadan telefonla yüksək səslə danışmırlar. Elə bilir ki, qışqıranda min kilometrlə uzaqda olan həm söhbəti onu daha yaxşı eşidəcək. Elementar etika, estetika qaydalarına riayət etməyən və yaxud xəbəri belə olmayan kifayət qədər vəzifəli şəxslərə də rast gəlirsən. Biz də adətən hadisə baş verəndən sonra əl ayağa düşürük".

Millət vəkili Bulvar İdarəsinin rəhbərliyindən xahiş edib ki, kirayə velosiped verən şirkətlərdən tələb edilsin ki, icarədarlarla müvafiq qaydalara riayət olunması üçün onları təlimatlandırsınlar: "Velosipedi ancaq müəyyən olunmuş yerlərdə sürsünlər. İnsanların kütləvi şəkildə gəzdikləri yerlərə qadağan edici nişanların qoyulması təmin olunsun. Heç bir zərurət olmadan ,rahat şəkildə istirahət edən insanlarda tez tez arxaya baxmaqla "özünü qoruma " instinkti formalaşır. Hər birimiz, hər gün, hər saat yorulmadan uşaqların, gənclərin tərbiyəsi ilə məşğul olmalıyıq. İlk növbə də özümüzə, sonra millətə, dövlətə problem yaratmamaları üçün".