“Öz potensialınıza inanın, gələcəyinizi özünüz qurun”.

Azərbaycanda ilk idarəçilik müsabiqəsi olan “Yüksəliş”in təşkilatçıları məhz bu çağırışla istedadı, intellekti, idarəetmə qabiliyyəti olan, karyera qurmaq və inkişaf etmək istəyən vətəndaşlara müraciət edib. Qeydiyyat mərhələsi başlayan gündən indiyə kimi artıq 10 mindən çox şəxs qeydiyyatdan keçib, 8000-dən çox iştirakçının sorğusu təsdiqlənib. 

“Yüksəliş” idarəetmə qabiliyyətinə malik, rəhbər vəzifələrdə çalışmaq perspektivi olan, istedadlı idarəçiləri müəyyən edərək, kadr ehtiyatı bazasını yaratmaq, eləcə də, ölkəmizdə yeni nəsil idarəçilərin yetişməsinə kömək göstərmək, intellektual səviyyəsi yüksək olan insanların inkişafı üçün bərabər imkanları genişləndirməyi hədəfləyən müsabiqədir.

Qeyd edək ki, müsabiqə Azərbaycan Prezidenti İlham Əliyevin sərəncamı ilə həyata keçirilir.

2019-cu ilin iyul ayında dövlət başçısının müvafiq sərəncamına əsasən, Təşkilat Komitəsi yaradıldı. Təşkilat Komitəsinin üzvləri Azərbaycan Respublikasının Prezidentinin köməkçisi Anar Ələkbərov, Azərbaycan Respublikası Prezidentinin Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, İqtisadiyyat naziri Mikayıl Cabbarov, Gənclər və İdman naziri Azad Rəhimov, Təhsil naziri Ceyhun Bayramov,  Əmək və Əhalinin Sosial Müdafiəsi naziri Sahil Babayev, Milli Məclisin Gənclər və İdman Komitəsinin sədri Ülvi Quliyev, Dövlət İmtahan Mərkəzinin Direktorlar Şurasının sədri Məleykə Abbaszadə, İctimai Televiziyanın baş direktoru Balakişi Qasımovdur. Həmçinin müsabiqənin şərtlərini müəyyən edən İşçi qrupu da yaradılıb.

“Yüksəliş” - islahat kursunun məntiqi hissəsi

Bu gün Azərbaycan yeni islahatların astanasındadır, kadrların gəncləşməsi prosesi davam edir.

Təbii ki, islahatlar mütərəqqi düşüncə və müasir dünyagörüşü olan gənc mütəxəssislər tərəfindən həyata keçiriləcək. 

Bu da öz növbəsində ölkədə istedadlı, perspektivli idarəçilərin dəstəklənməsi və təşviqi, həmçinin, kadr ehtiyatı bazasının yaradılması üçün şəffaf bir mexanizmin formalaşdırılmasının zəruriliyi deməkdir. Bunlar “Yüksəliş” müsabiqəsinin qarşısında duran vəzifələrdir.

İşçi qrupunun rəhbəri, Gənclər və İdman nazirinin müavini Fərhad Hacıyev müsabiqənin məqsəd və vəzifələrini belə xarakterizə edib:

“Müsabiqə Prezident İlham Əliyevin kadr islahatlarının məntiqi davamıdır. Məlum olduğu kimi, bu müsabiqə ötən ilin iyul ayında elan edilib və 2019-cu il ölkədə ciddi kadr islahatları ilə əlamətdar olub. Dövlət başçısının dəfələrlə qeyd etdiyi kimi, ölkədə kadr islahatları vaxtında aparılır. “Yüksəliş” sosial lift layihəsi 21-51 yaş arası, ailə təhsilli və idarəçilik sahəsində təcrübəsi olan hər bir Azərbaycan vətəndaşına şamil edilir”. 

Empatiya və qərar qəbul etmək: lider hansı keyfiyyətlərə malik olmalıdır?

Müsabiqədə potensialına güvənən, özəl və ya dövlət sektorunda istənilən vəzifədə çalışan insanlar iştirak edə bilərlər. Müsabiqə bir neçə mərhələdən ibarətdir. Onların hər birində iştirakçılar öz bilik və bacarıqlarını nümayiş etdirməlidirlər. 

“Liderlik qabiliyyəti, nəticələrin analizi, strateji düşüncə, komanda işi, kommunikasiya və təsir, dəyişikliklərin həyata keçirilməsi, yeniliklərə açıq olmaq və sosial məsuliyyət kimi kompetensiyalar müsabiqədə əsas meyarlar sayılır”, - deyə İşçi qrupunun rəhbəri bildirib.

Niyə “Yüksəliş”? 

“Ona görə ki, müsabiqə vətəndaşlara öz potensiallarını nümayiş etdirmək, həmçinin, təkcə xidməti pillələrdə inkişaf baxımından deyil, özünü cəmiyyətə təqdim etmək üçün də açıq imkandır. Ola bilər, kimsə hesab edir ki, onun istedadı, imkanı və intellekti sona qədər açılmayıb, qiymətləndirilməyib və istifadə edilməyib.

Məhz o şəxsə imkan yaradılır ki, özünü göstərsin və doğrudan da, daha yaxşısına layiq olduğunu isbat etsin. Davos beynəlxalq iqtisadi forumunda gedən müzakirələr zamanı, “Strateji baxış: Avrasiya” mövzusunda panel iclasında İlham Əliyev ölkədəki kadr islahatlarından danışarkən qeyd etmişdi ki, hazırda hakimiyyətdə yüksək təhsil almış, müasir baxışları olan yeni şəxslər təmsil olunur. Dövlət başçısı həm də “XXI əsrdə XX əsrin görüşləri ilə uğur qazanmaq mümkün deyil” fikrini səsləndirib”. 

Azərbaycanın Birinci vitse-prezidenti Mehriban Əliyeva tərəfindən gənclərin inkişafına göstərilən diqqət də xüsusi qeyd edilməlidir. Birinci vitse-prezident dövlətin əsas vəzifələrindən biri kimi  təhsilli və müasir düşüncəli gənclərin yetişdirilməsini dəfələrlə vurğulayıb. 

Digər tərəfdən, dövlətin yaxşı kadrlara ehtiyacı var, xüsusən də müasir dünyada güclü dövlətin vacib amillərindən biri məhz onun kadr və intellektual potensialıdır.

Bu gün kadr potensialının itkisinə imkan verə bilmərik, əksinə, onu qorumalıyıq. “Yüksəliş” məhz kadr potensialına dəstək verən platformadır”, - deyə Fərhad Hacıyev əminliyini ifadə edib.

Yeni nəsil liderlər necə müəyyən olunacaq? 

Müsabiqə beş mərhələdən - qeydiyyat, onlayn seçim, əyani, yarımfinal və finaldan ibarətdir. Qeydiyyat mərhələsində müsabiqədə iştirak etmək hüququ olan şəxslər www.yukselish.az saytında şəxsi hesab yaratmalı, qeydiyyat formasını (ərizə formasını) doldurmalı və qeydiyyatdan keçməlidirlər. Qeydiyyat  fevralın 2-si, saat 18:00-a qədər davam edəcək. 

Onlayn seçimdə iştirak etmək hüququnu qeydiyyatdan uğurla keçmiş bütün iştirakçılar əldə edir. Bu mərhələdə idarəçiyə xas intellektual bilik və şəxsi keyfiyyətlər qiymətləndirilir. Onlayn test tapşırıqları iki yerə bölünür: Ümumi biliklər - Azərbaycan dili və ədəbiyyatı, mədəniyyət, tarix, coğrafiya, hüquq və iqtisadiyyat və qabiliyyət testləri (şifahi və rəqəmsal məlumatların təhlili, mücərrəd düşüncə).

Onlayn seçimdən sonra hesabında müvafiq videomüraciət yerləşdirən iştirakçı əyani seçimdə iştirak etmək hüququ qazanır. Bu mərhələ ümumi erudisiya ilə yanaşı, iştirakçıların sosial intellektini, düşünmə sürətini və kommunikativ bacarıqlarını yoxlayır. İştirakçılar əvvəlcədən müəyyən edilmiş ünvana gələrək göstərilən mərhələdə birbaşa  iştirak edirlər.

“İlk mərhələlərdə iştirakçıların əsas bilikləri müəyyənləşdirilir. Sonrakı mərhələlərdə onların yaradıcılığı, komandada işləmək və qərar qəbul etmək qabiliyyəti təyin ediləcək”, - deyə  Fərhad Hacıyev bildirib. 

İşçi qrupunun rəhbəri həmçinin vurğulayıb ki, üçüncü mərhələdən uğurla keçən iştirakçılar yarımfinal mərhələsində iştirak etmək hüququ qazanırlar. Bu mərhələdə iştirakçıların idarəetmə, komanda və fərdi şəkildə işləmək bacarıqları məşğələ və tapşırıq üsulu ilə yoxlanılacaq.

İştirakçılar üçün fərdi inkişaf planının hazırlanması məqsədilə onlar ekspertlər, insan resursları üzrə mütəxəssislər və öz sahəsində peşəkar sayılan insanlar tərəfindən müsahibə olunacaq.

Təşkilatçılar tam şəffaflığa zəmanət verirlər

Müsabiqənin Təşkilat Komitəsi tam şəffaflığa zəmanət verir. Həmçinin, bu təminata görə layihənin bu məsələdə geniş təcrübəyə malik Dövlət İmtahan Mərkəzi ilə birgə həyata keçirildiyini bildirir. 

İşçi qrupunun rəhbəri vurğulayıb ki, məntiqi düşüncə və intellektual bilikləri yoxlamaq üçün “Yüksəliş” müsabiqəsinin iki onlayn mərhələsi DİM-də keçirilir.

F.Hacıyev müsabiqənin İşçi qrupunun rəhbəri olsa da, hətta onun sualları bilmək haqqı yoxdur:

“Bizim belə bir razılığımız var. İmtahanlar zamanı suallardan xəbərdar olan insanların ətrafı ilə təması tamamilə məhdudlaşacaq”.

Müsabiqənin onlayn mərhələlərində dost və tanışlarının onların əvəzinə sualları cavablandırmağı planlaşdıran şəxslər üçün pis xəbər

Hər cəmiyyətdə, təəssüf ki, həmişə hədəfə getmək əvəzinə, zəhmət çəkmək istəməyən, alternativ yollar axtaran insanlar var. Bu baxımdan, imtahanın ilk mərhələlərinin onlayn şəkildə keçiriləcəyi iştirakçıların əvəzinə onların dostlarının və yaxınlarının suallara cavab vermək  ehtimalını yaradır.

“Yüksəliş” yarışmasının təşkilatçıları bu ehtimalları nəzərə alaraq, artıq öz sxemlərini hazırlayıblar. Onlayn imtahanların ilk mərhələlərində belə fürsətcillər müsabiqənin növbəti mərhələlərinə keçə bilsələr belə, əyani mərhələdə onlar müəyyənləşdiriləcək və yoxlama testləri tətbiq ediləcək”, - deyə İşçi qrupunun rəhbəri xəbərdarlıq edib.

“Yüksəliş” stereotipləri dağıtmağı hədəfləyir

Nəhayət, yarımfinal mərhələsindən uğurla keçən iştirakçılar final mərhələsinə vəsiqə qazanırlar. Final mərhələsi çərçivəsində keçirilən tədbirlərdə iştirakçıların idarəetmə bacarıqları xüsusi tapşırıqların (işgüzar oyunlar, sosial layihələr və onların həlli, eskpertlərlə iş, müsahibələr) köməyilə qiymətləndirilir.

Bu mərhələdə iştirakçılar idarəçi rəhbərlərlə görüşəcək, onlarla birgə işgüzar müzakirələr, dəyirmi masalar təşkil olunacaq. İştirakçıların komanda müzakirələri əsasında mentorlar gələcəkdə işləmək istədikləri liderləri seçəcəklər. Bunun özü də iştirakçılar üçün ən azı işə düzəlmək baxımından növbəti bir imkandır.

Karyera yüksəlişindən başqa, müsabiqənin 20 qalibinə 20 min manat məbləğində qrant təqdim olunacaq. Qrantdan istifadə ilə bağlı müsabiqənin sərt tələbləri var. Belə ki, qaliblər bu vəsaitin yarı hissəsini şəxsi məqsədlərinə, digər hissəsini isə təhsillərinə yönəldə biləcəklər. 

Bakı Dövlət Universitetinin 100 illik yubileyinə həsr olunmuş mərasimdəki nitqində Azərbaycan Prezidenti İlham Əliyev tələbələrə müraciət edərək onları biliklərə yiyələnməyə çağırdı.

“Dövlət başçısının qeyd etdiyi kimi, indi işəgötürənlərə artıq “tapşırılmış” insanlar lazım deyil. Onlar ixtisaslaşmış mütəxəssisləri, öz işinin peşəkarlarına ehtiyac duyurlar”, - deyə Fərhad Hacıyev bildirib.

Təşkilat Komitəsi eyni vaxtda bölgələrdə geniş maarifləndirmə kampaniyası aparır. Təbliğatla əlaqədar ictimaiyyəti məlumatlandırmaq və internetə çıxış imkanları məhdud insanlar üçün qeydiyyatda dəstək məqsədilə yanvarın 21-dən başlayaraq səyyar qeydiyyat avtobusları bölgələrə yola düşüb. 

Təşkilat Komitəsinin işlərinə Gənclər və İdman Nazirliyinin yerli şöbələri, Gənclər Fondu, Heydər Əliyev Mərkəzlərindəki “Karyera İnkişaf mərkəzləri”, Gənclər mərkəzləri, “Regional İnkişaf” İctimai Birliyi və “ASAN xidmət” tərəfindən dəstək göstərilir.

Müsabiqənin qeydiyyat mərhələsi artıq yekuna yaxınlaşır. Öz potensialına güvənən, amma hələ də qeydiyyatdan keçməyənlər fevralın 2-nə kimi müsabiqəyə qoşula bilərlər.