Avqustun 28-də Şəki-Zaqatala Regional Təhsil İdarəsinin müdiri Günay Mahmudova 10–20 iyul tarixlərində Çin Xalq Respublikasının Şanxay şəhərində keçirilən Beynəlxalq Riyaziyyat Olimpiadasında (IMO) bürünc medal qazanan Şəki şəhər Kimya-Biologiya Təmayüllü Respublika Liseyinin XI sinif şagirdi Turan Musayevlə görüşüb.
‎
‎İdarənin inzibati binasında təşkil olunan görüşdə həmçinin müdir müavini Hafiz Pənahov, ETİHİ Şəki Şəhər Komitəsinin sədri Ziyafət Xasiyeva, liseyin direktoru Elmir Məmmədəliyev və şagirdin valideyni iştirak edib.
Görüş zamanı Turan Musayevin beynəlxalq olimpiadada qazandığı uğur yüksək qiymətləndirilib, onun əldə etdiyi nailiyyətlərdən bəhs olunub, eyni zamanda beynəlxalq yarışlarda ölkəmizi layiqincə təmsil etməsi və qazandığı nəticələrin digər şagirdlər üçün nümunə olduğu xüsusi vurğulanıb. İdarə müdiri şagirdə gələcək təhsil həyatında və beynəlxalq olimpiadalarda yeni uğurlar arzulayıb.
‎
‎Sonda Turan Musayev Şəki-Zaqatala Regional Təhsil İdarəsinin “Fəxri fərmanı” ilə təltif edilib və Elm və Təhsil İşçiləri Həmkarlar İttifaqının Şəki şəhər Komitəsi tərəfindən hədiyyə ilə mükafatlandırılıb.
‎
‎Qeyd edək ki, beynəlxalq və respublika səviyyəli olimpiadalarda iştirak edən Turan Musayevin hazırda 5 qızıl, 3 gümüş və 1 bürünc medalı var. O, indiyədək 5 beynəlxalq olimpiadada iştirak edib.

Şahidi olduğunuz hadisələri çəkib bizə göndərin! 7/24 whatsapp