Azərbaycan Respublikasının Prezidenti Cənab İlham Əliyevin rəhbərliyi ilə ölkəmizdə şəhid ailələrinə və qazilərə dövlət qayğısı prioritet istiqamətlərdən biridir. Prezident İlham Əliyevin müəyyən etdiyi bu humanist siyasət bütün dövlət qurumlarının fəaliyyətində əsas xətt kimi götürülür.

Bu çərçivədə, Azərbaycan Respublikasının daxili işlər naziri, general-polkovnik  Vilayət Eyvazovun rəhbərliyi ilə daxili işlər orqanlarında şəffaflıq, qanunun aliliyi və vətəndaş məmnuniyyəti əsas fəaliyyət prinsiplərinə çevrilmişdir. Sözügedən prinsiplər Balakən Rayon Polis Şöbəsində də ardıcıl şəkildə həyata keçirilir.

Dünya Azərbaycanlılarının Həmrəyliyi Günü və Yeni il münasibətilə Balakən Rayon Polis Şöbəsinin rəisi, polis polkovniki Çingiz Aslanovun rəhbərliyi ilə şöbənin əməkdaşları Vətən müharibəsi və antiterror tədbirləri zamanı şəhid olmuş hərbi qulluqçuların ailələrini ziyarət ediblər. Görüş zamanı ailə üzvləri ilə səmimi söhbətlər aparılıb, onların qayğı və problemləri ilə yaxından maraqlanılıb.

Ziyarət zamanı Vətən müharibəsində əldə olunan tarixi Qələbədən, şəhidlərimizin keçdiyi şərəfli döyüş yolundan, göstərdikləri igidlik və qəhrəmanlıq nümunələrindən bəhs olunub. Vurğulanıb ki, şəhidlərimiz müqəddəs Vətən torpaqları və dövlətimizin suverenliyi uğrunda canlarından keçərək xalqımızın əbədi qürur mənbəyinə çevriliblər.

Şəhid ailələri göstərilən diqqət və qayğıya görə Balakən Rayon Polis Şöbəsinin rəhbərliyinə və əməkdaşlarına minnətdarlıqlarını ifadə ediblər. Qeyd olunub ki, bu cür ziyarətlər Prezident İlham Əliyevin şəhid ailələrinə göstərdiyi yüksək diqqət və qayğının yerlərdə bariz nümunəsidir.

Balakən Rayon Polis Şöbəsi bundan sonra da şəhid ailələrinə diqqət və qayğının davam etdiriləcəyini, dövlətimizin və xalqımızın onlara daim sahib çıxdığını bildirib.

Şahidi olduğunuz hadisələri çəkib bizə göndərin! 7/24 whatsapp