“Rusiya sülhməramlılarının belə bir xəritə tərtib etməsi və nümayiş etdirməsini düzgün addım hesab etmirəm. Bu tipli addımlar, Azərbaycan cəmiyyətinin onlara qarşı inamını azaldır”. Bunu SİA-ya millət vəkili Nəsib Məhəməliyev deyib.

Deputatın sözlərinə görə, Azərbaycan, Rusiya prezidentlərinin imzaladığı və Ermənistan baş nazirinin qəbul etdiyi kapitulyasiya aktına görə dekabr ayının 1-ə qədər erməni silahlı qüvvələri qeyd-şərtsiz Azərbaycan ərazilərini tərk etməlidirlər: “Proses Rusiya sülhməramlılarının nəzarəti altında həyata keçirilirdi. Əsasən bəyannamənin bu müddəası icra olundu. Ancaq bu günki reallıq ondan ibarətdir ki, Hadrut meşələrində ayrı-ayrı erməni silahlıları gizlənmiş, əldə olunmuş razılığa tabe olmaq istəmirlər.

Əksinə, hərbçilərimizə, mülki şəxslərimizə qarşı xain hücumlar təşkil edirlər. 4 hərbçimiz şəhid oldu, 3 nəfər yaralandı. Hüquqi baxımdan həmin silahlı erməni dəstələrinin törətdikləri cinayətlər terror aktı kimi qiymətləndirilməli, onlar özləri isə dərhal məhv edilməlidir.

İndiki halda bu, Rusiya sülhməramlılarının bilavasitə vəzifəsidir və onlar minlərlə şəhidin qanı bahasına əldə olunmuş qələbənin xalqımız üçün həssas bir mövzu olduğunu unutmamalıdırlar. Nizamlama proseslərində maksimum neytral mövqe sərgiləməlidirlər”.