“Fransa Xarici İşlər Nazirliyinin Senatın qəbul etdiyi qətnaməyə münasibəti riyakarlığın ən yüksək formasıdır. Çünki bu prosesi başladan məhz Fransa Xarici İşlər Nazirliyi və Prezident Administrasiyası olub. Fransa Senatında da senatorların əksəriyyəti iqtidar partiyasının təmsilçiləridir, orada hər hansı şübhə yeri qalmır ki, bu, ümumi dövlətin məsələyə olan münasibətidir”.

Publika.az xəbər verir ki, bunu Fransa Senatında “Dağlıq Qarabağ respublikasının tanınmasının zəruriliyinə dair” 145 nömrəli qətnamənin qəbul edilməsinə münasibəti ifadə edən deputat Nəsib Məhəməliyev qeyd edib.

Onun sözlərinə görə, bu, münasibətlərin pozulmasından savayı heç bir müsbət nəticəyə gətirib çıxarmayacaq: “Çünki Fransa ilə Azərbaycanın 27 sentyabra qədər olan həm iqtisadi, həm də siyasi münasibətləri çox yüksək səviyyədə idi və həmin vaxtdan bəri Fransanın dövlət olaraq tutduğu mövqe Minsk Qrupunun 3 həmsədrindən biri olan ölkə kimi neytrallığını qorumaq əvəzinə, birmənalı şəkildə beynəlxalq hüququn norma və prinsiplərinə zidd olaraq işğalçını dəstəkləməsi onun qərəzli olduğunu nümayiş etdirdi. Etibarlı tərəfdaş, partnyor kimi Fransaya olan inamı öldürdü. Bu baxımdan hesab edirəm ki, Fransa Xarici İşlər Nazirliyinin bəyanatı qeyri-səmimidir. Azərbaycanla Fransa arasında iqtisadi əməkdaşlığı qoruyub saxlamağa xidmət edir”.

“İkincisi, siyasi proseslərdə Minsk Qrupu üçlüyündə fəaliyyətini davam etdirməsi üçün Azərbaycan tərəfindən kəskin mövqeni neytrallaşdırmağa hesablanıb. Həm iqtisadi, həm də siyasi məsələlərə görə maksimum bu cılız bəyanatla istəyirlər ki, Azərbaycan tərəfdən ehtimal olunan təzyiqləri azaltsınlar. Hesab edirəm ki, biz Minsk Qrupu çərçivəsində Fransa ilə heç bir halda əməkdaşlıq etməməliyik. Minsk Qrupunda 11 ölkə, o cümlədən qardaş Türkiyə təmsil olunub. İstənilən digər ölkə ilə Fransanın həmsədrliyi əvəz olunmalıdır. Artıq bizim əlimizdə ciddi əsaslar var ki, Fransanı Minsk Qrupunun həmsədrliyindən kənarlaşdıraq. Hesab edirəm ki, iqtisadi münasibətlərə də yenidən baxmalıyıq”, - deputat əlavə edib.