Nəsib Məhəməliyev: “Heç kimin şəxsi ambisiyası dövlət maraqlarından üstün olmamalıdır”

Məlum olduğu kimi, son vaxtlar karantin qaydalarını pozaraq ad günü, nişan, toy mərasimi edən, yaxud bu şənliklərdə iştirak edən vəzifəli şəxslərin cəzalandırılması istiqamətində ciddi addımlar atılmaqdadır.

Maraqlıdır, atılan bu addımlar dövlətimizin pandemiyaya qarşı mübarizədə nə qədər qətiyyətli olduğunu göstərməklə yanaşı, həm də qanunun aliliyi, qanun qarşısında hər kəsin bərabərliyi prinsipinə əməl etməsinin real isbatı kimi dəyərləndirilə bilərmi?

Moderator.az-a açıqlama verən millət vəkili Nəsib Məhəməliyev, dövlətin və ölkə başçısının bu məsələdəki qətiyyətinin göz önündə olduğunuq eyd etdi:

“İlk növbədə nəzərə almalıyıq ki, Azərbaycan hüquqi, demokratik ölkədir və bu ölkənin başında cəmiyyətin bütün sahələrində islahatlar aparan, neqativ hallara qarşı sözdə yox, əməldə mübarizə aparan Prezident İlham Əliyev durur. Hüquqi dövlətlərdə isə, qanunun aliliyi hər şeydən üstündür və kimliyindən, cəmiyyətdə tutduğu statusundan asılı olmayaraq, hamı qanun qarşısında bərabərdir. Təəssüf ki, bəzi hallarda özünü qanunlardan üstün hesab edən, ,,xüsusi imtiyazlı,,ərköyün insanlar da yox deyildir. Artıq 21-ci əsrdir və belə insanlar dərk etmirlər ki, onların hərəkətləri ictimaiyyət tərəfindən qıcıqla qarşılanır, sosial ədalət prinsiplərini pozmaqla qarşıdurmalara səbəb olur. Təəssüf və təəccüb doğuran əsas məsələ odur ki, belə özbaşınalıqlara cəmiyyətdə kifayət qədər tanınmış, özlərini siyasi hakimiyyətə yaxın göstərən insanlar tərəfindən yol verilir. Keçmiş deputatın təşkil etdiyi toy mərasimi və bəzi iştirakçıların açıqlamaları cəmiyyətə, dövlətə qarşı hörmətsizlikdir. Heç kimin şəxsi ambisiyaları dövlət maraqlarından üstün olmamalıdır. Bu insanlar əksinə, xalqa nümunə olmalı, həm Covid-19-la mübarizədə, həm də günü-gündən azğınlaşan ermənilərlə müharibədə dövlət Başçısına dəstək nümayiş etdirməli, karantin rejiminin qaydalarına əməl etməlidirlər. Bütün dünyanı bürümüş koronovirus pandemiyası ilə mübarizə, məhz dövlət başçısının, zamanı qabaqlayan qəti qərarlarına, məhdudlaşdırıcı tədbirlərin tətbiqinə görə, Azərbaycanda bir çox ölkələrlə müqayisədə daha uğurla aparılır.

Olduqca müsbət haldır ki, karantin rejimi tətbiq olunan gündən xalqımız dövlətin müəyyənləşdirdiyi qaydalara riayət etməklə, hakimiyyətə tam dəstək verdi. Hesab edirəm ki, qanunları pozanlara qarşı atılan addımlar xalq tərəfindən yüksək qiymətləndirilir. Bu, bir daha göstərdi ki, dövlətin qanunlarını pozan heç bir şəxs toxunulmazlıq statusuna malik deyil. Kimliyindən asılı olmayaraq, belə şəxslər cəzalarını alacaqlar. Cənab Prezident dəfələrlə məmurları, vəzifəli şəxsləri xəbərdar etmiş və hər zaman olduğu kimi, bu gün də onun sözü ilə əməli üst-üstə düşür. Görülmüş tədbirlər prafilaktik cəhətdən cəmiyyətin saflaşmasına, milli birliyə, bərabərliyə, qanunların aliliyinə, sosial-ədalət prinsiplərinin bərqərar olması istiqamətində atılan addımlardır”.

Seymur ƏLİYEV