Xəbər verdiyimiz kimi Prezident İlham Əliyev Elmar Məmmədyarovun Azərbaycan Respublikasının Xarici İşlər naziri vəzifəsindən azad edilməsi haqqında sərəncam imzalayıb. Ölkə başısının digər sərəncamı ilə də Ceyhun Bayramov yeni Xarici işlər naziri təyin edilib. Yeni xarici işlər nazirliyinin təyin edilməsi Dağlıq Qarab münaqişəsinin həllində və diplomatik münasibətlərin inkişafına necə təsir edəcək?

Bununla bağlı Sonxeber.az-a danışan deputat Nəsib Məhəməliyev bildirib ki, Dağlıq Qarabağ probleminin həlli istiqamətində aparılan iş, Xarici İşlər Nazirliyinin fəaliyyətinin əsas hissəsidir:

"Heç kim üçün sirr deyil ki, Azərbaycan xalqı bu nazirliyin fəaliyyətindən narazı idi. Əsas problemimiz olan, Qarabağ məsələsindən tutmuş, imtahandan kənar, tanışlıq və başqa maraqlara görə kadr təyinatları, xidməti pasportların satılması, xarici vətəndaşlara vizaların verilməsindəki bürokratik maneələr və s.

Bu da Xarici İşlər Nazirliyində işin düzgün qurulmadığının təsdiqi idi. Ölkə prezidentinin müəyyən etdiyi hücum diplomatiyasını həyata keçirmək, operativ, hadisələri qabaqlayan addımların atılması isə çox aşağı səviyyədə idi. Xarici İşlər Nazirliyinin işi saat mexanizmi kimi dəqiq, hər tərəfli düşünülmüş vahid orqanizm kimi olmalıdır. Azərbaycan dövlətinin iqtisadi maraqlarından tutmuş, təhlükəsizliyinə, ölkələrarası mədəni-siyasi əlaqələrin inkişaf etdirilməsinə, geosiyasi maraqlardan maksimum istifadə edilməsinə, təmsil olunduğumuz beynəlxalq təşkilatlarla münasibətlərin ən yüksək səviyyədə olmasına çalışmalıdır.

Ciddi diqqət yetirilməli məsələlərdən biri də, nazirliyin rəhbər strukturlarından başlamış, diplomatik korpusların nümayəndələri arasında sağlam mühitin formalaşması və müasir Azərbaycan dövlətini təmsil edən insanların müsbət imicinin formalaşdırılmasıdır. Nazirlər kabinetinin müşavirəsində cənab Prezident haqlı olaraq tənqidi fikirlərini bildirdi və düşünürəm ki, hər vətəndaşımızın ürəyincə oldu. Kadrların təyinatı məsələsində olduqca vacib meyarı səsləndirdi. "İlk növbədə kadrların ürəyi milli hisslərlə döyülməlidir" Çox təəssüflər ki, biz uzun illər bəzi sahələrdə bunu görmürdük".

Deputat qeyd edib ki, yeni nazirin Qarabağ probleminin müsbət həllinə təsiri məsələsinə gəldikdə isə, hər birimiz dərk etməliyik ki, bu münaqişənin həlli hansısa fərddən asılı deyil:

"Bu problemin bir dəfəlik həlli ilk növbədə dünyada və regionda gedən geosiyasi proseslərdən asılıdır. Geosiyasi proseslər isə dinamikdir, yəni yerində saymır. Bizim isə bir dövlət olaraq əsas vəzifəmiz hücum diplomatiyasını intensivləşdirmək, beynəlxalq əlaqələrimizi daha da genişləndirmək, iqtisadi-sosial inkişafımızı və təhlükəsizliyimizi təmin etməkdən ibarət olmalıdır. Münbit beynəlxalq şərait yetişdiyi anda məsələ birdəfəlik həll olunmalıdır. Bir daha təkrar edirəm ki, ciddi işləmək lazımdır. Bu baxımdan yeni Xarici İşlər nazirinin qarşısında çox böyük vəzifələr durur. Ona uğurlar arzu edirəm".

Aysel Yusifqızı