Martın 18-də Balakən Rayon İcra Hakimiyyətinin inzibati binasında Balakən şəhərinin “Şəhərdaxili Hərəkət (Mobillik) Planı”nın müzakirəsi keçirilib. Görüşdə aidiyyəti dövlət qurumlarının nümayəndələri iştirak ediblər.

Müzakirə zamanı Balakən şəhərində şəhərdaxili hərəkətin təhlükəsizliyi və mobillik problemləri diqqətə çatdırılıb. Piyada axınının çox olduğu ərazilər və piyadaların yolu keçməkdə çətinlik çəkdiyi yerlər barədə məlumat verilib. Bu məsələlərin həlli üçün vacib tədbirlərin görülməsinin zəruriliyi vurğulanıb.

Görüşdə, həmçinin Balakən şəhərində ictimai nəqliyyat infrastrukturunun təkmilləşdirilməsinə ehtiyac olduğu bildirilib. Nizamlanmayan təhlükəli yol ayrıcılarının mövcud vəziyyətinin qiymətləndirilməsi, hərəkət təhlükəsizliyinin artırılması üçün əlavə tədbirlərin görülməsi müzakirə edilib. Bununla yanaşı, şəhərdə velosiped nəqliyyatının təşviqi və bu məqsədlə müvafiq infrastrukturun inkişaf etdirilməsinin vacibliyi qeyd olunub.

Bəzi küçələrin kəsişmələrində işıqforların quraşdırılmasına və ictimai nəqliyyat üçün yeni dayanacaqların yaradılmasına ehtiyac olduğu vurğulanıb. Eyni zamanda, şəhər və yol şəbəkəsində bütün yol hərəkəti iştirakçılarının səmərəli, təhlükəsiz və rahat hərəkətini təmin etmək məqsədilə geniş müzakirələr aparılıb.

balaken.info