“Prezident İlham Əliyevin yerli jurnalistlərə müsahibəsini diqqətlə izlədim. Dövlət başçısı mühüm məqamlara toxunub”.

Bunu Pravda.az-a açıqlamasında V çağırış Milli Məclisin deputatı Nəsib Məhəməliyev deyib.

N.Məhəməliyev qeyd edib ki, əsas diqqətçəkən məqam Prezidentin Avropa İttifaqına üzvlüklə bağlı toxunduğu məsələ olub: “Dövlət başçısı dedi ki, “Biz təklif olunan məsələlərə öz razılığımızı verməmişik və bunun səbəbi var. Onlardan biri ticarətlə bağlıdır. Bildiyiniz kimi, Azərbaycan Dünya Ticarət Təşkilatının üzvü deyil. Baxmayaraq ki, biz bir neçə ölkə ilə müzakirələri ikitərəfli formatda artıq başa vurmuşuq, ancaq mən hesab edirəm ki, hələ vaxt gəlib çatmayıb. Bunun da səbəbi ondan ibarətdir ki, bizim ixracımızın əsas hissəsi hələ ki, neft-qaz məhsullarıdır və bu məhsulları ixrac etmək üçün Dünya Ticarət Təşkilatına üzv olmaq lazım deyil. Digər tərəfdən, bizim əsas vəzifəmiz qeyri-neft sektorunun inkişafıdır, yerli istehsalın artımıdır və belə olan halda biz daxili bazarımızı da qorumalıyıq. Əgər biz indi Dünya Ticarət Təşkilatına üzv olsaq, bizim istehsalçılar, o cümlədən sənaye sektorunda, kənd təsərrüfatı sektorunda böyük problemlərlə üzləşə bilərlər. Ola bilsin ki, Azərbaycana keyfiyyətsiz və bizim bazarımızı zəbt etmək məqsədi daşıyan böyük həcmdə idxal məhsulları gələcək və beləliklə, yerli istehsala böyük ziyan vurulacaq. Onu da bildirməliyəm ki, hazırda Dünya Ticarət Təşkilatı çərçivəsində də böhran yaşanır. Bildiyiniz kimi, Amerika Birləşmiş Ştatları bu təşkilatda öz üzvlüyünə yenidən baxır. Demək olar ki, bəzi ölkələr arasında - təşkilata üzv olan ölkələr və müttəfiq ölkələr arasında ticarət müharibələri baş alıb gedir və genişlənir. Belə olan halda, əlbəttə ki, bu məsələyə bizim ehtiyatlı yanaşmağımız çox məntiqlidir və əsaslıdır. Ona görə imzalanacaq sazişdə ticarətlə bağlı məsələlər bizi qane etmir və biz qarşı tərəfə öz fikirlərimizi bildirmişik. Ümid edirik ki, onlar buna anlayışla münasibət göstərəcəklər. Digər vacib məsələ energetika sektoru ilə bağlıdır. Burada da baxmayaraq ki, Avropa İttifaqı ilə enerji sahəsində bizim əməkdaşlığımız uğurludur və birgə layihələr icra edilir, ancaq sazişdə təklif olunan məsələlərin biri də, - mən istəyirəm ictimaiyyət onu da bilsin, - enerji daşıyıcılarının qiymətləri ilə bağlıdır. Belə bir bənd təklif olunur ki, Azərbaycanda təbii qazın daxili qiyməti ixrac qiyməti ilə bərabərlik təşkil etsin. Reallıqda bu nə deməkdir, bunu anlamaq o qədər də çətin deyil. Hazırda Azərbaycan istehlakçılarının təxminən 85 faizi təbii qazı çox ucuz qiymətə, yəni, dövlət tərəfindən verilmiş subsidiya əsasında alır, qiymət də min kubmetr üçün 100 manatdır. İxrac qiyməti isə bundan bir neçə dəfə böyükdür. Əgər biz öz təbii qazımızı daxili qiymətlərlə satsaq, iqtisadiyyatımıza çox böyük ziyan dəyəcək. Çünki belə olan halda, ixrac qiyməti 58 dollar olmalıdır. Bu gün isə dünya bazarlarında, o cümlədən Avropa bazarlarında daxili qiymət, yəni, istehlakçıların ödədiyi qiymət təqribən 300, 400, 500 dollara bərabərdir. Bu, təqribən 1000 manata gəlib çıxacaq. Belə olan halda, biz daxili qiymətləri ən azı on dəfə qaldırmalıyıq. Belə olan halda, Azərbaycan vətəndaşları təbii qaz üçün 100 manat yox, 500 manat, ya da 700 manat ödəməli olacaqlar, bu, qətiyyən mümkün deyil. Ya da ki, biz böyük çətinliklə və böyük səylər göstərərək, böyük investisiyalar qoyaraq Cənub Qaz Dəhlizini demək olar ki, başa çatdıraraq xarici bazarlara öz qazımızı 58 dollara çatdırmalıyıq. Bu, qətiyyən qəbuledilməzdir və təəccüb edirəm ki, nə üçün bizim tərəfdaşlarımız, bu sadə məntiqlə, bu hesablamalarla razılaşa bilmirlər. Ona görə bu iki əsas məsələ razılaşdırılmamış qalır və bizim mövqeyimiz birmənalıdır”.  Ölkə rəhbəri bu məsəl ilə bağlı fikrini açıq şəkildə bildirdi, səbəblərini açıqladı. Prezident xüsusilə qeyd etdi ki, burada əsas məsələ Azərbaycan xalqının mənafeyidir. Hesab edirəm ki, Azərbaycan reallığa uyğun addımlar atır.

Ölkə prezidenti məmurların qanunsuz əməllərindən də danışdı, işçilərin əməkhaqqının mənimsənilməsinin yolverilməz olduğunu qeyd etdi. Çox maraqlı fikir söylədi: “Xalqdan qorxmursansa, Allahdan qorx”. Aztəminatlı ailələrin əməkhaqqını mənimsəmək hansısa məmura hörmət gətirməz. Deputatlarla bağlı da çox düzgün məqamlara toxundu. Prezidentin bu fikirlərini tam dəstəkləyirəm. Hesab edirəm, dövlət başçısının tövsiyəsi VI çağırış Milli Məclisin üzvləri üçün yol xəritəsi olacaq. Deputat seçildiyi gündən seçicilərlə sıx işləməlidir, xalq-hakimiyyət körpüsü rolunu tam təmin etməlidir. Millət vəkilləri cənab Prezidentin tövsiyələrinə xüsusi diqqət yetirəcəklər. Ola bilər, indiyədək seçilən deputatların hansısa seçicisinə laqeyd münasibət bəsləyib, amma düşünürəm, yeni formalaşan parlament istisnasız olaraq aktiv işləyəcək. Prezident İlham Əliyev Ermənistan-Azərbaycan Dağlıq Qarabağ münaqişəsinin həlli ilə bağlı ölkəmizin haqlı mövqeyini bir daha səsləndirdi. Azərbaycan münaqişənin həllini sülh yolu ilə, beynəlxalq hüquq normaları çərçivəsində davam etdirməyə çalışır. Əgər Azərbaycanın bu cəhdləri baş tutmayacaqsa, təbii ki, torpaqların azad edilməsi üçün digər vasitələrdən istifadə olunacaq. Azərbaycan torpaqların işğalı ilə barışa bilməz. Beynəlxalq aləm də ölkəmizi dəstəkləyir. Ümid edirik ki, münaqişə tez bir zamanda həll ediləcək”.

Deputat qeyd edib ki, dövlət başçısı AXC-Müsavat cütlüyünün hakimiyyəti dövrünü dəqiq ifadə edib: “Həmin dövr hər kəs xatırlayır, uzaq keçmiş deyil, xalq o illəri unutmayacaq. Həmin dövr kriminal ünsürlər meydan sulayırdı. Səriştəsiz insanların idarəçiliyi belə də olmalı idi. Onların məqsədi dövlətin sərvətlərin talamaq idi. Həmin şəxsləri Dağlıq Qarabağ problemi maraqlandırmır, yalnız öz mənafeləri üçün çalışırdılar. İndi də xaricdən dəstək alaraq ölkədə xaos yaratmağa cəhd edirlər. Xalq radikal müxalifətə dəstək vermir, onların addımları xalqda ikrah hissi doğurur. Baxın mitinq təşkil edirlər, 300-500-dən artıq insan getmir. Bu göstəricinin özü xalqın onlara münasibətidir”.